ខណៈដែល ឌុច លីដា ត្រូវបានផលិតករល្បីឈ្មោះ គឺលោក គាំ ចន្ធី ចេញមុខបកអាក្រាតជុំវិញរឿងមិនគោរពពេលវេលានិងថាជាតារារវល់ខ្លាំងរហូតកុងត្រាការងាររួចហើយ តែមិនមានពេលវេលាអោយផលិតករបណ្ដាលអោយលោកខកការផលិតរឿង «ទូកបាត់ច្រវ៉ា» រហូតបង្កជាភ្លើងជម្លោះនោះ តារាសម្ដែងវ័យក្មេង លោក ហេង
នរៈកក្កដា ស្រាប់តែបានបង្ហោះវីដេអូរិះគន់យ៉ាងចាស់ដៃ ដែលមានខ្លឹមសារមិនខុសពីវាយប្រហារចំពោះ កញ្ញាឌុច លីដា ផងដែរ ប៉ុន្តែត្រូវបានលោកបដិសេធថាមិនបានសំដៅទៅ ឌុច លីដា ឡើយ។
លោក ហេង នរៈកក្កដា បានទទួលស្គាល់ថាលោកពិតជាបានបង្ហោះវីដេអូ វាយប្រហារចំពោះតារាមួយរូបបន្ទាប់ពីគេបានក្លាយជាតារាមិនចេះគោរពការងារ ហើយធ្វើអោយលោកក៏ដូចជាតួសម្ដែងផ្សេងទៀតខកខានមិនបានសម្ដែងព្រោះតែតារារូបនោះទទួលយកការងារថតរបស់ផលិតករហើយបែរជាមកយឺត ឬមិនមកតែម្ដង
ដែលការលើកឡើងនេះគឺមិនខុសពីអ្វីដែលលោក គាំ ចន្ធី បានសំដៅទៅ ឌុច លីដា។
យ៉ាងណាក៏ដោយលោកនៅតែអះអាងថាអ្វីដែលលោកនិយាយធ្ងន់ៗក្នុងវិដេអូឃ្លីបនោះ មិនមែនសំដៅទីកាន់តារា ឌុច លីដា ដែលទើបនឹងផ្ទុះរឿងផលិតករចេញមុខទម្លាយទម្លាប់អាក្រក់នោះទេ គឺលោកបញ្ជាក់ថាលោកចង់សំដៅទៅកាន់តារាផ្សេងប៉ុណ្ណោះ។
លោកនិយាយថាលោកមិនធ្លាប់ចេញថតហើយប៉ះការសម្ដែងជាមួយតារាសម្ដែងកញ្ញា ឌុច លីដា នោះទេ នាពេលចុងក្រោយ ទើបលោកមិនបានចាប់អារម្មណ៍ពីអ្វីដែលលោកបង្ហោះឡើងមានន័យប៉ះពាល់ដល់តារាស្រីរូបនេះ។
លោកបានទទួលស្គាល់ថាខ្លឹមសារដែលលោកនិយាយធ្ងន់ៗក្នុងវីដេអូឃ្លីបគឺមិនខុសពីលោកបានដឹងពីជម្លោះរបស់ ឌុច លីដា និងលោក គាំ ចន្ធី ហើយបាននិយាយសំដៅទៅកាន់នាង ដែលការពិតនោះ គឺលោកនិយាយតែរឿងតារាមួយចំនួនដែលធ្វើអោយលោកឈឺក្បាលក្នុងពេលចេញថត ហើយជាតារាផ្សេងប៉ុណ្ណោះ។
លោកថាអ្វីដែលបានលើកឡើងគឺមានខ្លឹមសារស្របគ្នានឹងរឿងដែលបានកើតឡើងចំពោះ ឌុច លីដា ជាពិសេសក្នុងពេលដែលនាងស្រាប់តែមានជម្លោះជាមួយផលិតករល្បីឈ្មោះមួយរូប ហើយត្រូវលោកទម្លាយគ្មានសល់ជុំវិញទម្លាប់មកថតរឿងរបស់នាងនៅលើបណ្ដាញហ្វេសប៊ុក។ លោកថាមិនបានដឹងរឿងផ្ទៃក្នុងរបស់លោក គាំ ចន្ធី និង ឌុច លីដា នោះទេ ប៉ុន្តែថាបើ ឌុច លីដា ពិតជាមានទម្លាប់មិនល្អក្នុងពេលទទួលការងារដូចអ្វីដែលបានលេចឡើង គឺនាងគួរតែធ្វើការផ្លាស់ប្ដូរ ដោយសារតែតារាគឺសំខាន់ត្រង់ពេលវេលានិងការទទួលខុសត្រូវនេះឯង។
