អគ្គនាយកដ្ឋានពន្ធដារកម្ពុជា បានប្រកាសថា ខ្លួនប្រមូលពន្ធអាករបានជិត ២ពាន់លានដុល្លារ នៅក្នុងរយៈពេល ១១ខែ នៃឆ្នាំ២០១៧នេះ ដោយបានកើនឡើងជិត ៣០ភាគរយ បើធៀបទៅនឹងចំណូលពន្ធដារយៈពេលដូចគ្នាក្នុងឆ្នាំមុន។
ក្នុងសេចក្ដីប្រកាសព័ត៌មាននៅថ្ងៃនេះ អគ្គនាកយកដ្ឋានពន្ធដារ បានឲ្យដឹងថា ថវិកាពន្ធអាករ ១៨២៧លាន ៦៣ម៉ឺនដុល្លារ ត្រូវប្រមូលបាននៅក្នុងរយៈពេល ១១ខែ ឆ្នាំ២០១៧នេះ ដោយបានកើនឡើង ២៩.៧៥ភាគរយ បើធៀបទៅនឹងរយៈពេល ១១ខែឆ្នាំ២០១៦កន្លងមក។
អគ្គនាយកដ្ឋានពន្ធដារ បានអះអាងថា ប្រាក់ចំណូលពន្ធអាករកើនឡើងខ្ពស់បែបនេះ ដោយសារតែកំណើនពន្ធអាករស្ទើគ្រប់ប្រភេទ ដោយពន្ធលើប្រាក់ចំណូលកើនឡើង ៣១.១ភាគរយ ពន្ធលើប្រាក់បៀវត្សរ៍កើនឡើង ៨.៦ភាគរយ និងអាករលើតម្លៃបន្ថែមកើនឡើង ២៩.៨ភាគរយ ខណៈដែលអាករពិសេសកើនឡើង ១៥ភាគរយ។
អគ្គនាយកដ្ឋានពន្ធដារ បានអះអាងថា ការប្រមូលពន្ធអាករគ្រប់ប្រភេទ បានកើនឡើងលើសពីការរំពឹងទុកដល់ទៅ ១០៦.៥២ភាគរយ។
អគ្គនាយកដ្ឋានពន្ធដារ បានឲ្យដឹងបន្ថែមថា សម្រាប់ថវិកាពន្ធអាករនៅខែវិច្ឆិកាកន្លងមក ស្ថាប័ននេះបញ្ជាក់ថា ប្រមូលបានជាង ១៤៣លានដុល្លារផងដែរ៕
