ក្រុមប្រឹក្សាក្រុងពោធិ៍សាត់របស់បក្សប្រឆាំងបារម្ភថា ពលរដ្ឋនិងព្រះសង្ឃច្រើនពាន់នាក់/អង្គដែលបានចុះឈ្មោះរួចហើយ តាមរយៈលិខិតបញ្ជាក់អត្តសញ្ញាណ អាចនឹងបាត់សិទ្ធិបោះឆ្នោត បើពួកគេមិនបានបំពេញឯកសារឡើងវិញ សម្រាប់បម្រើឲ្យការបោះឆ្នោត ខណៈការបោះឆ្នោតឃុំសង្កាត់កាន់ជិតមកដល់។
ការបោះឆ្នោតជ្រើសរើសក្រុមប្រឹក្សា ឃុំ សង្កាត់ នឹងចាប់ផ្តើមនៅថ្ងៃទី៤ខែមិថុនា ដើមខែក្រោយនេះ។
ក្រុមប្រឹក្សាក្រុងពោធិ៍សាត់ របស់បក្សប្រឆំាង លោក រ៉ែម សាមឿន បានប្រាប់VODដឹងថា ប្រជាពលរដ្ឋជាង១ពាន់នាក់ និងព្រះសង្ឃជាង៤០អង្គ នៅក្នុងខេត្តនេះ បានចុះឈ្មោះបោះឆ្នោតរួចហើយ តាមរយៈលិខិតបញ្ជាក់អត្តសញ្ញាណ(អត់អត្តសញ្ញាណប័ណ្ណ)។
ប៉ុន្តែមន្ត្រីបក្សប្រឆាំងរូបនោះថា អ្នកដែលចុះឈ្មោះនោះ មិនទាន់បានទៅសុំធ្វើឯកសារបញ្ជាក់សម្រាប់បម្រើឲ្យការបោះឆ្នោតទេ ដោយសារអ្នកខ្លះធ្វើការចំណាកស្រុក និងមួយចំនួនទៀតមិនដឹងព័ត៌មានទំាងនេះ។
លោកថា «ចំណាកស្រុកក៏វាជាបញ្ហាចំម្បង ក៏ប៉ុន្តែអ្នកដែលនៅ[ក្នុងស្រុក]គាត់អត់មកតែម្តង សំអាងទៅលើគាត់ចុះឈ្មោះហើយ ដូចខ្ញុំជម្រាបពីខាងដើម ក្នុងនាមខ្ញុំជាតំណាងពលរដ្ឋទូទំាងក្រុងពោធិ៍សាត់ ខ្ញុំបារម្ពទីមួយគាត់ដល់ថ្ងៃនេះ ខ្ញុំបានស៊ិចគ្រប់ស៊ិច ខ្លះមិនទាន់បានមួយនាក់ទេ យើងបារម្ភមែនទែ ខ្លាចបាត់បង់សិទ្ធិ គាត់ស្មានតែអាហ្នឹង[លិខិតបញ្ជាក់អត្តសញ្ញាណសម្រាប់ចុះឈ្មោះបោះឆ្នោត] យកទៅបោះឆ្នោតបាន»។
លើសពីនេះទៀត លោក សាមឿន បានបញ្ជាក់ថា ពលរដ្ឋខ្លះដែលបានទៅធ្វើអត្តសញ្ញាណប័ណ្ណនៅក្រុងច្រើនខែហើយ ប៉ុន្តែអាជ្ញាធរមិនទាន់ប្រគល់ឲ្យនៅឡើយ និងមួយចំនួនទៀតទៅធ្វើក៏មានភាពយឺតយ៉ាវផងដែរ ខណៈការបោះឆ្នោតឃុំ សង្កាត់ នឹងប្រព្រឹត្តទៅនៅដើមខែមិថុនាខាងមុខនេះ។
ស្នងការនគរបាលខេត្តពោធិ៍សាត់ លោក សារុន ចាន់ធី អះអាងថា ក្រុមការងារលោកនឹងអន្តរាគមន៍ករណីនេះ ដោយថា បើមានរបាយការណ៍ជាក់លាក់ពីមន្ត្រីបក្សប្រឆំាងពលរដ្ឋដែលធ្វើអត្តសញ្ញាណប័ណ្ណយូរហើយមិនទាន់ទទួលបាននោះ។
លោកបន្តថា «អ៊ុំណា ពូណា ឬក៏បងប្រុស បងស្រីណា ដែលគាត់ថាបានធ្វើហើយ ប៉ុន្តែគាត់អត់ទាន់បាន ដោយមូលហេតុគេអត់ទាន់ចែកឲ្យគាត់ វាមានរឿងពីរ មួយថាអត្តសញ្ញាណប័ណ្ណមកដល់ហើយ មកដល់ខេត្ត មកដល់ស្រុក មកដល់ឃុំ មកដល់ប៉ុស្តិ៍យើងហើយ ប៉ុន្តែអាជ្ញាធរ ឬប៉ូលីសប៉ុន្តិ៍មិនទាន់ប្រគល់ឲ្យគាត់ រឿងមួយពូនិងដោះស្រាយឲ្យភ្លាម បញ្ជាទៅឥឡូវ ប៉ុន្តែបើសិនជាថាគាត់អត់ទាន់បានអត្តសញ្ញាណប័ណ្ណគេបោះពុម្ពមិនទាន់បានទេ យើងរង់ចំាបន្តិចខាងលើគេដោះស្រាយ គេបោះពុម្ពឲ្យ»។
