ក្រសួងបរិស្ថាន អះអាងថា នឹងជួយជនជាតិសួយបង្កើតសហគមន៍ ទេទឹកពុះ និងអភិវឌ្ឍន៍តំបន់ការពារធម្មជាតិកោរដូនតី ក្នុងភូមិសាស្ត្រ ស្រុកឱរ៉ាល់ ខេត្តកំពង់ស្ពឺ ឲ្យក្លាយទៅជាតំបន់ទេសចរណ៍ធម្មជាតិ ដើម្បីទាក់ទាញភ្ញៀវទេសចរ មកកម្សាន្តឲ្យបានច្រើនបន្ថែមទៀត។
យោងតាមទំព័រហ៊្វេសប៊ុក (Facebook Page) របស់ក្រសួងបរិស្ថាន កាលពីថ្ងៃទី ១០ខែសីហា បានឲ្យដឹងថា លោក សាយ សំអាល់ រដ្ឋមន្ត្រីក្រសួងបរិស្ថាន បានសន្យាជាមួយជនជាតិសួយនៅទីស្តីការក្រសួង ថានឹងជួយកំណត់ព្រំដីសហគមន៍ និងអភិវឌ្ឍន៍ទៅជាតំបន់ទេសចរណ៍ធម្មជាតិជូនពលរដ្ឋសហគមន៍ ឲ្យកាន់តែរីកចម្រើនបន្ថែមទៀត។
លោក សាយ សំអាល់ បន្ថែមទៀតថា លោកនឹងជំរុញឲ្យក្រុមហ៊ុនដែលចង់មកវិនិយោគ នៅតំបន់ធម្មជាតិទេទឹកពុះ សាងសង់ស្តូបតំណាងជនជាតិសួយ ដែលជាកន្លែងគោរពសក្ការៈ និងទីផ្សារបន្លែធម្មជាតិ សម្រាប់ភ្ញៀវទេសចរ ដែលមកលេងកម្សាន្ត ដើម្បីទទួលបានប្រាក់ចំណូលសម្រាប់ផ្គត់ផ្គងជីវភាពក្នុងគ្រួសារ។
តំណាងសហគមន៍ លោកស្រី វ៉ែន សាមីន ថ្លែងអំណរគុណចំពោះលោក សាយ សំអាល់ រដ្ឋមន្ត្រីដែលជួយកំណត់ព្រំដីសហគមន៍ជូនសហគមន៍ជនជាតិសួយ និងកសាងរូបសំណាក់ជនជាតិ រួមទាំងទីផ្សារបន្ថែធម្មជាតិរបស់សហគមន៍ ហើយជាពិសេសការបង្កើតតំបន់ទេទឹកពុះទៅជាតំបន់ទេសចរណ៍ធម្មជាតិ។
ម៉ាប់ស៊ុយ [email protected]