គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសថា មានប្រជាពលរដ្ឋជាង ១លាន ៥២ម៉ឺននាក់ បានទៅចុះឈ្មោះបោះឆ្នោតនៅក្នុងរយៈពេល ១០ថ្ងៃដំបូងនៃដំណើរការចុះឈ្មោះបោះឆ្នោតនៅទូទាំងប្រទេស។
ផ្អែកតាមប្រតិទិនរបស់ខ្លួន គ.ជ.ប បាននឹងកំពុងរៀបចំចុះឈ្មោះបោះឆ្នោតប្រជាពលរដ្ឋរៀងរាល់ថ្ងៃ ចាប់ពីដើមខែកញ្ញានេះ រហូតដល់ចុងខែវិច្ឆិកាខាងមុខ ក្នុងការចុះឈ្មោះក៏នឹងត្រូវធ្វើនៅថ្ងៃឈប់សម្រាកបុណ្យភ្ជុំបិណ្ឌផងដែរ។
យោងតាមលទ្ធផលបណ្ដោះអាសន្ននៃការចុះឈ្មោះបោះឆ្នោត ចេញផ្សាយនៅព្រឹកថ្ងៃនេះ គ.ជ.ប ចុះបញ្ជីប្រជាពលរដ្ឋបានជាង ១លាន ៥២ម៉ឺននាក់ ឬស្មើនឹងជិត ១៦ភាគរយនៃចំនួនពលរដ្ឋគ្រប់អាយុបោះឆ្នោតសរុបជាង ៩លាន ៦៦ម៉ឺននាក់នៅទូទាំងប្រទេស។
យោងតាមរបាយការណ៍ គ.ជ.ប ចំនួនអ្នកចុះឈ្មោះបោះឆ្នោតនេះបានកើនឡើងពីចំនួនជាង ១លាន ៣៩ម៉ឺននាក់ កាលពីថ្ងៃទី០៩ ខែកញ្ញា ដល់ជាង ១លាន ៥២ម៉ឺននាក់ កាលពីថ្ងៃម្សិលមិញ៕