ពន្ធនាគារខេត្តបន្ទាយមានជ័យរងការចោទប្រកាន់ថា ពន្ធនាគារនេះខ្វះការយកចិត្តទុកដាក់ដល់អ្នកដែលជាប់ឃុំ ដែលបានបណ្តែតបណ្តោយឲ្យអ្នកទោសឈឺរហូតដល់ស្លាប់ទើបយកមកមន្ទីរពេទ្យ។
អ្នកស្រីខុន ធី អាយុ៤៦ឆ្នាំដែលត្រូវជាម្តាយ បានឲ្យវីអូឌីដឹងថាកូនស្រីរបស់ខ្លួនឈ្មោះ សុត ចាន់ថន អាយុ ២៧ឆ្នាំ បានស្លាប់បាត់បង់ជិវិតកាលពីថ្ងៃទី៦ ឧសភានេះនៅមន្ទីរពេទ្យអង្គរបុរី ខេត្តបន្ទាយមានជ័យ បន្ទាប់ពីធ្លាក់ខ្លួនឈឺធ្ងន់នៅពន្ធនាគារខេត្តកាលពីថ្ងៃទី១ ឧសភា ដោយពុំសូវមានការយកចិត្តទុកដាក់ពីមន្ត្រីពន្ធនាគារខេត្តនេះ។
អ្នកស្រីថា៖ « (ថ្ងៃពុធ)ខ្ញុំមកសុំជួបតេជគុណផាន់ ដើម្បីសុំឲ្យយកទៅព្យាបាលពេទ្យខាងក្រៅ គាត់ឆ្លើយមកវិញថាអ៊ីឯងមិនបាច់ចេះដឹងទេបើសិនឈឺធ្ងន់ធ្ងរគេនឹងទាក់ទងចេញទៅក្រៅហើយ តែបើជំងឺស្រាលពេទ្យក្នុងហ្នឹងមានហើយ! ថ្ងៃព្រហស្បតិ៍កូនខ្ញុំគាត់បានតេមកហើយថាម៉ាក់អើយដាក់លុយឲ្យខ្ញុំ១០ម៉ឺនមក ហើយខ្ញុំថាចាំស្អែកទៅ ព្រោះម៉ាក់អត់ទាន់មានលុយទេ។ យកទៅសងថ្លៃសេរ៉ូមគេ ហើយដល់ស្អែកឡើងថ្ងៃសុក្រខ្ញុំទំលាក់លុយឲ្យកូនខ្ញុំដប់ម៉ឺនឲ្យកូនខ្ញុំដែលគាត់យកទៅសងថ្លៃសេរ៉ូមឲ្យគាត់នៅក្នុងហ្នឹង ដល់ពេលដែលថ្ងៃសៅរ៍ម៉ោង៧(ព្រឹក)ជាងនេះខ្ញុំទទួលដំណឹងថាកូនខ្ញុំស្លាប់នៅពេទ្យអង្គរបុរី តើខ្ញុំឈឺចាប់ប៉ុណ្ណាដែលខ្ញុំទៅសុំគាត់ បើគាត់បញ្ជូនខ្ញុំចេញតាមអ្វីដែលខ្ញុំសុំហ្នឹងគឺកូនខ្ញុំមិនស្លាប់ទេព្រោះអីគ្នាកើតជំងឺហត់តាំងពីតូចតាំងពីគេអាយុ៧ឆ្នាំ » ។
អ្នកស្រី អ្នកស្រីខុន ធី បានអះអាងទៀតថា តាមពិតកូនស្រី របស់គាត់បានស្លាប់នៅក្នុងពន្ធនាគាររួច។ប៉ុន្តែអ្នកស្រីថា ការបញ្ជូនកូនគាត់ទៅមន្ទីរពេទយ្យ អ្នកស្រីថា គ្រាន់ជាការបំភ័ណភ្នែកប៉ុណ្ណោះ។
ស្ត្រីរូបនោះយល់ថា នេះជាការធ្វេសប្រហែសរបស់មន្ត្រីពន្ធនាគារដែលបង្ហាញពីការមិនយកចិត្តទុកដាក់លើអ្នកជាប់ឃុំ អ្នកស្រីចង់ឲ្យមានយុត្តិធម៌មួយសម្រាប់អ្នកស្រី ក៏ដូចជាកូនស្រីរបស់ខ្លួន។
វីអូឌីមិនអាចទាក់សុំការឆ្លើយតបពីប្រធានពន្ធនាគារខេត្តបន្ទាយមានជ័យ លោក លោក អ៊ុង សុផាន បាននៅឡើយទេនៅរសៀលថ្ងៃទី១២ ឧសភានេះ។
មន្ត្រីសម្របសម្រួលសមាគមអាដហុកប្រចាំខេត្តបន្ទាយមានជ័យលោក សំ ចាន់គា មានប្រសាសន៍ថា ពន្ធនាគារមិនមែនជាកន្លែងធ្វើទុកបុកម្នេញទៅដល់អ្នកជាប់ឃុំនោះទេ គឺគ្រាន់តែជាកន្លែងមួយដែលធ្វើការឃាត់សិទ្ធិដើរហើយរបស់មនុស្សប៉ុណ្ណោះ ចំពោះការយកចិត្តទុកដាក់លើសុខភាព វាជាការចាំបាច់មួយដូចនៅខាងក្រៅដែរ។ លោកឲ្យដឹងថាករណីដែលបណ្តាលឲ្យមនុស្សស្លាប់នៅពន្ធនាគារនេះ ជាការធ្វេសប្រហែសរបស់ពន្ធនាគារ ដែលត្រូវទទួលខុសត្រូវមុខច្បាប់ចំពោះរឿងនេះ មិនមែនទុកបណ្តាលឲ្យមនុស្សស្លាប់ហើយបញ្ជុនទៅមន្ទីរពេទ្យដើម្បីយករួចខ្លួននោះទេ។
លោកថា៖ « អញ្ចឹងបើគាត់មានការខ្ជឺខ្ជាយធ្វេសប្រហែសនេះហើយដែលបណ្តែតបណ្តោយឲ្យមនុស្សស្លាប់ គាត់ត្រូវតែទទួលនូវទោសបទល្មើសនេះមាននៅជាធរមានអញ្ចឹងយើងឃ្លាំមើលនូវការរំលោភសិទ្ធិមនុស្ស ថ្ងៃនេះយើងបានដាក់លិខិតអន្តរាគមន៍ទៅតុលាការ ទៅព្រះរាជអាជ្ញាដើម្បីឲ្យបើកការស៊ើបអង្កេតលើរឿងហ្នឹង កុំឲ្យអំពើមនុស្សស្លាប់ដោយគ្មានការទទួលខុសត្រូវមួយ ទីពីរគឺជាអំពើនិទន្ធភាពវាអត់មានមនុស្សដែលបានប្រព្រឹត្តិបែរទៅជារួចខ្លួនរហូតនោះណា » ។
បើតាមក្រុមគ្រួសារអ្នកជាប់ឃុំថាកូនស្រីខ្លួន បានអនុវត្តន៍ទោសជាប់ពន្ធនាគារនេះរហូតមកដល់ថ្ងៃស្លាប់នេះមានរយៈពេលជាង១ឆ្នាំហើយនៃទោសជាប់៣ឆ្នាំពាក់ព័ន្ធនឹងសំណុំរឿងប្រើប្រាស់គ្រឿងញៀន៕
