អង្គការមួយដែលធ្វើការផ្នែកប្រឆំាងអំពើពុករលួយបានសហការជាមួយក្រសួងមហាផ្ទៃ បើកវគ្គបណ្តុះបណ្តាលគ្រូបង្គោលជំនាញអភិបាលកិច្ចជាង២០រូប ដោយថាដើម្បីពង្រឹងសមត្ថភាពមន្ត្រីថ្នាក់ជាតិ ថ្នាក់ក្រោមជាតិក្នុងការផ្តល់សេវាជូនប្រជាពលរដ្ឋ និងកាត់បន្ថយអំពើពុករលួយនៅកម្ពុជា។
នាយកប្រតិបត្តិអង្គការតម្លាភាពកម្ពុជាលោក ព្រាប កុល ថ្លែងប្រាប់អ្នកសារព័ត៌មាននៅថ្ងៃទី១១ខែកក្កដា នេះថា អង្គការតម្លភាពកម្ពុជា និងក្រសួងមហាផ្ទៃ បានបើកវគ្គបណ្តុះបណ្តាលគ្រូបង្គោល២៥រូប មកពីរាជធានី ខេត្ត ឲ្យទទួលមានជំនាញអភិបាលកិច្ច ដោយថាបង្កើនសមត្ថភាពមន្ត្រីរាជការ ដែលមានតួនាទីភារកិច្ចផ្តល់សេវាសាធារណៈជូនប្រជាពលរដ្ឋគ្រប់វិស័យទំាងនៅថ្នាក់ជាតិនិងថ្នាក់ក្រោមជាតិ ដើម្បីប្រយុទ្ធប្រឆំាងអំពើពុករលួយឲ្យមានប្រសិទ្ធភាព។
លោកនិយាយថា «គោលបំណងធំដែលយើងធ្វើបញ្ហានេះ ចង់បង្កើនប្រសិទ្ធភាពនៃការផ្តល់សេវាសាធារណៈជូនប្រជាពលរដ្ឋ កន្លងមកមានបញ្ហាលុយក្រោមតុ លើតុ បញ្ហាមានភាពអសកម្មខ្លះ កាលណា យើងអាចកាត់បន្ថយបញ្ហាអសកម្មបាន និងបញ្ហាអំពើពុករលួយបាន សេវាក៏កាន់តែល្អ ប្រជាពលរដ្ឋគាត់ទទួលបានទាន់ពេលវេលា ពេលហ្នឹងអាចធ្វើឲ្យគុណភាពនៃការរស់នៅរបស់ប្រជាពលរដ្ឋក៏ល្អប្រសើឡើង សង្គមយើងក៏កាន់តែមានការអភិវឌ្ឍជឿនលឿនទៅមុខទៀត»។
លោក អ៊ី យូឡាយ ជាមន្ត្រីមកពីសាលាខេត្តកំពត ដែលចូលរួមវគ្គបណ្តុះបណ្តាលនេះ មានប្រសាសន៍ថា វគ្គបណ្តុះបណ្តាលជំនាញអភិបាលកិច្ចធ្វើឲ្យរូបលោកយល់ដឹងច្រើនពីការរងារនេះ។ លោកថាក្រោយពីទទួលបានចំណេះដឹង លោកនឹងយកទៅចែករំលែកបន្តទៅមន្ត្រីថ្នាក់ក្រោមជាតិដែលធ្វើការផ្តល់សេវាសាធារណៈជូនប្រជាពលរដ្ឋ ដើម្បីកាត់បន្ថយភាពក្រីក្រនៅកម្ពុជា។
លោកនិយាយថា «ចប់ពីវគ្គនេះទៅ យើងទទួលបានជំនាញមួយចំនួនពាក់ព័ន្ធនឹងអភិបាលកិច្ចល្អ ហើយពេលដែលយើងត្រឡប់ទៅវិញ គឺយើងធ្វើការបណ្តុះបណ្តាលបន្ត ជាពិសេសដល់រដ្ឋបាលថ្នាក់ ក្រោមជាតិ ពាក់ព័ន្ធនឹងការផ្តល់សេវាសាធារណៈជូនប្រជាពលរដ្ឋ គោលដៅធំបំផុតចង់ពង្រឹងការផ្តល់ សេវារបស់រដ្ឋបាលថ្នាក់ក្រោមជាតិឲ្យកាន់តែប្រសើឡើងថែមទៀត មានន័យថាយើងពង្រឹងគុណភាព ផ្តល់សេវា ដើម្បីឲ្យអ្នកទទួលសេវាគាត់ពេញចិត្ត ហើយពិសេសចូលរួមកាត់បន្ថយភាពក្រីក្រ»។
រដ្ឋលេខាធិការក្រសួងមហាផ្ទៃ និងជាប្រធានគណៈគ្រប់គ្រងសាលា លោក ងី ច័ន្ទ្រផល បានថ្លែងថា វគ្គបណ្តុះបណ្តាលគ្រូបង្គោលជំនាញអភិបាលកិច្ចនេះនឹងជួយពង្រឹងសមត្ថភាពមន្ត្រីថ្នាក់ជាតិ និងថ្នាក់ក្រោមជាតិ ស្របតាមយុទ្ធសាស្ត្រចតុកោណរបស់រដ្ឋាភិបាល។
នៅពេលសួរថា វគ្គបណ្តុះបណ្តាលនេះ អាចជាមូលដ្ឋានគ្រឹះជួយកាត់បន្ថយភាពក្រីក្រ និងអំពើពុករលួយនៅកម្ពុជាបានដែរ ឬទេ?