បើតាម គជប ព្រះសង្ឃជាង៨ពាន់អង្គ បានចុះព្រះនាម ក្នុងបញ្ជីបោះឆ្នោតថ្មី តាមរយៈលិខិតបញ្ជាក់អត្តសញ្ញាណ និងពលរដ្ឋមួយចំនួនទៀត។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា គ.ជ.ប បានជូនដំណឹងជាសាធារណៈរួចហើយ ។លោកបញ្ជាក់ថា ករណីនេះ បើអ្នកចុះឈ្មោះទំាងនោះមិនទទួលបានអត្តសញ្ញាណប័ណ្ណទេ ពួកគេត្រូវទៅធ្វើឯកសារមួយទៀត សម្រាប់បំរើឲ្យការបោះឆ្នោត ទើបមានសិទ្ធិបោះឆ្នោតបាន។
លោក ពុទ្ធា បានពន្យល់ដូចនេះថា «ការបញ្ជាក់អត្តសញ្ញាណមានពីរយ៉ាងសម្រាប់បំរើការនៅក្នុងដំណាក់កាលនេះ ទីមួយសម្រាប់ការចុះឈ្មោះ បើសិនជារយៈពេលហ្នឹង គាត់ទទួលបានអត្តសញ្ញាណប័ណ្ណ សញ្ជាតិខ្មែរ គាត់អាចអត្តសញ្ញាណប័ណ្ណយកទៅបោះឆ្នោតតែម្តង អញ្ចឹងគាត់មានតែសម្រាប់ការចុះឈ្មោះ ខ្វះសម្រាប់ការបោះឆ្នោត ទាល់តែស្នើសុំនៅគណៈកម្មការឃុំ សង្កាត់រៀបចំការបោះឆ្នោតរបស់គាត់ បានឯកសារបញ្ជាក់អត្តសញ្ញាណបម្រើឲ្យការបោះឆ្នោត បើមិនអញ្ចឹង គាត់មិនអាចបោះបានទេ»។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ លោក សំ គន្ធាមី មានប្រសាសន៍ថា ដើម្បីឲ្យអ្នកចុះឈ្មោះបោះឆ្នោត តាមរយៈលិខិតបញ្ជាក់អត្តសញ្ញាណ(អត់អត្តសញ្ញាណប័ណ្ណ) មានសិទ្ធិបោះឆ្នោតបានទំាងអស់គ្នា លុះត្រាតែមន្ត្រី គ.ជ.ប សហការជាមួយអាជ្ញាធរមូលដ្ឋានពន្លឿនដោះស្រាយបញ្ហានេះជូនប្រជាពលរដ្ឋ កុំឲ្យមានភាពស្មុគស្មាញ ទើបទទួលបានផលវិជ្ជមាន។
លោកនិយាយថា «ចង់ឲ្យ គជប សម្រួលម៉ោងធ្វើការតាមរយៈសិច និងឃុំ ពេលណាប្រជាពលរដ្ឋអាចទៅពេលណាម៉ោងធ្វើការ រដ្ឋបាលកុំឲ្យគាត់ទៅពីរដង ទៅជួបសម្រួលឲ្យធ្វើឲ្យគាត់ឲ្យបានលឿន ដើម្បីកុំឲ្យខាត់ពេល សឹងថាមិនបាច់សម្ភាសន៍ផង គ្រាន់តែគាត់បង្ហាញឯកសាររៀបចំទៅ ចេញឲ្យគាត់ទៅ ព្រោះមានឈ្មោះនៅក្នុងបញ្ជីបោះឆ្នោតស្រាប់ហើយ»។
បើតាមលោក សំ គន្ធាមី បានឲ្យដឹងថា អ្នកចុះឈ្មោះរួចហើយ តាមរយៈលិខិតបញ្ជាក់អត្តសញ្ញាណ(អត់អត្តសញ្ញាណប័ណ្ណ)មានប្រហែលជា២ភាគរយនៃចំនួនពលរដ្ឋមានឈ្មោះក្នុងបញ្ជីឈ្មោះបោះឆ្នោតនៅតាមឃុំ-សង្កាត់ទូទាំងប្រទេស។
ចំនួនអ្នកដែលបានចុះឈ្មោះរួចហើយ មានប្រមាណជិត៨លាននាក់(៧.៨៦៥.០៣៣នាក់)៕