គណបក្សសង្គ្រោះជាតិ នៅរសៀលថ្ងៃនេះ បានសម្រេចប្រគល់សិទ្ធិទៅលោក កឹម សុខា ដឹកនាំជាបណ្ដោះអាសន្ន មុននឹងមានការជ្រើសរើសប្រធានថ្មី។
លោក សម រង្ស៊ី បានប្រកាសលាលែងពីតំណែងជាប្រធានគណបក្សសង្គ្រោះជាតិ កាលពីថ្ងៃម្សិលមិញនេះ ដោយគ្រាន់តែបញ្ជាក់ប្រាប់ថា ដោយសារតែមូលហេតុផ្ទាល់ខ្លួន។
ការសម្រេចចិត្តបែបនេះរបស់លោក សម រង្ស៊ី បានជំរុញឲ្យមានការកោះប្រជុំសមាជិកគណៈកម្មាធិការនាយករបស់គណបក្សសង្គ្រោះជាតិនៅថ្ងៃនេះ។
គណបក្សប្រឆាំងដ៏ធំមួយនេះ បាននិយាយក្នុងសេចក្ដីប្រកាសព័ត៌មានមួយនៅថ្ងៃនេះថា គណបក្សទទួលយកពាក្យលាលែងពីតំណែងរបស់លោក សម រង្ស៊ី និងសម្រេចប្រគល់សិទ្ធិទៅអនុប្រធានគណបក្ស លោក កឹម សុខា ឲ្យទទួលតួនាទីជាប្រធានស្ដីទី មុននឹងគណបក្សនេះជ្រើសរើសបានប្រធានថ្មី។
ទោះជាយ៉ាងណា ការសម្រេចចិត្តបែបនេះរបស់លោក សម រង្ស៊ី កើតឡើង ១១ថ្ងៃក្រោយពីលោក ហ៊ុន សែន គំរាមកែប្រែច្បាប់គណបក្សនយោបាយ ដែលត្រូវបានគេមើលឃើញជាការប៉ុនប៉ងដើម្បីបិទផ្លូវនយោបាយរបស់មេបក្សប្រឆាំងរូបនេះ៕
