មន្ត្រីអះអាងថា គ្មានសញ្ញាណាមួយបើកផ្លូវឲ្យមានការចរចានយោបាយ ដើម្បីឈានទៅដោះលែងអ្នកការពារសិទ្ធិមនុស្សនិងសកម្មជនបក្សប្រឆាំងបាននៅក្រៅឃុំ ក្នុងពិធីបុណ្យចូលឆ្នាំមកដល់នោះទេ បើទោះបីថ្នាក់ដឹកនាំ ផ្អាកការវាយប្រហារគ្នា ដោយពាក្យសម្តីក៏ដោយ។
នៅប៉ុន្មានសប្តាហ៍ចុងក្រោយនេះ បើទោះបីស្ថានការណ៍នយោបាយ ត្រូវបានគេមើលឃើញថា មិនល្អប្រសើឡើងវិញក៏ដោយ តែមេដឹកនាំបក្សកាន់អំណាច និងមេដឹកនាំបក្សប្រឆាំង ហាក់បានផ្ញើសារនយោបាយថា ពួកគេចង់ឃើញបរិយាកាសនយោបាយស្ងប់ស្ងាត់ ទាំងអំឡុងពិធីបុណ្យចូលឆ្នាំខ្មែរ និងដល់ថ្ងៃបោះឆ្នោត ដែលប្រព្រឹត្តិទៅនៅថ្ងៃទី៤ខែមិថុនា។
ប៉ុន្តែមន្ត្រីជាន់ខ្ពស់ របស់គណបក្សប្រឆាំងលោក ហូរ វ៉ាន់ បា្រប់អ្នកសារព័ត៌មានក្រោយចូលជួបសកម្មជនរបស់ខ្លួនទាំង១៦នាក់ នៅពន្ធនាគារព្រៃស នាថ្ងៃទី១១មេសានេះថា គ្មានតម្រុយណាមួយពីបក្សកាន់អំណាច ដើម្បីបើកផ្លូវ ឲ្យមានការចរចា ឈានទៅដោះលែងមន្ត្រីសិទ្ធិមនុស្ស និងសកម្មជនរបស់ខ្លួន ឲ្យមានសេរីភាព មុនពិធីចូលឆ្នាំខ្មែរមកដល់នោះទេ។
លោកថា៖ «គណបក្សសង្គ្រោះជាតិនៅតែចង់បានការដោះលែងពួកគាត់អញ្ចឹង។ ប៉ុន្តែវាមិនទាន់ឃើញភ្លើងខៀវណាមួយ ដែលបើកផ្លូវឲ្យយើង ដើម្បីបើកផ្លូវចរចាឬក៏និយាយគ្នា អ្នកដែលជាប់ចោទទាំងអស់នោះ»។
ទោះជាយ៉ាងណា លោក ហូរ វ៉ាន់ អះអាងថា សកម្មជននយោបាយទាំង១៦រូប បានផ្តាំផ្ញើឲ្យគណបក្សនេះ ពង្រឹងភាពក្លាហាន ឆ្ពោះទៅរកការឈ្នះឆ្នោត ដោយថាមិនត្រូវគិតពីពួកគេដែលកំពុងជាប់ឃុំ ហើយយកបញ្ហានេះទៅដោះដូរ ជាមួយបក្សកាន់អំណាចនោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា គិតត្រឹមថ្ងៃអង្គានេះ គ្មានដំណឹងនៃការចរចាណាមួយ នឹងត្រូវធ្វើឡើង ដើម្បីដោះលែងអ្នកទាំងនោះទេ ដោយថា រដ្ឋាភិបាលមិនអាចលូកដៃចូលកិច្ចការតុលាការបានឡើយ។
លោក សុខ ឥសាន បន្តទៀតថា រដ្ឋាភិបាលក៏មិនអាចស្នើព្រះមហាក្សត្រឲ្យលើកលែងទោសអ្នកទាំងនោះ ក្នុងករណីដែល ពួកគេមិនទាន់ទទួលកំហុសដែរ។
លោកថា៖ «ត្រូវទទួលស្គាល់ការពិត ថាយើងប្រព្រឹត្តិល្មើសហើយ ឲ្យតុលាការកាត់ទោសទើបខ្លាយជាទណ្ឌិត។ហើយព្រះករុណាលោកលើកលែងទោសតែទណ្ឌិតទេ មិនមែនលើកលែងទោសអ្នកដែលអត់មានទោសទេបាទ»។
អំឡុងស្ថានការណ៍នយោបាយឡើងកម្តៅ អ្នកការពារសិទ្ធិមនុស្ស៤រូប នៅសមាគមអាដហុក មានលោក នី សុខា លោក យី សុខសាន លោក ណៃ វ៉ង់ដា លោកស្រី លឹម មុន្នី មន្ត្រីគ.ជ.ប លោក នី ចរិយា សកម្មជនដីធ្លីនៅតំបន់បឹងកក់ អ្នកស្រី ទេព វន្នី និងសកម្មជនបក្សប្រឆាំង១៦នាក់ រួមទាំងតំណាងរាស្ត្រ លោក ហុង សុខហួរ និងលោក អ៊ុំ សំអានផង ត្រូវបានចាប់ឃុំខ្លួន។
ចំណាត់ការនេះ អ្នកឃ្លាំមើលសិទ្ធិមនុស្សធ្លាប់ចេញសេក្តីថ្លែងការណ៍ថ្កោលទោស បក្សកាន់អំណាចថា បានប្រើអំណាចរបស់ខ្លួន ជ្រៀតជ្រែកផ្នែកប្រព័ន្ធតុលាការ និងបានចាត់ទុក អ្នកដែលត្រូវចាប់ខ្លួនទាំងនោះថា ជាអ្នកទោសមនសិការ និងអំពាវនាវឲ្យរដ្ឋាភិបាលដោះលែងពួកគេ ដោយគ្មានលក្ខខណ្ឌ ដើម្បីធានាពីគោលការ សិទ្ធិមនុស្ស និងគោលការប្រជាធិបតេយ្យ។
គួរំឭកថា កាលពីខែមេសាឆ្នាំ២០១៥ ពោលគឺមុនមួយថ្ងៃនៃពិធីបុណ្យចូលឆ្នាំមកដល់ សកម្មជនបក្សប្រឆាំង ព្រះសង្ឃ និងសកម្មជនដីធ្លី សរុប១៩នាក់ ត្រូវបានតុលាការ ដោះលែង ឲ្យនៅក្រៅឃុំបណ្តោះអាសន្ន ក្រោយពីអតីមេដឹកនាំបក្សប្រឆាំង លោក សម រង្ស៊ី និងលោក ហ៊ុន សែន ចរចាត្រូវគ្នា ពីភាពចម្រូងចម្រាសនៃការធ្វើច្បាប់បោះឆ្នោតថ្មី និងកែទម្រង់ក្បាលម៉ាស៊ីនដឹកនាំគ.ជ.ប៕