លោក បារ៉ាក់ អូបាម៉ា ប្រធានាធិបតីជិតផុតអាណត្តិនិងលោក ដូណាល់ ត្រាំ ជិតចូលជំនួសតំណែងនេះនៅដើមឆ្នាំក្រោយ បានពិភាក្សាគ្នាយ៉ាងល្អរយៈពេល៩០នាទី នៅសេតវិមានកាលពីថ្ងៃព្រហស្បតិ៍ម្សិលមិញ ផ្តោតលើដំណើរការលទ្ធិប្រជាធិបតេយ្យ។
ស្របពេលដែលមានការតវ៉ាប្រឆាំង លោក ត្រាំ ផ្ទុះឡើងស្ទើរពាសពេញសហរដ្ឋអាមេរិកក្រោយការបោះឆ្នោត បណ្តាលឲ្យសហគមន៍អន្តរជាតិព្រួយបារម្ភពីការប៉ះពាល់ដល់សណ្តាប់ធ្នាប់ពិភពលោកនោះ លោក អូបាម៉ា និង លោក ត្រាំ ពួកគេប្តេជ្ញានឹងរៀបចំការផ្តាស់ប្តូរអំណាចឲ្យបានប្រសើរបំផុត។ នេះបើតាមទីភ្នាក់ងារសារព័ត៌មានAFP។
ប្រធានាធិបតីជិតផុតអាណត្តិនិងអ្នកស្នងតំណែង បានជួបប្រជុំគ្នាក្នុងបន្ទប់តែ២នាក់នៅក្នុងការិយាល័យ Oval។ លោក អូបាម៉ា ថ្លែងថា ការជួបគ្នានេះគឺមានលទ្ធផលល្អប្រសើរបំផុត បន្ទាប់មកពួកគេទាំងពីថ្លែងសារទៅកាន់អ្នកចូលរួមជាសាធារណៈដែលគួរឲ្យចាប់អារម្មណ៍៕