ពលរដ្ឋមកពី៤សហគមន៍ក្នុងរាជធានីភ្នំពេញ ជំរុញរដ្ឋាភិបាល ឲ្យពន្លឿនកិច្ចអន្តរាគមន៍ បញ្ចប់វិវាទដីធ្លី របស់ពួកគេ ដែលថាបានអូសបន្លាយច្រើនឆ្នាំមកនេះ ខណៈការបោះឆ្នោត ឃុំ សង្កាត់ កាន់តែខិតជិតមកដល់។
អ្នកតវ៉ាប្រមាណ៣០នាក់ មកពីសហគមន៍បុរីកីឡា អតីតបឹងកក់ សហគមន៍ប្រលានយន្តហោះ និងសហគមន៍ផ្សេងទៀត នៅថ្ងៃសុក្រនេះ បានប្រមូលផ្តុំគ្នានៅខុទ្ទកាល័យលោកនាយករដ្ឋមន្រ្តី ហ៊ុន សែន។
ពួកគេថា ការប្រមូលផ្តុំគ្នានេះ ដើម្បីចង់ដឹងថា ញត្តិរបស់ពួកគេដែលបានដាក់ជូនរដ្ឋាភិបាលកន្លងទៅឲ្យជួយអន្តរាគមន៍រកដំណោះស្រាយដីធ្លីនោះ រដ្ឋាភិបាលបានអន្តរាគមន៍ទៅក្រសួងពាក់ព័ន្ធ ជំរុញឲ្យមានដំណោះស្រាយយ៉ាងណាហើយ។
អ្នកស្រី ង៉ូវ ណារី ដែលអះអាងថា ជាតំណាងអ្នកបុរីកីឡានិយាយថា ពួកគេជិត១០០គ្រួសារទៀត មិនទទួលបានដំណោះស្រាយទេ បន្ទាប់ពីមានព្រឹត្តិការណ៍បណ្តេញទាំងបង្ខំ កាលពីថ្ងៃទី៣ខែមករាឆ្នាំ២០១២មក។គាត់ថា ការអូសបន្លាយ មិនដោះស្រាយនេះ ធ្វើឲ្យពួកគាត់ បាត់បង់មុខរបរ កូនៗបាត់បង់ការសិក្សារជាដើម។
អ្នកស្រីបន្ថែមថា «ខ្ញុំសុំលោកនាយករដ្ឋមន្ត្រីជួយដោះស្រាយបញ្ហាដីធ្លីពួកខ្ញុំ មុនថ្ងៃបោះឆ្នោតនេះ ព្រោះអី គាត់គួរបញ្ចប់បញ្ហាជម្លោះដីធ្លីហើយៗ គាត់ត្រូវសាងកិត្តិយសគាត់មុនថ្ងៃបោះឆ្នោតឡើងវិញទៅ ប្រសិនបើគាត់នៅតែជឿមន្រ្តីថ្នាក់ក្រោមរបស់គាត់ដែលពុករលួយធ្វើស្រែលើខ្នងប្រជាពលរដ្ឋអញ្ចឹងទៀត គាត់នឹងអស់ប្រជាប្រិយភាពហើយៗលោកនាយករដ្ឋមន្រ្តីនឹងបាត់បង់សន្លឹកឆ្នោតទៀត»។
តំណាងអ្នកតវ៉ាម្នាក់ទៀត នៅសហគមន៍ព្រលានយន្តហោះ អ្នកស្រី ច្រាយ នីម ឲ្យដឹងដែរថា ពួកគាត់ស្នើរដ្ឋាភិបាល ឲ្យអន្តរាគមន៍ទៅស្ថាប័នពាក់ព័ន្ធ ធ្វើប័ណ្ណកម្មសិទ្ធិ ឲ្យពួកគាត់បានមុនថ្ងៃបោះឆ្នោត ដោយថា កន្លងមកពួកគាត់បានសុំឲ្យអាជ្ញាធរថ្នាក់ក្រោម ជូយដោះស្រាយករណីនេះដែរ ប៉ុន្តែគាត់ថា អាជ្ញាថ្នាក់ក្រោម ហាក់ធ្វើមិនដឹងមិនឮ។
