កូរ៉េខាងជើង បានព្រមាននៅថ្ងៃថា ខ្លួននឹងផ្ដល់ «ភាពឈឺចាប់ធំបំផុត» ទៅលើអាមេរិក ប្រសិនបើក្រុងវ៉ាស៊ីងតោន បន្តជំរុញអង្គការសហប្រជាជាតិ ឲ្យដាក់ទណ្ឌកម្មកាន់តែធ្ងន់ធ្ងរឡើងលើក្រុងព្យុងយ៉ាង ក្រោយការធ្វើតេស្តសាកល្បងគ្រាប់បែកនុយក្លេអ៊ែរលើកទី៦។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ការធ្វើតេស្តសាកល្បងគ្រាប់បែកនុយក្លេអ៊ែរកាលពីថ្ងៃទី០៣ ខែកញ្ញាកន្លងមកនេះ បង្កឲ្យមានប្រតិកម្មខ្លាំងក្លាបំផុតពីអន្តរជាតិទៅលើក្រុងព្យុងយ៉ាង ដោយក្រុមប្រឹក្សាសន្តិសុខអង្គការសហប្រជាជាតិ កំណត់ជួបប្រជុំដើម្បីសម្រេចលើទណ្ឌកម្មថ្មី ដែលស្នើឡើងដោយអាមេរិក។ ទណ្ឌកម្មថ្មីនោះ ត្រូវបានគេជឿថា ជាទណ្ឌកម្មតឹងតែងបំផុតត្រូវបានដាក់ទៅលើរដ្ឋឯកោមួយនេះ។
អាមេរិកកំពុងតែអំពាវនាវឲ្យដាក់ទណ្ឌកម្មលើការនាំចូលប្រេងទៅកូរ៉េខាងជើង និងបង្កកទ្រព្យសម្បត្តិមេដឹកនាំកូរ៉េខាងជើងលោក គីម ជុងអ៊ុន ព្រមទាំងបញ្ចប់ការនាំចូលក្រណាត់ និងការផ្ដល់ប្រាក់ឈ្នួលទៅដល់កម្មករកូរ៉េខាងជើង។
ក្រុងវ៉ាស៊ីងតោនចង់ឲ្យក្រុមប្រឹក្សាសន្តិសុខអង្គការសហប្រជាជាតិបោះឆ្នោតនៅថ្ងៃចន្ទនេះ ដើម្បីដាក់ទណ្ឌកម្ម បើទោះបីជាមានការជំទាស់ពីក្រុងប៉េកាំង និងក្រុងមូស្គូទៅនឹងវិធានការថ្មីនេះក៏ដោយ។
ឆ្លើយតបនឹងវិធានការនេះ ប្រព័ន្ធផ្សព្វផ្សាយរដ្ឋកូរ៉េខាងជើង បានផ្សាយថា ចំណាត់ការរបស់ក្រុងព្យុងយ៉ាងនាពេលខាងមុខ នឹងផ្ដល់មេរៀនឈឺចាប់បំផុតដល់អាមេរិក៕