កម្ពុជាបានបង្ហាញក្ដីបារម្ភចំពោះភាពតានតឹងនៅឧបទ្វីបកូរ៉េ បន្ទាប់ពីកូរ៉េខាងជើង បានបាញ់សាកល្បងគ្រាប់មីស៊ីលអន្តរទ្វីប កាលពីសប្ដាហ៍មុននេះ។
រដ្ឋាភិបាលក្រុងព្យុងយ៉ាង បានបាញ់សាកល្បងគ្រាប់មីស៊ីលឆ្លងទ្វីបជាថ្មីម្ដងទៀត កាលពីថ្ងៃទី០៤ ខែកក្កដានេះ ដោយមេដឹកនាំរដ្ឋឯកោមួយនេះ បានចាត់ទុកជាជោគជ័យជាលើកដំបូង។
នៅក្នុងសេចក្ដីកាលពីថ្ងៃម្សិលមិញនេះ ក្រសួងការបរទេសកម្ពុជា បាននិយាយថា កម្ពុជាមានក្ដីបារម្ភចំពោះការបាញ់សាកល្បងនេះ ដោយថា បានរំលោភទៅនឹងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
ក្រសួងការបរទេសកម្ពុជា ក៏បានអំពាវនាវទៅដល់កូរ៉េខាងជើង ឲ្យគោរពតាមសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងបំពេញកាតព្វកិច្ចអន្តរជាតិរបស់ខ្លួន។
ជាងនេះ ក្រសួងបានអំពាវនាវទៅគ្រប់ភាគីទាំងអស់ ឲ្យរក្សាភាពអត់ធ្មត់ និងបង្កើតបរិយាកាសដែលនាំទៅរកការចាប់ផ្ដើមជំនួបចរចា ៦ភាគីឡើងវិញ៕