អ្នកស្រី ច្រាយ នីម បន្តថា ការធ្លាក់សំឡេងឆ្នោត របស់គណបក្សប្រជាកម្ពុជា នៅអាណត្តិមុន គាត់ថា មកពីភាពអសកម្ម របស់មន្រ្តីថ្នាក់ក្រោម មិនយកចិត្តទុកដាក់ដោះស្រាយបញ្ហាពលរដ្ឋនេះ។
អ្នកស្រីបន្ថែមថា «អញ្ចឹងពួកខ្ញុំសង្ឃឹមថា សម្តេច ហ៊ុន សែន គាត់នឹងជួយដោះស្រាយ ដើម្បីយកប្រជាប្រិយភាពគាត់ឡើងវិញឈប់ជឿលើទីប្រឹក្សារឬមន្រ្តីអាចក់អាចែមថ្នាក់ក្រោមរបស់គាត់ ដែលកឹបកេងផលប្រយោជន៍ពីញីសឈាមរបស់ប្រជាពលរដ្ឋ ហើយយើងសង្ឃឹមថាសម្តេចនឹងមើលឃើញពីទុក្ខវេទនារបស់យើងដែលស្រែកឲ្យសម្តេចជួយជិតដល់ថ្ងៃបោះឆ្នោតខាងមុខនេះ»។
ពលរដ្ឋម្នាក់ទៀត មកពីសហគមន៍បឹងកក់ អ្នកស្រី លី ចាន់ណារី ឲ្យដឹងថា ពួកគាត់នៅសល់៧គ្រួសារទៀត មិនទាន់ទទួលយកសំណងនៅឡើយទេ ដោយថាសាលារាជធានីបង្ខំឲ្យពួកគាត់ទទួលយកសំណងជាគោលនយោបាយ ដែលថាពួកគាត់មិនអាចទទួលយកបាន។
ស្ត្រីរូបនោះបន្តថា កាលពីថ្ងៃទី២៧មេសាឆ្នាំ២០១៧សាលារាជធានភ្នំពេញបានដាក់ឱសានវាទឲ្យពួកគាត់ទទួលយកសំណងមិនដល់១០ភាគរយនៃទំហំដីដែលពួកគាត់ធ្លាប់កាន់កាប់។ គាត់ថា ដំណោះស្រាយនេះពួកគាត់ទាំង៧គ្រួសារ ចង់បាន៥៣ភាគរយនៃផ្ទៃដីដែលគាត់ធ្លាប់កាន់កាប់។
ទោះជាយ៉ាងណា មន្រ្តីខុទ្ទកាល័យនាយករដ្ឋមន្រ្តីគឺ លោក គង់ ចំរើន បានប្រាប់អ្នកតវ៉ាថា ញត្តិដែលពលរដ្ឋសុំអន្តរាគមន៍កន្លងទៅបានបញ្ជូនទៅថា្នក់លើហើយ។ ប៉ុន្តែលោកថា ពេលដល់ពេលនេះ លោកនូវមិនទាន់បានទទួលដំណឹងពីកិច្ចអន្តរាគមន៍ត្រឡប់នៅឡើយទេ។
នាយកលេខាធិកាដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ ធ្លាប់មាន ប្រសាសន៍ថា ប្រសិនភាពនៃការដោះស្រាយជម្លោះដីធ្លី ដែលឆ្លើយតបនឹងបញ្ហាពលរដ្ឋ លោកថា ឱកាសរក្សាតំណែង នាយករដ្ឋមន្ត្រី នៅថ្ងៃបោះឆ្នោតខាងមុខ៕