ប្រធានាធិបតីអាមេរិកលោក បារ៉ាក់ អូបាម៉ា បានឱ្យដឹងថាកំហុសធ្ងន់ធ្ងរបំផុតដែលលោកបានធ្វើពេលកាន់តំណែងជាប្រធានាធិបតីគឺការខ្វះខាតក្នុងការរៀបចំផែនការសម្រាប់ផលវិបាកក្រោយការផ្តួលរំលំរបបផ្ដាច់ការនៅលីប៊ីរបស់លោកប្រធានាធិបតី មូម៉ា ហ្កាដាហ្វី (Moammar Gadhafi) កាលពីឆ្នាំ២០១១។
ក្នុងបទសម្ភាសន៍មួយដែលបានចាក់ផ្សាយនៅប៉ុស្តិ៍ Fox News កាលពីថ្ងៃអាទិត្យ ពិធីករបានសួរលោក អូបាម៉ា ថាអ្វីទៅដែលលោកចាត់ទុកថាជាកំហុសធ្ងន់ធ្ងរជាងគេក្នុងពេលលោកធ្វើជាប្រធានាធិបតី? លោក អូបាម៉ា បានឆ្លើយតបថា “ប្រហែលជាបរាជ័យក្នុងការគ្រោងសម្រាប់ថ្ងៃ បន្ទាប់ពីអ្វីដែលខ្ញុំគិតថាគឺជារឿងត្រឹមត្រូវក្នុងការចូលអន្តរាគមន៍នៅក្នុងប្រទេសលីប៊ី”។
ទោះបីជាលោក អូបាម៉ា បានលើកឡើងថាលោកគិតថាការធ្វើអន្តរាគមន៍នៅក្នុងប្រទេសលីប៊ីនោះបានដំណើរការបានល្អតាមដែលអាចធ្វើទៅបានក៏ដោយ ក៏លោកនៅតែចាត់ទុកប្រទេសលីប៊ីនាពេលបច្ចុប្បន្ននេះថា “រញ៉េរញ៉ៃ” ។
នេះមិនមែនជាលើកទី១នោះទេដោយនៅប៉ុន្មានសប្តាហ៍ថ្មីៗនេះលោក អូបាម៉ា ក៏បាននិយាយអំពីប្រទេសលីប៊ី និងអន្តរាគមន៍ដែលដឹកនាំដោយអង្គការណាតូដោយជាលទ្ធផលបានបណ្ដាលឲ្យមានការសម្លាប់លោក ហ្គាដាហ្វី កាលពីខែតុលាក្នុងឆ្នាំ២០១១នោះគឺរយៈពេលប៉ុន្មានខែបន្ទាប់ពីអន្តរាគមន៍ដំបូងរបស់អង្គការណាតូ។
នៅក្នុងសន្ទរកថាកាលពីខែកញ្ញាឆ្នាំ២០១៥ មុនពេលមហាសន្និបាតអង្គការសហប្រជាជាតិលោក អូបាម៉ា ក៏បានរិះគន់ការធ្វើអន្តរាគមន៍នៅក្នុងប្រទេសលីប៊ីនេះផងដែរ៕