ក្រោយពីសម្រេចលើកលែងការចោទប្រកាន់លើអ្នកស្រី អ៊ឹម ចែម សាលាក្ដីខ្មែរក្រហមបានចេញសេចក្ដី ប្រកាសថ្មីមួយទៀត បញ្ជាក់ពីមូលហេតុ នៃការទម្លាក់ចោលការចោទប្រកាន់នោះ។
ក្នុងសេចក្ដីប្រកាសព័ត៌មានចេញផ្សាយនៅថ្ងៃទី១០កក្តដាឆ្នាំ២០១៧ សហចៅក្រមស៊ើបអង្កេតនៃសាលាក្ដីខ្មែរក្រហម (ស.ច.ស) អះអាងថា ការលើកលែងការចោទប្រកាន់លើអ្នកស្រី អ៊ឹម ចែម គឺដោយសារជនសង្ស័យមិនស្ថិតក្រោមយុត្តាការ ឬដែនសមត្ថកិច្ចរបស់សាលាក្ដីខ្មែរក្រហម។
បើតាមសេចក្ដីប្រកាសព័ត៌មានដដែល សហចៅក្រមស៊ើបអង្កេតយល់ឃើញថា អ្នកស្រី អ៊ឹម ចែម មិនមែនជាមេដឹកនាំជាន់ខ្ពស់ក្នុងរបបខ្មែរក្រហម ដោយថា អ្នកស្រីនៅតែមានសិទ្ធិទទួលបានការសន្មត់ថាគ្មានទោស ព្រោះមិនមានភស្ដុតាងគ្រប់គ្រាន់អាចបញ្ជាក់ថា អ្នកស្រីគួរត្រូវបានសាសាក្ដីបន្ដបទចោទប្រកាន់ឡើយ។
សាលាក្ដីខ្មែរក្រហមសម្រេចលើកលែងការចោទប្រកាន់លើអ្នកស្រី អ៊ឹម ចែម គឺពិចារណាលើភ័ស្តុតាង របាយការណ៏១៩៩៧និង១៩៩៨របស់មជ្ឈមណ្ឌលឯកសារកម្ពុជា និងរបាយការណ៍ឆ្នាំ១៩៤៤របស់ រដ្ឋាភិបាល ដោយពិនិត្យឃើញថា ចំនួនជនរងគ្រោះនៅក្នុងរបាយការណ៏ទាំងនោះមិនអាចទុកចិត្តបានទេ ហើយមានតម្លៃភ័ស្តុតាងតិចតួច។
មួយផ្នែកទៀតដែលសាលាក្ដីខ្មែរក្រហមសន្និដ្ឋានថាអ្នកស្រី អ៊ឹម ចែម ស្ថិតនៅក្រៅយុត្តាធិការបុគ្គល របស់អង្គជំនុំជម្រះវិសាមញ្ញក្នុងតុលាការកម្ពុជា គឺសាលាក្ដីពិចារណាលើភ័ស្តុតាងពាក់ព័ន្ធនឹងទីតាំង ឧក្រិដ្ឋកម្មដែលគាត់ត្រូវបានដាក់ឲ្យស្ថិតក្រោមការពិនិត្យ និងភ័ស្តុតាងពាក់ព័ន្ធនឹងទីតាំងចោទប្រកាន់ ផ្សេងទៀតដោយរកឃើញថា អ្នកស្រី អ៊ឹម ចែម មិនមែនជាមេដឹកនាំជនខ្ពស់ ហើយក៏មិនមែនជាអ្នកទទួលខុសត្រូវខ្ពស់បំផុតនោះដែរ។
គួរបញ្ជាក់ថា ពាក់ព័ន្ធនឹងសំណុំរឿង០០៤នេះ ក្រៅពីអ្នកស្រី អ៊ឹម ចែម ក៏មានជនត្រូវចោទ២នាក់ផ្សេងទៀតកំពុងស្ថិតនៅក្រោមការស៊ើបសួររបស់ចៅក្រមស៊ើបអង្កេត គឺមានលោក អោ អាន និងលោក យឹម ទិត្យ។
លោក អោ អាន ត្រូវបានសហចៅក្រមស៊ើបអង្កេតអន្តរជាតិ ដាក់ឲ្យស្ថិតនៅក្រោមការត្រួតពិនិត្យនៅថ្ងៃទី២៧ ខែមីនា ឆ្នាំ២០១៥។ ចំណែក លោក យឹម ទិត្យ ឲ្យស្ថិតនៅក្រោមការពិនិត្យនៅថ្ងៃទី៩ ខែធ្នូ ឆ្នាំ២០១៥៕