ព្រះមហាក្សត្រ បានតែងតំាង លោក ឃឹម វុទ្ធី ជាអគ្គនាយក នៃអគ្គនាយកដ្ឋានទូរទស្សន៍ជាតិកម្ពុជា ជំនួស លោក កឹម គុណវឌ្ឍ ដែលធ្លាប់បានសុំលាលែងកាលពីពេលកន្លងទៅ។ នេះបើយោងតាមព្រះរាជក្រឹត្យដែលVODទទួលបាននៅថ្ងៃទី១២មិថុនានេះ។
លោក ឃឹម វុទ្ធី គឺអគ្គនាយករង នៃអគ្គនាយកដ្ឋានទូរទស្សន៍ជាតិកម្ពុជា ហៅថា ទទក ដែលគេស្គាល់ថា ជាពិធីករ និងជាអ្នកធ្វើការអត្ថាធិប្បាយលើទូរទស្សន៍ ទទក ក្នុងព្រឹត្តិការណ៍ធំៗ របស់រដ្ឋាភិបាលនោះ ត្រូវបាន ព្រះមហាក្សត្រ តែងតំាងធ្វើជាអគ្គនាយក ទទក ជំនួសលោក គឹម គុណវឌ្ឍ ខណៈលោកចូលនិវត្តន៍។
ប៉ុន្តែបើតាមសារបង្ហាញនៅក្នុងហ្វេសប៊ុកចែករំលែកតៗគ្នា បានឲ្យដឹងថា រដ្ឋមន្ត្រីក្រសួងព័ត៌មានលោក ខៀវ កាញារីទ្ធ អះអាងថាលោកមិនដឹងរឿងព្រះមហាក្សត្រតែងតំាងលោក ឃឹម វុទ្ធី ធ្វើជាអគ្គនាយក ទទក នោះទេ។លោកថា «ហេតុអ្វីខ្ញុំអត់ដឹងសោះអញ្ចឹង? តើចេញតាមណាវិញ? ព្រោះអត់មានអ្នកណាមកឆ្លងយោបល់ ឬសុំមតិឯកភាពផង»។
ទោះជាយ៉ាងណា VOD មិនអាចសុំការបំភ្លឺបន្ថែមលើរឿងនេះពីលោក ខៀវ កាញារីទ្ធ នៅថ្ងៃចន្ទ ទី១២មិថុនានេះបានទេ។
រីឯ អ្នកនាំពាក្យក្រសួងព័ត៌មាន លោក អ៊ុក គឹមសេង បានឲ្យដឹងថា គិតត្រឹមថ្ងៃទី១២មិថុនានេះ ក្រសួងព័ត៌មានមិនទាន់ទទួលបានឯកសារស្នើសុំតែងតំាងលោក ឃឹម វុទ្ធី នៅឡើយ ដោយលោកថា ការតែងតាំងនេះធ្វើនៅចុងសប្តាហ៍មុន ពោលជាថ្ងៃឈប់សំរាក ខណៈលោក ខៀវ កាញារីទ្ធ ជាប់បំពេញបេសកម្មនៅក្រៅប្រទេស។
លោកមានប្រសាសន៍ថា «រឿងតែងតំាងអគ្គនាយក ទទក ខ្ញុំបានឃើញហើយ ឃើញគេបង្ហោះ ប៉ុន្តែជាផ្លូវការយើងអត់ទាន់បានទទួលច្បាប់ចំលង ហើយឯកឧត្តម កាញារីទ្ធ គាត់នៅប្រទេសសិង្ហបុរី ប្រហែលជាសារមិនទាន់ដល់ខុទ្ទកាល័យ ព្រោះអីថ្ងៃសុក្រ ថ្ងៃសៅរ៍ អាទិត្យ ព្រោះរឿងហ្នឹងចឹង»។
អ្នកប្រឹក្សាឯករាជ្យ ផ្នែកសិទ្ធិមនុស្ស លោក សួន ប៊ុនស័ក្តិ យល់ថា បើការសម្រេចតែងតំាង លោក ឃឹម វុទ្ធី ធ្វើជាអគ្គនាយកទូរទស្សន៍ ទទក ដោយមិនបានឆ្លងយោបល់ពីលោក កាញារីទ្ធ មែន លោកថា ជាការធ្វេសប្រហែសផ្នែករដ្ឋបាល និងធ្វើឲ្យប៉ះពាល់ដល់អភិបាលកិច្ច។
លោកយល់ថា «អ្វីដែលប៉ះពាល់គឺប៉ះពាល់ដំណើរការអភិបាលកិច្ចទូទៅ ដូចថាវាខុសក្រិតក្រមក្នុងការគ្រប់គ្រង ព្រោះការគ្រប់គ្រង កាត់ចាត់តំាង ការបែងចែកកម្លំាងផ្សេងៗ គឺត្រូវតែមានការដឹងឮ ពីថ្នាក់ក្រោម ទៅថ្នាក់លើ ថ្វីត្បិតតែថ្នាក់ប្រធានស្ថាប័នមិនមែនជាអ្នកសម្រេចក៏ដោយ ប៉ុន្តែយ៉ាងហោចណាស់ គេតែងថាត្រូវមានការយល់ព្រម [គ្រីស] ត្រូវមានចំណារពីថ្នាក់ក្រោម ជាយោបល់ពីថ្នាក់ក្រោមទៅ ទើបជាកម្មវត្ថុដោយថ្នាក់លើ បើសិនជាមានការខ្វះខាតមែន ខ្ញុំមើលឃើញជារឿងមួយ មិនប្រក្រតីនៅក្នុងកិច្ចការរដ្ឋបាលរបស់ក្រសួងទៅវិញ»។
កន្លងទៅ អគ្គនាយកទូរទស្សន៍ ទទក លោក គឹម គុណវឌ្ឍ ធ្លាប់ស្នើសុំទៅរដ្ឋមន្ត្រីក្រសួងព័ត៌មានលាលែងចេញពីតំណែងភ្លាម ក្រោយពីទូរទស្សន៍ជាតិកម្ពុជា អាក់ខានការផ្សាយផ្ទាល់ ការប្រារព្ធព្រះរាជពិធីច្រត់ព្រះនង្គ័ល៕