ក្រសួងមហាផ្ទៃណែនាំឲ្យកម្លាំងត្រៀមឯកសណ្ឋាន​ប្រយុទ្ធថ្ងៃសវនាការរំលាយបក្សប្រឆាំង

ដោយ លោក ពេជ្រ ចំរុង​​ | ថ្ងៃសៅរ៍ ទី១១ ខែវិច្ឆិកា ឆ្នាំ២០១៧​ ម៉ោង 9:36 AM | នយោបាយ | 0 | 11265 កម្លាំងប្រដាប់អាវុធរារាំងការប្រឆាំង

រដ្ឋាភិបាល​ប្រកាសបន្ថែមកម្លាំងការពារសន្ដិសុខ និងត្រៀមឯកសណ្ឋាន​សម្រាប់លក្ខណៈប្រយុទ្ធ ខណៈតុលាការកំពូល នឹងបើកសវនការលើសំណុំរឿងរំលាយគណបក្សប្រឆាំង។

ក្នុងសេចក្ដីជូនដំណឹង ចេញផ្សាយនៅថ្ងៃទី៨ខែវិច្ឆិកាឆ្នាំ២០១៧ ក្រសួងមហាផ្ទៃ បានបញ្ជាឲ្យនាយកដ្ឋានសណ្ដាប់ធ្នាប់សាធារណៈ បន្ថែមកម្លាំងការពារសន្ដិសុខ និងយាមល្បាត សម្រាប់រយៈពេល៣ថ្ងៃ ពីថ្ងៃទី១៥ ដល់ថ្ងៃទី១៧ខែវិច្ឆិកា ចំពេលតុលាការ នឹងបើកសវនាការលើសំណុំរឿងរំលាយគណបក្សសង្គ្រោះជាតិ តាមបណ្ដឹងរបស់ក្រសួងមហាផ្ទៃ។

បើតាមជូនដំណឹងនោះ ក្រសួងមហាផ្ទៃ បញ្ជាឲ្យ កម្លាំងនគរបាលប្រមូលផ្ដុំ ត្រៀមអនុវត្តតាមបទបញ្ជា ក្នុងករណីចាំបាច់ ហើយក្រុមប្រចាំការ ត្រូវតម្រូវឲ្យស្លៀកពាក់ឯកសណ្ឋានត្រៀមប្រយុទ្ធ និងត្រូវធ្វើរបាយការណ៍ស្ដីពីសភាពការណ៍នានា ជូនទៅនាយកដ្ឋានកណ្ដាលសណ្ដាប់ធ្នាប់សាធារណៈ។

បើតាមការគ្រោងទុកនោះ នៅថ្ងៃទី១៦ខែវិច្ឆិកាខាងមុខនេះ តុលាការកំពូលនឹងបើកសវនការ តាមបណ្តឹងរបស់ក្រសួង​មហាផ្ទៃ ដែល​ប្តឹង​សុំ​ឲ្យរំលាយគណបក្សសង្គ្រោះជាតិ។ ករណីនេះ គណបក្សសង្គ្រោះជាតិ ថា ​ខ្លួនមិនដាក់ឯកសារ​តតាំង​​ក្តីនៅ​តុលាការនោះទេ ដោយថា នេះជារឿងនយោបាយ និងចាំដោះស្រាយតាមផ្លូវនយោបាយ។

សហគមន៍អន្តរជាតិ ជាពិសេសប្រទេសមហាអំណាចខាងលោកសេរី បានថ្កោលទោសជាបន្តបន្ទាប់ ជុំវិញការឃុំខ្លួនមេបក្សប្រឆាំង និងការប៉ុនប៉ង រំលាយគណបក្សនេះ ហើយពួកគេព្រមានពីហានិភ័យនានា នៃការដើរថយក្រោយនៃលទ្ធិប្រជាធិបតេយ្យនៅកម្ពុជា។ ប៉ុន្តែ ភាគីរដ្ឋាភិបាល ជាញឹកញ៉ាប់ ហៅសកម្មភាពទាំងនោះ គឺគ្រាន់ជាការអនុវត្តច្បាប់តែប៉ុណ្ណោះ៕

 

សរសេរមកកាន់ លោក ពេជ្រ ចំរុង តាមរយៈ chamrong@vodhotnews.com

Loading...

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required