ទីភ្នាក់ងារព័ត៌មានបារាំង AFP បានរាយការណ៍ថា ប្រធានធិបតីកូរ៉េខាងត្បូង លោក មូន ជែអ៊ីន បានអង្គុយនៅជិតនឹងប្អូនស្រីមេដឹកនាំកូរ៉េខាងជើង លោក គីម ជុងអ៊ុន នៅក្នុងពិធីប្រគុំតន្ត្រីរបស់ក្រុមតន្ត្រីករមកពីទីក្រុងព្យុងយ៉ាងនៅទីក្រុងសេអ៊ូល ខណៈដែលក្រុមបាតុករអភិរក្សនិយម បានដុតទង់ជាតិកូរ៉េខាងជើងនៅខាងក្រៅពិធីកាលពីថ្ងៃម្សិលមិញនេះ។
កម្មវិធីប្រគុំតន្ត្រីនោះ គឺជាការរៀបចំដ៏សំខាន់លើកចុងក្រោយនៃដំណើរទស្សនកិច្ចរបស់ក្រុមប្រតិភូកូរ៉េខាងជើង ដែលគូសបញ្ជាក់ពីចំណងការទូតតាមរយៈការប្រកួតកីឡាអូឡាំពិករៀបចំឡើងនៅលើឧបទ្វីបមួយនេះ ហើយបន្ទាប់មកប្រតិភូនោះក៏ធ្វើដំណើរត្រឡប់ទៅកូរ៉េខាងជើងវិញ។
បើតាម AFP ក្រុមប្រតិភូកូរ៉េខាងជើង បានទទួលទានអាហារគីមឈី និងសូជូជាមួយលោក មូន អង្គុយនៅក្នុងប្រអប់តែមួយនៅឯពិធីបើកកម្មវិធីប្រកួតកីឡាអូឡាំពិក និងបានលើកទឹកចិត្តក្រុមកីឡាករជិះស្គីវាយបាល់ផ្នែកស្ត្រីរួមគ្នាផងដែរ។
លោក គីម ជុងអ៊ុន កាលពីថ្ងៃសៅរ៍សប្ដាហ៍មុន ក៏បានអញ្ចើញលោក មូន ទៅចូលរួមកិច្ចប្រជុំកំពូលនៅកូរ៉េខាងជើងផងដែរ ដែលការអញ្ចើញនោះធ្វើឡើងតាមរយៈប្អូនស្រីរបស់លោកគឺអ្នកស្រី គីម យ៉ូជុង ដែលបានក្លាយទៅជាសមាជិកនៃគ្រួសារត្រកូល គីម លើកដំបូង ដែលបានទៅទស្សនកិច្ចនៅកូរ៉េខាងត្បូង ចាប់តាំងពីសង្គ្រាមកូរ៉េម។
ទោះជាយ៉ាងណា អ្នកនាំពាក្យវិមានបៃតងរបស់ប្រធានាធិបតីកូរ៉េខាងត្បូង បានឲ្យដឹងថា លោក មូន នៅមិនទាន់បានឆ្លើយតបភ្លាមៗ ទៅនឹងការអញ្ចើញនេះទេ៕