ក្លឹបអ្នកកាសែតបរទេសប្រចាំនៅកម្ពុជា នៅថ្ងៃនេះ បានបង្ហាញក្ដីកង្វល់របស់ពួកគេ ជុំវិញការចាប់ខ្លួនអ្នកថតរូបជនជាតិអូស្ត្រាលី លោក James Ricketson ដែលត្រូវបានចោទប្រកាន់ពីបទចារកម្ម កាលពីថ្ងៃទី៩ ខែមិថុនានេះ។
លោក James Ricketson អាយុ ៦៨ឆ្នាំ ត្រូវបានអាជ្ញាធរកម្ពុជាចាប់ខ្លួនអស់រយៈពេលជាងមួយសប្ដាហ៍មកហើយ ក្រោយពីរូបលោកត្រូវបានគេមើលឃើញបង្ហោះម៉ាស៊ីន drone នៅលើក្បួនដង្ហែរបស់គណបក្សសង្គ្រោះជាតិ កាលពីថ្ងៃទី០៣ ខែមិថុនា។
ក្រោយពីការចាប់ខ្លួនអ្នកថតរូបនេះ ក្លឹបអ្នកកាសែតបរទេសប្រចាំនៅកម្ពុជា បានលើកឡើងថា ក្រុមអ្នកកាសែតបានធ្វើប្រតិបត្តិការនៅក្នុងបរិយាកាសដ៏លំបាក និងត្រូវការការបញ្ជាក់ផ្នែកច្បាប់ទាក់ទងនឹងប្រើប្រាស់ drone។
ក្រុមនេះបានចាត់ទុកការចោទប្រកាន់ទៅលើលោក Ricketson ជាការបង្កើតនូវលក្ខខណ្ឌដ៏គ្រោះថ្នាក់មួយ ដែលមានផលវិបាកយ៉ាងធំធេងលើវិស័យសារព័ត៌មាន។
ក្លឹបអ្នកកាសែតបរទេសប្រចាំកម្ពុជា ក៏បានជំរុញទៅអាជ្ញាធរកម្ពុជា ឲ្យធ្វើសកម្មភាពប្រកបដោយភាពអត់ធ្មត់ និងស្របតាមច្បាប់កម្ពុជា៕
