គណៈកម្មាធិការជាតិរៀបចំការបោះឆ្នោត ឬ គ.ជ.ប នៅមិនទាន់មានចំណាត់ការណាមួយពាក់ព័ន្ធនឹងសារនយោបាយគណបក្សប្រឆាំង «ដូរមេឃុំបម្រើបក្ស ដាក់មេឃុំបម្រើរាស្ត្រ» ដែលទាមទារឲ្យកែតម្រូវនិង គម្រាមប្តឹងដោយបក្សកាន់អំណាច ដោយថា រងចាំដល់ពេលឃោសនាបោះឆ្នោតសិន។
កាលពីថ្ងៃទី២មីនាឆ្នាំ២០១៧ គណបក្សសង្គ្រោះជាតិបានប្រកាសពីគោលនយោបាយជាអទិភាព៥ចំណុចសម្រាប់ឃោសនារកសំឡេងឆ្នោតជ្រើសរើសក្រុមប្រឹក្សាឃុំសង្កាតនាពេលខាងមុខនេះ ក្នុងនោះមានទាំងពាក្យថា «ដូរមេឃុំបម្រើបក្ស ដាក់មេឃុំបម្រើរាស្ត្រ»។
ប៉ុន្តែសារនយោបាយឃ្លានេះ ត្រូវបានគណបក្សប្រជាជនព្រមានប្តឹង បើបក្សប្រឆាំងនៅមិនព្រមកែតម្រូវ ដោយចាត់ទុកថា ជាសារនយោបាយនោះថាមានចរិកញុះញង់បង្កហេតុ និងប្រមាថដល់មន្ត្រីឃុំសង្កាត់នៅទូទាំងប្រទេសដោយថា ពួកគេកំពុងបម្រើពលរដ្ឋគ្រប់និន្នាការគ្មានការរើសអើង។
សមាជិកគណៈកម្មាធិការជាតិរៀបចំការបោះឆ្នោត លោក មាន សទិ មានប្រសាសន៍ថា សារនយោបាយដែលគណបក្សសង្គ្រោះជាតិប្រើនៅពេលនេះ គ.ជ.ប មិនទាន់មានសមត្ថកិច្ចធ្វើការដោះស្រាយបាននៅឡើយទេ ដោយថា ទាល់តែដល់ថ្ងៃឃោសនាបោះឆ្នោត ទើបជាសមត្ថកិច្ចរបស់គ.ជ.ប ។
លោកថា៖ «ពាក្យស្លោកដែលគណបក្ស CNRP លើកឡើងពេលនេះ វាមិនមែនជាដំណាក់កាលដែល គ.ជ.ប ត្រូវយកមកដោះស្រាយនោះទេ។ គ.ជ.ប ដោះស្រាយតែនៅពេលឃោសនា គឺរយៈពេល១៤ បើគាត់យកពាក្យស្លោកគាត់ ទៅផ្សព្វផ្សាយនៅពេលឃោសនា បើមានពាក្យបណ្ដឹង គ.ជ.ប នឹងពិនិត្យថាតើពាក្យស្លោកនឹងត្រឹមត្រូវទៅតាមការកំណត់នៃច្បាប់ឬ ខុសនឹងមាត្រានៃច្បាប់។ ចឹងថាពេលនេះ គ.ជ.ប គ្រាន់តែបានទទួលព័ត៌មានហ្នឹង ហើយក៏ពិចារណានឹងគិតថាត្រូវដោះស្រាយយ៉ាងណា នៅពេលធ្វើយុទ្ធនាកាលឃោសនា ពេលនេះមិនទាន់ដល់ដំណាក់ទេ»។
មេធាវីរបស់គណក្សសង្គ្រោះជាតិ លោកស្រី ម៉េង សុភារី យល់ថាឃ្លាំដូរមេឃុំបម្រើបក្ស ដាក់មេឃុំបម្រើរាស្ត្រ គឺមិនបានប៉ះពាល់ ឬជាការញុះញង់នោះទេ។
