សមត្ថកិច្ចអះអាងថាបុរសជាជនសង្ស័យពីរនាក់ដែលរងការចោទថា បានបង្កើតហ្វេសបុកក្លែងក្លាយ ដោយប្រើឈ្មោះលោកនាយករដ្ឋមន្ត្រី ហ៊ុន សែន អាចប្រឈមនឹងជាប់ពន្ធនាគារពី៥ទៅ១០ឆ្នាំ។
តាមគេហទំព័រអគ្គស្នងការដ្ឋាននគរបាលជាតិបានបញ្ជាក់ថា ជនសង្ស័យ២នាក់ មានឈ្មោះ ឈួន សារុន និងឈ្មោះ សួន ចាន់រតនា ដែលកងកម្លាំងនគរបាលឃាត់ខ្លួនបាន ពីបទក្លែងបន្លំ Facebook ប្រើឈ្មោះលោក ហ៊ុន សែន អាចនឹងជាប់ពន្ធនាគារពី៥ទៅ១០ឆ្នាំ និងមានការពិន័យជាប្រាក់មួយចំនួនទៀត។
នៅក្នុងឱកាសធ្វើសន្និសិទសារព័ត៌មានបង្ហាញខ្លួនជនសង្ស័យទាំងពីររូបនាល្ងាចថ្ងៃទី១០ ខែវិច្ឆិកា ឆ្នាំ២០១៦នេះ នៅអគ្គស្នងការដ្ឋាននគរបាលជាតិ ព្រះរាជអាជ្ញារង សៀង សុខ ថ្លែងថា ជនសង្ស័យមានការបន្លំដោយចេតនា ធ្វើឲ្យសាធារណជនយល់ច្រឡំ។ នេះបើតាមអគ្គស្នងការដ្ឋាននគរបាលជាតិ។
បុរសទាំងពីរត្រូវសមត្ថកិច្ចចាប់ខ្លួនក្នុងទីតាំងផ្សេងគ្នាគឺ ឈ្មោះឈួន សារុន អាយុ៣៩ឆ្នាំ ជាបុគ្គលិកស្ថាប័នមីក្រូហិរញ្ញវត្ថុមួយក្នុងរាជធានីភ្នំពេញសមត្ថកិច្ចចាប់ខ្លួនកាលពីថ្ងៃទី៩ ខែវិច្ឆិកា និងឈ្មោះ សួន ចាន់រតនៈ អាយុ២៤ឆ្នាំ ជាជាងជួសជុលទូរសព្ទ ត្រូវសមត្ថកិច្ចចាប់ខ្លួនកាលពីថ្ងៃទី១០ ខែវិច្ឆិកា នៅក្នុងរាជធានីភ្នំពេញ៕