នាយករដ្ឋមន្ត្រីថៃ លោក ប្រាយុទ្ធ ចាន់អូចា បាននិយាយកាលពីថ្ងៃម្សិលមិញថា ការរឹតត្បិតលើគណបក្សនយោបាយថៃ នឹងត្រូវដកចេញ ក្រោយពីព្រះរាជពិធីបូជាសពអតីតព្រះមហាក្សត្រ ដែលនឹងមិនកើតឡើងមុនចុងឆ្នាំនេះនោះទេ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
គណបក្សនយោបាយនានានៅក្នុងប្រទេសថៃ ត្រូវបានហាមឃាត់មិនឲ្យជួបជុំគ្នា ឬក៏ធ្វើយុទ្ធនាការនោះឡើយ ចាប់តាំងពីរដ្ឋប្រហារកាលពីឆ្នាំ២០១៤មក ប៉ុន្តែ រដ្ឋធម្មនុញ្ញគាំទ្រដោយពួកយោធា ត្រូវបានព្រះមហាក្សត្រថៃឡាយព្រហស្ថលេខា កាលពីសប្ដាហ៍មុន ជាជំហានមួយឆ្ពោះទៅរកការស្ដារលទ្ធិប្រជាធិបតេយ្យឡើងវិញ។
គណបក្សនយោបាយនានាក្នុងប្រទេសថៃ បានជំរុញទៅរដ្ឋាភិបាលយោធា ឲ្យអនុញ្ញាតឲ្យពួកគេដំណើរការដោយសេរី។
លោក ប្រាយុទ្ធ បាននិយាយថា ការរឹតត្បិតនេះ នឹងត្រូវរក្សាទុកបន្តរហូតក្រោយពិធីបូជាសពអតីតព្រះមហាក្សត្រ ភូមិបុល អាដុលយ៉ាតេជ នៅខែតុលាខាងមុខ និងការឡើងសោយរាជ្យសម្បត្តិរបស់ស្ដេច មហាវិជ្ជរ៉ា ឡុងកន។
ក្សត្រ ភូមិបុល បានសោយទិវង្គតកាលពីខែតុលាឆ្នាំមុន បន្ទាប់ពីទ្រង់បានសោយរាជ្យសម្បត្តិអស់រយៈពេល ៧ទសវត្សរ៍។
ចំណែកឯកាលបរិច្ឆេទជាក់លាក់សម្រាប់ការបោះឆ្នោតជាតិ នៅមិនទាន់ត្រូវបានគេកំណត់នៅឡើយទេ បើទោះបីជារបបយោធាថៃបានសន្យារៀបចំការបោះឆ្នោតជាតិនៅឆ្នាំ២០១៧នេះក៏ដោយ។ យោងតាមរដ្ឋធម្មនុញ្ញថ្មី ការបោះឆ្នោតអាចធ្វើឡើងនៅរយៈពេល ១៩ខែក្រោយ។
គណបក្សភឿថៃរបស់អតីតនាយករដ្ឋមន្ត្រីថៃ អ្នកស្រី យីងឡាក់ ស៊ីណាវ៉ាត់ ដែលត្រូវបានពួកយោធាទម្លាក់ពីអំណាចកាលពីឆ្នាំ២០១៤នោះ បាននិយាយថា ការរឹតត្បិតមួយចំនួន គួរតែត្រូវបានគេដកចេញ។
ចំណែកឯគណបក្សប្រជាធិបតេយ្យវិញក៏បាននិយាយផងដែរថា ខ្លួនចង់ឲ្យរដ្ឋាភិបាលយោធាដកចេញការរឹតត្បិតនេះឲ្យបានឆាប់៕