ក្រុមរដ្ឋអាជ្ញារបស់បែលស៊ិចបានឲ្យដឹងថាជនសង្ស័យម្នាក់ដែលនៅរស់រានមានជីវិតពីការបំផ្ទុះគ្រាប់បែកនៅក្នុងទីក្រុងព្រុចសែលកាលពីខែមីនាបានសារភាពថា ដំបូងឡើយក្រុមរបស់ខ្លួនបានរៀបចំគម្រោងវាយប្រហារជាថ្មីនៅក្នុងប្រទេសបារាំង។
បណ្ដាញផ្សាយព័ត៌មាន BBC បានរាយការណ៍ថា ជនសង្ស័យម្នាក់ឈ្មោះ មហាម៉េដ អាប្រ៊ីនី (Mohamed Abrini) ដែលត្រូវបានចាប់ខ្លួនកាលពីថ្ងៃសុក្របានសារភាពថា ក្រុមរបស់ខ្លួនបានប្ដូរចិត្តទៅធ្វើការវាយប្រហារនៅក្នុងទីក្រុងព្រុចសែលជំនួសវិញ បន្ទាប់ពីអាជ្ញាធរបែលហ្ស៊ិកបានចាប់ខ្លួនជនសង្ស័យម្នាក់ទៀតក្នុងក្រុមរបស់ខ្លួនឈ្មោះ សាឡា អាប់ដេសស្លាម (Salah Abdeslam)។
លោក មហាម៉េដ អាប្រ៊ីនី ត្រូវបានគេរាយការណ៍ថាបានសារភាពផងដែរថាលោកគឺជាអ្នកដែលត្រូវបំផ្ទុះគ្រាប់បែកទី៣នៅឯព្រលានយន្តហោះ ប៉ុន្តែបានរត់ចេញដោយមិនបានបំផ្ទុះគ្រាប់បែក។
ការវាយប្រហារដោយកាំភ្លើងនិងគ្រាប់បែកនៅទីក្រុងប៉ារីស ប្រទេសបារាំង កាលពីខែវិច្ឆិកា ឆ្នាំ២០១៥ បានសម្លាប់មនុស្សអស់១៣០នាក់។ ចំណែកការវាយប្រហារដោយគ្រាប់បែកនៅឯស្ថានីយរថភ្លើងនិងព្រលានយន្តហោះនៅក្នុងទីក្រុងព្រុចសែល ប្រទេសបែលហ្ស៊ិក កាលពីថ្ងៃទី២២ ខែមីនា ឆ្នាំ២០១៦ បានសម្លាប់មនុស្សអស់៣២នាក់បន្ថែមទៀត។
ក្រុមរដ្ឋឥស្លាម (Islamic State) មានមូលដ្ឋាននៅក្នុងប្រទេសស៊ីរីនិងអ៊ីរ៉ាក់បានអះអាងថាខ្លួនជាអ្នកធ្វើការវាយប្រហារទាំងពីរនេះ។
កាលពីថ្ងៃសៅរ៍ លោក អាប្រ៊ីនី អាយុ៣១ឆ្នាំ សញ្ជាតិបែលហ្ស៊ិក មកពីប្រទេសម៉ារ៉ុក ត្រូវបានចោទប្រកាន់ជាមួយបុរសបីនាក់ផ្សេងទៀតពាក់ព័ន្ធនឹងសកម្មភាពភេរវកម្ម៕
