លោក សម រង្ស៊ី ដែលកំពុងនិរទេសខ្លួននៅក្រៅប្រទេសគេចពីការប៉ុនប៉ងចាប់ខ្លួនពីសំណាក់សមត្ថកិច្ចកម្ពុជានោះ ថ្លែងថា លោកនៅតែបន្តរក្សាជំហរចោទថា លោកនាយករដ្ឋមន្ត្រី ហ៊ុន សែន និងបក្ខពួកជាមន្ត្រីរដ្ឋាភិបាល នៅពីក្រោយការសម្លាប់លោក កែម ឡី។
កាលពីថ្ងៃសុក្រម្សិលមិញ សាលាឧទ្ធរណ៍បានសម្រេចរក្សាទោសលោក សម រង្ស៊ី ដូចការសម្រេចរបស់សាលាដំបូងរាជធានីភ្នំពេញ កាលពីថ្ងៃទី៣០ខែមីនាឆ្នាំ២០១៧ បានកាត់ទោសលោក សម រង្ស៊ី ឲ្យជាប់ពន្ធនាគារ ១ឆ្នាំ៨ខែ ពិន័យជាប្រាក់១០លានរៀល និងឲ្យសងសំណងជំងឺចិត្តទៅលោក ហ៊ុន សែន ចំនួន១០០រៀល ពីបទបរិហារកេរ្តិ៍ និងញុះញង់ឲ្យបង្កអសន្តិសុខដល់សង្គម។
នៅថ្ងៃម្សិលមិញដដែលក្នុងបទសម្ភាសន៍មួយជាមួយវិទ្យុអាស៊ីសេរី លោក សម រង្ស៊ីថ្លែងថា លោកមិនចាប់អារម្មណ៍ការសម្រេចរបស់លោកតុលាការនៅកម្ពុជានោះទេ ហើយលោកថា លោកនៅតែចោទថា លោក ហ៊ុន សែន និង មន្ត្រីមួយចំនួនទៀតថា ជាអ្នកស្លាប់លោកកែម ឡី ដោយថា លោក កែម ឡីបានបកស្រាយពីចំណុច អាក្រក់របស់លោក ហ៊ុន សែន និង មន្ត្រីពាក់ព័ន្ធ។
ទោះយ៉ាងណា មេធាវីការពារក្តី ឲ្យលោកនាយករដ្ឋមន្ត្រី ហ៊ុន សែន លោកគី តិច បានថ្លែងកាលពីម្សិលមិញ នៅសាលាឧទ្ធរណ៍ថា លោកសម រង្ស៊ីមិនអាចរកភស្តុតាងដាក់បន្ទុក លើលោកហ៊ុន សែនបានទេ ហើយថា ការចោទប្រកាន់នោះគ្រាន់តែជាញុះញង់ ឲ្យពលរដ្ឋស្អប់រដ្ឋាភិបាល។