មន្ត្រីកាំកុងត្រូលនៅខេត្តបន្ទាយមានជ័យអំពាវនាវឲ្យប្រជាពលរដ្ឋខ្មែរតាមព្រំដែនប្រុងប្រយ័ត្នក្នុងការទិញទំនិញពីថៃបន្ទាប់ពីរកឃើញទំនិញមួយចំនួនហួសការកំណត់ប្រើប្រាស់ ខូចគុណភាព និងមិនមានសុវត្ថិភាពអាចប៉ះពាល់ដល់សុខភាព។
មន្ត្រីកាំកុងត្រូលតំបន់សេដ្ឋកិច្ចពិសេសអូនាងនៅក្រុងប៉ោយប៉ែតខេត្តបន្ទាយមានជ័យ លោកឃុន ឃាង បានប្រាប់ វីអូឌីឲ្យដឹងនៅថ្ងែអង្គារម្សិលមិញថា ទំនិញថៃភាគច្រើនពេលជិតផុតកំណត់ប្រើប្រាស់ តែងបង្កើតកម្មវិធីពិសេស លក់ក្នុងតម្លៃថោក ឬ ទិញមួយថែមមួយជាដើម៖ «ថៃដល់ពេលជិតហួសវាបញ្ចេញមកលក់ ប្រូមូសិនអីចឹងទៅ យើងប្រាប់ដែរបើទិញលើកក្រោយឲ្យចេះប្រយ័ត្នមើលទៅ អាណាសល់ឌីលេ យូរៗសឹមយកមក តិចបើយើងលក់មិនអស់មិនបានពិនិត្យមើល ទំនិញខ្លះសល់ ៤- ៥ថ្ងៃអីផុតគាត់យកមកគាត់អត់បានមើល គ្រាន់តែបានណែនាំគាត់ចឹង ថាឲ្យប្រុងប្រយ័ត្ន គាត់អត់ចេះមើល»។
មន្ត្រីការពារសិទ្ធិមនុស្ស អាដហុក ប្រចាំខេត្តន្ទាយមានជ័យ លោក ស៊ំ ចន្ទគា បានឲ្យដឹងថាសាច់មាន់ សាច់ទា សាច់ជ្រូក និងទំនិញផ្សេងទៀត ដែលខូចគុណភាពនាំចូលពីថៃគឺសមត្ថកិច្ចចាប់បានតិចតួច ចំណែកមួយភាគធំទៀតនៅតែបន្តលក់លើទីផ្សារ៖ «ប្រជាពលរដ្ឋកម្ពុជាកំពុងតែរងគ្រោះអញ្ចឹងមន្ត្រីកាំកុងត្រូលចាប់បានមួយបានពីក៏ដោយប៉ុន្តែខំប្រឹងធ្វើម៉េចឲ្យប្រសើរជាងហ្នឹង កុំឲ្យមានអំពើរពុករលួយ អនុញាតិណេះអនុញាតិណោះដែលធ្វើអោយសុខភាពប្រជាពលរដ្ឋហ្នឹងរងទុក្ខទោសរងការលំបាកដោយសាតែយើងមិនបានយកចិត្តដាក់»។
ជាញឹកញាប់ មន្ត្រីកម្ពុជានៅតាមព្រំដែនជាប់ជាមួយថៃ តែងតែចាប់ឃាត់ទុក និងដុតបំផ្លាញចោលទំនិញដូចជា អាហារកំប៉ុង ជង្គង់មាន់ សាច់មាន់ជាដើម ដែលនាំចូលពីប្រទេសថៃ ក្រោយពេលពិនិត្យឃើញថា ទំនិញទាំងនោះខូចគុណភាព៕
ហូរ តុងហាន់
