ក្រុមអ្នកឃ្លាំមើលការបោះឆ្នោត បានសំដែងក្ដីបារម្ភរបស់ពួកគេដោយថា សន្លឹកឆ្នោតមិនបានការមានចំនួនច្រើន និងស្នើឲ្យ គ.ជ.ប រាប់សន្លឹកឆ្នោតឡើងវិញនៅតាមឃុំសង្កាត់ ដែលមានភាពមិនប្រក្រតី។
ក្នុងសន្និសីទសារព័ត៌មានមួយ នៅបន្ទប់ស្ថានការណ៍បោះឆ្នោត រាជធានីភ្នំពេញ នៅថ្ងៃចន្ទនេះ នាយកប្រតិបត្តិអង្គការខុមហ្រ្វែលលោក គល់ បញ្ញា មានប្រសាសន៍ថា បណ្ដុំអង្គការសង្គមស៊ីវិលមានក្ដីបារម្ភ បន្ទាប់ពីរកឃើញថា សន្លឹកឆ្នោតមិនបានការមានចំនួនច្រើនគឺ ១,៨ភាគរយ និងថា គ.ជ.ប គួររាប់សន្លឹកឆ្នោតឡើងវិញ តាមឃុំសង្កាត់ទាំងអស់ ដែលមានភាពប្រកៀកប្រកិតខ្លាំង។
លោកថា៖ «យើងរកឃើញថា សន្លឹកឆ្នោតមិនបានការ ១,៨ភាគរយ។ អញ្ចឹងហើយ បានជានៅក្នុងសេចក្ដីថ្លែងការណ៍ យើងស្នើឲ្យ គ.ជ.ប ត្រូវតែដោះស្រាយបណ្ដឹងទាំងអស់ ដែលគណបក្សនយោបាយគេប្ដឹង ដែលគេរកឃើញថា លទ្ធផលលម្អៀង សន្លឹកឆ្នោតវាគៀកគ្នា ដោយសន្លឹកឆ្នោតមិនបានការវាច្រើន ហើយបើគ.ជ.ប រាប់ទាំងអស់»។
អ្នកនាំពាក្យ គ.ជ.ប លោក ហង្ស ពុទ្ធា ឲ្យ VOD ដឹងថា បច្ចុប្បន្ន គ.ជ.ប កំពុងរាប់សន្លឹកឆ្នោតឡើងវិញ នៅតាមឃុំសង្កាត់ ដែលមានបញ្ហាទាំងនោះ។ លោកមានប្រសាសន៍ថា បន្ទាប់ពីបិទផ្សាយលទ្ធផលបោះឆ្នោតបណ្ដោះអាសន្នរួចមក គ.ជ.ប បានទទួលដោះស្រាយបណ្ដឹងសុំរាប់សន្លឹកឆ្នោតឡើងវិញចំនួន៣៦បណ្ដឹង និងថា បណ្ដឹងឡើងមកដល់ គ.ជ.ប មានចំនួន១៦បណ្ដឹង។
លោកថា៖ «បន្ទាប់ពីការបិទផ្សាយនូវលទ្ធផលបោះឆ្នោតបណ្ដោះអាសន្ន គ.ជ.ប ក៏ទទួលបានពាក្យបណ្ដឹងបន្ដបន្ទាប់ដែរ ក្នុងនោះ ចង់ជំរាបដែរថា ពាក្យបណ្ដឹងពាក់ព័ន្ធនឹងការរាប់សន្លឹកឆ្នោតគឺ៣៦បណ្ដឹង តាមរាជធានីខេត្តមួយចំនួន បណ្ដឹងឡើងមក គ.ជ.ប សុំឲ្យរាប់ឡើងវិញមានចំនួន១៦បណ្ដឹង ពាក់ព័ន្ធនឹង៨ខេត្ត។ អញ្ចឹងថ្ងៃនេះ គ.ជ.ប ជាថ្ងៃទី១ នៃការចាប់ផ្ដើមរាប់សន្លឹកឆ្នោត»។
នាយកប្រតិបត្តិអង្គការនិចហ្វិចលោក សំ គន្ធាមី ថ្លែងកោតសរសើរស្ថាប័ន គ.ជ.ប ថាបានបំពេញតួនាទីរបស់ខ្លួន បើកចំហរឲ្យមានតម្លាភាព និងទទួលយកការរិះគន់ពីភាគីពាក់ព័ន្ធជាងអាណត្តិមុនៗ ដូចជា ការរាប់សន្លឹកឆ្នោត ការដោះស្រាយបណ្ដឹងពីគណបក្សនយោបាយ ការផ្សព្វផ្សាយលទ្ធផលបោះឆ្នោតបឋម និងការបង្ហាញឯកសារទម្រង់១១០២ ជាដើម។
លោក សំ គន្ធាមី លើកឡើងថា គ.ជ.ប ថ្មីនេះជាស្ថាប័នធម្មនុញ្ញ ដែលអាចសម្រេចកិច្ចការបោះឆ្នោតធំៗ ដោយខ្លួនឯង មិនដូច គ.ជ.ប មុនទេ។ ប៉ុន្ដែលោកថា គ.ជ.ប គួរបណ្ដុះបណ្ដាលមន្ដ្រីការិយាល័យបោះឆ្នោតរបស់ខ្លួន ព្រោះអ្នកខ្លះមានសមត្ថភាពទាប ដោយបានសាងកំហុសឆ្គងក្នុងការកត់ត្រា និងចម្លងទិន្នន័យបោះឆ្នោត។
លោកថា៖ «គ.ជ.ប ថ្មីនេះឥឡូវជាស្ថានធម្មនុញ្ញ អត់ដូចស្ថាប័នមុនទេ ហើយបានរៀបចំបញ្ជីបោះឆ្នោតមួយ។ នេះហើយដែលធ្វើឲ្យចំនួន ផលវាជះឥទ្ធិពលមកដល់ចំនួនអ្នកបោះឆ្នោតជិត៩០ភាគរយ ៨៩ភាគរយ គ.ជ.ប ជួយណាស់ ឃើញមានតម្លាភាពច្រើនជាងមុន គ.ជ.ប អត់ដែលបង្ហោះ១១០២ ដាក់វេបសាយ ដាក់អីទេ គ.ជ.ប មុនតែប្រកាសហើយ ចប់តែម៉ង អត់មានចេះកែតម្រូវ កែអីទេ»។
សូមជំរាបថា នៅថ្ងៃចន្ទនេះ គ.ជ.ប កំពុងរាប់សន្លឹកឆ្នោតឡើងវិញ តាមការិយាល័យបោះឆ្នោតចំនួន២៣ ក្នុងឃុំដូង ស្រុករមាសហែក ខេត្ដស្វាយរៀង ។
បើតាមសេចក្ដីប្រកាស មានបណ្ដឹងសុំរាប់សន្លឹកឆ្នោតឡើងវិញចំនួន២៨ ក្នុងនោះបណ្ដឹង១៨ ជារបស់គណបក្សប្រជាជន និងបណ្ដឹង១០ទៀត ជារបស់គណបក្សសង្គ្រោះជាតិ៕
