ក្រសួងអប់រំសង្ឃឹមថា យុទ្ធនាការរៀនធ្វើជំនួញ ដែលគ្រោងរៀបចំឡើងនៅពេលខាងមុខ នឹងបង្ហាត់យុវជនកម្ពុជា ដើម្បីត្រៀមខ្លួនរួចជាស្រេចសម្រាប់ទីផ្សារការងារ។
នៅក្នុងសេចក្តីប្រកាសព័ត៌មាននៅថ្ងៃទី១១សីហា ក្រសួងអប់រំ យុវជន និងកីឡា នឹងរៀបចំយុទ្ធនាការរៀនធ្វើជំនួញ (#GoBusiness17) ដើម្បីបង្កើនការយល់ដឹងរបស់យុវជនកម្ពុជា អំពីសហគ្រិនភាព នឹងដើម្បីបញ្ចូលការអប់រំ អំពីសហគ្រិនភាពទៅក្នុងកម្មវិធីសិក្សាថ្នាក់ជាតិ។
ក្រសួងនឹងកៀរគរយុវជនកម្ពុជាចំនួន៣ ០០០នាក់ អាយុចាប់ពី១៥ដល់២៩ឆ្នាំ ឲ្យចូលរួមក្នុងវគ្គបណ្តុះបណ្តាលសហគ្រិនភាព ដែលក្រសួងថា នេះជាការប៉ុនប៉ងជាផ្លូវការ ដើម្បីបំបែកកំណត់ត្រាពិភពលោក នៅថ្ងៃទី២៤ខែសីហាឆ្នាំ២០១៧ នៅរាជធានីភ្នំពេញ។
រដ្ឋមន្រី្ដក្រសួងអប់រំ ត្រូវបានដកស្រង់សម្តីថា «ព្រឹត្តិការណ៏នេះ មិនត្រឹមតែជាឱកាស សម្រាប់យុវជនវ័យក្មេងទទួលបានការបណ្តុះបណ្តាល និងចំណេះដឹងពីភាពជាសហគ្រិនប៉ុណ្ណោះទេ ប៉ុន្តែវាក៏អាចជួយដល់ក្រសួងអប់រំ យុវជន និងកីឡា ដើម្បីបំបែកកំណត់ត្រាពិភពលោកផងដែរ»។
បើតាមសេចក្តីប្រកាស យុទ្ធនាការរៀនធ្វើជំនួញ ជាយុទ្ធនាការលើកកម្ពស់ការយល់ដឹងរបស់យុវជនក្នុងប្រទេសកម្ពុជា ស្ដីអំពីសហគ្រិនភាព ជំរុញកិច្ចសហការ និងការសម្របសម្រួលរវាងវិស័យនានាក្នុងការគាំទ្រដល់សហគ្រិនវ័យក្មេង៕