លោកស្រីថា៖ «ការឃោសនាបោះឆ្នោតមានន័យថា ជាសកម្មភាព ដើម្បីធ្វើការបញ្ចុះបញ្ចូល ឲ្យធ្វើការគាំទ្រដល់គណបក្សនយោបាយណាមួយ ក៏ដូចជាបេក្ខជនណាមួយ។ ដូច្នេះ វាអាស្រ័យទៅលើក ថា តើគណបក្សនយោបាយនោះគាត់មានលទ្ធភាព នៅក្នុ្ងងការបញ្ចុះញ្ជូលអ្នកគាំទ្របានដោយរបៀបណា។ ចំពោះពាក្យស្លោកដូរមេឃុំបម្រើបក្ស ដាក់មេឃុំបម្រើរាស្ត្រ នោះមិនមានជារូបអីឲ្យ មានការញុះញង់ អីនោះទេ ពីព្រោះថា យើងមិនបានសំដៅទៅដល់មេឃុំដែលគាត់ធ្វើការបម្រើប្រជាពលរដ្ឋនោះទេ បើសិនមេឃុំណាដែលគាត់ធ្វើការបម្រើប្រជាពលរដ្ឋគឺមិនសំដៅទៅគាត់នោះទេ»។
នាយកប្រតិបត្តិអង្គការឃ្លាំមើលការបោះឆ្នោតមួយ ហៅ NICFEC លោក សំ គន្ធាមី សុំមិនធ្វើការបក ស្រាយចំពោះរឿងនេះ ប៉ុន្តែលោកថា បើតាមច្បាប់បោះឆ្នោតជ្រើសតាំងតំណាងរាស្ត្រ ឬក្រុមប្រឹក្សា ឃុំ សង្កាត់ចែងថា គណបក្សនយោបាយទាំងអស់ អាចបង្កើតសារនយោបាយដោយខ្លួនឯងបាន លើកលែង តែសារនោះបង្កផលប៉ះពាល់ដល់សន្តិសុខជាតិ និងរើសអើងពូជសាសន៍ ទើបច្បាប់មិនអនុញ្ញាត។
លោកថា៖ «គ្រាន់តែជាសារធម្មតា មិនប៉ះពាល់ដល់ចំណុចហ្នឹងទេ មិនមានអីប្រឆាំងពីច្បាប់ទេ គ.ជ.ប មិនដឹងថា គណបក្សសង្រ្គោះជាតិថា សារនឹងបានផ្ញើរទៅឲ្យ គ.ជ.ប ឬក៏យ៉ាងម៉េចខ្ញុំអត់ទាន់ក្ដាប់បានទេ ។ ប៉ុន្តែក្រៅផ្លូវការខ្ញុំបានជួបឯកឧត្តម ហង្ស ពុទ្ធា គាត់ប្រាប់ខ្ញុំថា អត់ទាន់មានឃើញគណបក្សនយោបាយណា ផ្ញើរសារដែលខ្លួនយកទៅប្រើប្រាស់មកគ.ជ.ប ដើម្បីពិនិត្យក៏អត់មានដែរ។ តែគណបក្សនយោបាយអាចមានសិទ្ធិគ្រប់បង្កើតសារខ្លួនគាត់ហើយបើចង់ដាក់មកគ.ជ.បឲ្យក៏បានដែលនេះជាសិទ្ធិរបស់គណបក្ស»។
វីអូឌី នៅមិនទាន់អាចសុំការបញ្ជាក់បន្ថែមពីលោក សុខ ឥសាន អ្នកនាំពាក្យគណបក្សប្រជាជនកម្ពុជា បាននៅឡើយទេ។
ទោះជាយ៉ាងណា នៅក្នុងសេចក្តីថ្លែងការណ៍មួយកាលពីថ្ងៃទី៦ខែមីនា អ្នកនាំពាក្សគណបក្សប្រជាជនកម្ពុជា បានទាមទារឲ្យថ្នាក់ដឹកនាំគណបក្សសង្គ្រោះជាតិកែតម្រូវជាបន្ទាន់នូវខ្លឹមសារឃោសនានយោបាយ «ដូរមេឃុំបម្រើបក្ស ដាក់មេឃុំបម្រើរាស្ត្រ» ដោយថាខ្លឹមសារនេះ មានចរិកញុះញុង បង្កហេតុ និងប្រមាថមើលងាយយ៉ាងធ្ងន់ធ្ងរដល់មន្ត្រីនៅថ្នាក់មូលដ្ឋាន ដែលបានខិតខំបម្រើរាស្ត្រ៕