លោកនាយករដ្ឋមន្ត្រី ហ៊ុន សែន ណែនាំដល់ប្រធានរាជបណ្ឌិត្យសភាថ្មី ដោយថា ក្រោយពេលចូលកាន់តំណែង សូមកុំតាំងខ្លួនថា អ្នកចេះមានតែឯង ដែលនេះនឹងធ្វើឲ្យបែកបាក់សាមគ្គីផ្ទែក្នុង ហើយការដឹកនាំ នឹងមិនបានជោគជ័យ។
ក្នុងពិធីប្រកាសនិងផ្ទេរតំណែងប្រធានរាជបណ្ឌិត្យសភាកម្ពុជានាថ្ងៃទី១១ខែសីហានេះ លោកនាយករដ្ឋមន្ត្រី ហ៊ុន សែន ថ្លែងថា ដើម្បីឲ្យស្ថាប័នរាជបណ្ឌិត្យសភាកាន់តែខ្លាំងនោះ លោកថា ត្រូវចេះសាមគ្គីគ្នា ធ្វើការរួមគ្នា ដោយបែងចែងតួនាទីឲ្យបានច្បាស់លាស់និងចេះរៀនសូត្រពីគ្នាទៅវិញទៅមក។ លោកថ្លែងទៀតថា ប្រសិនបើលោក សុខ ទូច តាំងខ្លួនថា អ្នកចេះមានតែឯង នោះលោកនឹងក្លាយជាមនុស្សឯកោ។
លោកថ្លែងថា៖ «ចំណុចនេះ ត្រូវយល់ឲ្យបានច្បាស់ ភាពពើងទ្រូង…កាន់តែឡើងខ្ពស់កាន់តែដាក់ខ្លួន…ពើងទ្រូងក្រអឺតក្រទម នឹងនាំទៅរកភាពឯកោខ្លួនតែប៉ុណ្ណោះ ចុងបំផុតដល់ពេលចុះនរក គឺចុះ តែឯងទេ គ្មាននរណាគេ ចុះជាមួយ ព្រោះយើងអត់បានរួមសុខរួមទុកជាមួយគេឯណា។…ធ្វើជាមេដឹកនាំមិនថា កន្លែងនេះ រាជបណ្ឌិត្យសភា ឬនៅកន្លែងណាទេ ត្រូវចាំ ភាពក្រអឺតក្រទម ឬតាំងខ្លួនជាអ្នក ដែលចេះដឹង លើសគេ លើសឯង វានឹងបង្កើត បាននៅស្ថានភាព ដែលហៅថាការបង្កើតស្វ័យឯកោតែម្ដង»។
បន្ថែមពីការរំលឹកពីលោកនាយករដ្ឋមន្ត្រីនៅថ្ងៃនេះ លោក សុខ ទូច បានឡើងប្ដេជ្ញាថានឹងពង្រឹងសាមគ្គីផ្ទៃក្នុង និងធ្វើឲ្យស្ថាប័នរាជបណ្ឌិត្យសភា ក្លាយទៅជាប្រភពយុទ្ធសាស្ត្រផ្ដល់ដល់រដ្ឋាភិបាល។
លោកមានប្រសាសន៍ថា៖ «គួរកត់សម្គាល់ថា កងទ័ពខ្លាំង ត្រូវមានទាហានស្ម័គ្រត្រង់ មោះមុត អង់អាចក្លាហាន បំពេញភារកិច្ចនិងតួនាទីរៀងៗខ្លួន ឯមេទ័ពត្រូវមានគុណធម៌ ចក្ខុវិស័យ យុទ្ធសាស្ត្រក្ដាប់ឲ្យបានព័ត៌មានគ្រប់ជ្រុងជ្រោយ ដូចពាក្យមួយថាដឹក១០០ដង ច្បាំង១០០ដង ឈ្នះ១០០ដង ការដែលមិនដឹងព័ត៌មាន គឺជាភាពគ្រោះថ្នាក់ សម្រាប់អ្នកដែលរៀបចំយុទ្ធសាស្ត្រ»។
អ្នកឃ្លាំមើលពីការអភិវឌ្ឍសង្គម លោក ប៊ូ បញ្ញា ស្វាគមន៍ចំពោះការណែនាំរបស់លោកនាយកមន្ត្រីដល់លោក សុខ ទូច ប៉ុន្តែលោកថា រដ្ឋាភិបាលគួរតែជំរុញឲ្យមន្ត្រីទាំងអស់នោះគោរពច្បាប់ប្រទេសជាតិ ទើបជាការប្រសើរ។
លោកថា៖ «ខ្ញុំគិតថា ប្រទេសកម្ពុជា នឹងមានការផ្លាស់ប្ដូរមុខមាត់ថ្មី បើសិនជាអនុសាសន៍ របស់លោកនាយករដ្ឋមន្រ្តី មានការធ្វើ អនុវត្តតាម ហើយនឹងជាពិសេស លោកខ្លួនឯង ក៏គួរតែពិចារណានៅស្ដីដែលគាត់លើកឡើងដែរ»។
នៅក្នុងព្រះរាជក្រឹត្យដែលចុះហត្ថលេខាដោយប្រមុខរដ្ឋស្ដីទី លោក សាយ ឈុំ កាលពីថ្ងៃទី២៩ខែកក្កដា លោក សុខ ទូច ត្រូវបានដំឡើងពីអនុប្រធាន ទៅជាប្រធានរាជបណ្ឌិតសភា្យកម្ពុជា ជំនួសលោកស្រី ខ្លូត ធីតា ទៅតាមការស្នើសុំរបស់លោកនាយករដ្ឋមន្ត្រី ហ៊ុន សែន។
សាស្ត្រាចារ្យវិទ្យាសាស្ត្រនយោបាយ លោក សុខ ទូច ត្រូវបានតែងតាំងជាប្រធានរាជបណ្ឌិត្យសភាកម្ពុជានៅចុងខែកក្កដា តែជាងមួយសប្ដាហ៍ប៉ុណ្ណោះ បន្ទាប់ពីលោកថ្លែងគាំទ្រសំណើធ្វើវិសោធនកម្មច្បាប់គណបក្សនយោបាយដ៏ចម្រូងចម្រាស់។
ក្រៅពីគាំទ្រសំណើវិសោធនកម្មច្បាប់នេះហើយ លោក សុខ ទូច កាលពីថ្ងៃទី២០ខែកក្កដាកន្លងទៅ មានបំណងចង់ឲ្យមានច្បាប់ហាមឃាត់ការប្រើពាក្យមួយចំនួន ដូចជា ពាក្យ “សង្គ្រោះ” និងពាក្យ “បដិវត្តន៍” ជាដើម៕