លោក ច័ន្ទ្រផល ឆ្លើយយ៉ាងខ្លីថា ការពង្រឹងជំនាញអភិបាលកិច្ចនេះនឹងធ្វើឲ្យកាត់បន្ថយអំពើពុករលួយគ្រប់រូបភាពនៅកម្ពុជា។
លោកមានប្រសាសន៍ថា «អំពើពុករលួយនៅក្នុងឯកជនក៏មាន នៅក្នុងគ្រួសារក៏មាន រដ្ឋាភិបាលក៏មាន រដ្ឋបាលថ្នាក់ក្រោមជាតិក៏មាន សង្គមស៊ីវិលក៏មាន គណបក្សនយោបាយក៏មានទំាងអស់ហ្នឹង ទំាងអស់ ហ្នឹង ប៉ុន្តែបញ្ហានេះដែលយើងត្រូវដោះស្រាយ អត់ត្រូវចង្អុលថាអ្នកនេះខុស អ្នកនេះត្រូវ នាំគ្នាបង្កើតអភិបាលកិច្ច ពង្រឹងគុណធម៌ សីលធម៌នៃការធ្វើការ អ្វីៗត្រូវដោះស្រាយបាន»។
បើតាមលោក ព្រាប កុល អង្គការតម្លាភាពបានចុះហត្ថលេខាលើអនុស្សរណៈយោគយល់គ្នាជាមួយក្រសួងមហាផ្ទៃ ដោយមានអាយុកាល៥ឆ្នាំ ចាប់ពីឆ្នាំ២០១៦ដល់ឆ្នាំ២០២០ ដើម្បីបង្កើតសាលាអភិបាលកិច្ចសម្រាប់កសាងសមត្ថភាពក្នុងការពង្រឹងការផ្តល់សេវាសាធារណៈឲ្យកាន់តែមានប្រសិទ្ធិភាពខ្ពស់ ទូលំទូលាយនៅទូទំាង ប្រទេសកម្ពុជា។
របាយការណ៍ឆ្នាំ២០១៥ របស់អង្គការតម្លាភាពកម្ពុជាស្តីពីអំពើពុករលួយបង្ហាញថាប្រទេសកម្ពុជានៅតែស្ថិតនៅក្នុងចំណោមបណ្តាប្រទេសដែលមានស្ថានភាពអំពើពុករលួយធ្ងន់ធ្ងរដោយសារតែប្រព័ន្ធយុត្តិធម៌និងនីតិរដ្ឋកម្ពុជានៅទន់ខ្សោយ។ បើតាមរបាយការណ៍នោះក្នុងចំណោមប្រទេស១៦៨ កម្ពុជាស្ថិតនៅចំណាត់ថ្នាក់ទី១៥០ ដោយទទួលបានពិន្ទុ២១លើ១០០ ដែលយោងតាមសន្ទស្សន៍នៃការសិក្សាមានន័យថាកម្ពុជានៅតែស្ថិតក្នុងក្រុមប្រទេសដែលមានអំពើពុករលួយធ្ងន់ធ្ងរ៕