លោកថាតារាសម្ដែងបើមានរឿង ឈ្លោះគ្នាជាមួយផលិតករឬមានទម្លាប់មិនល្អបណ្ដាលអោយផ្ទុះចម្រូងចម្រាស់កើតឡើង គឺជារឿងអាក្រក់មើលបំផុតនៅក្នុងវិស័យសិល្បៈ ជាពិសេសនៅក្នុងកាលៈទេសៈដែលវិស័យភាពយន្តរបស់កម្ពុជាសម្រាប់ការកោតសរសើរនៅមានកម្រិតនៅឡើយ។
លោកថាបើទោះជាតម្លៃដែលខាងផលិតករផ្ដល់អោយតារាសម្ដែងនៅមានកម្រិត ប៉ុន្តែក្រោយការទទួលយកគឺដាច់ខាតត្រូវតែបំពេញការងារដែលបានទទួលយកអោយបានល្អ ដោយមិនត្រូវអោយក្រុមការងារផលិតរង់ចាំរាល់ពេលចេញថតនិងមិនត្រូវអោយតួសម្ដែងណាម្នាក់ខកប្លង់ ព្រោះតែយើងជាតួមកមិនទាន់ឬក៏តែងខ្លួនមិនទាន់នោះទេ។ ក្នុងបំណងមិនសំដៅលើ ឌុច លីដា លោកថាតារាមួយចំនួនដែលលោកបានសម្ដែងជាមួយ
គឺមានស្ទើរតែរៀងរាល់ថ្ងៃដែលមានចរឹតតួឯក ដោយគេអោយជុំគ្នាម៉ោង៦ ម៉ោង៨ទើបដល់ ហើយក្រោយពេលមកដល់គឺគ្រាន់តែចំណាយពេលតែងខ្លួនក៏ធ្វើអោយខាតម៉ោងសម្ដែងច្រើនទៀត ដោយមិនខ្វល់ពីការអង្គុយចាំរបស់ក្រុមផលិតករនិងតួសម្ដែងដែលមិនអាចធ្វើអ្វីបានដោយសារតែតួអង្គនោះ គឺជាតួសំខាន់ដែលមិនអា
ចកាត់ប្លង់ចោលបាន។
លោកថានៅក្នុងវិស័យសម្ដែងតារាដែលមានចរឹតបែបនោះ គឺមានមិនអស់ ហើយក្នុងពេលខ្លះគឹមិនត្រឹមតែមកយឺតប៉ុណ្ណោះទេ ថែមទាំងបិទទូរសព្ទហើយមិនមកដោយកុហកម្ដងថាដល់ចំណុចនេះម្ដងដល់ចំណុចនោះ និងក្រោយមកក៏ខលលែងចូលនោះផង។
លោកថាតារាដែលមានទម្លាប់បែបនេះ មិនមែនជាតួថ្មី ឬតួមិនល្បីទេ គឺសុទ្ធតែជាតួសំខាន់ ឬឈានដល់តួឯកតែម្ដង ដោយលោកចាត់ទុកថាប្រហែលបណ្ដាលមកពីតួរូបនោះគិតថា ផលិតករមិនអាចដំណើរការសាច់រឿងចោលខ្លួនបាននិងកាត់ប្លង់ចោលកណ្ដាលទីបាន។
លោកធ្វើការរិះគន់យ៉ាងខ្លាំងចំពោះតារាសម្ដែងដែលខ្វះទំនួលខុសត្រូវបែបនោះជាពិសេសសម្រាប់តារាដែលដឹងថាខ្លួនត្រូវថតតាំងពីព្រលឹមទៅ ហើយបែរជាមានកម្មវិធីផឹកស៊ីដល់ពាក់កណ្ដាលយប់ ហើយបែរជាប្រាប់ថាថតមិនកើតឬទៅដល់កន្លែងថតដែរតែនៅស្រវឹងមិនទាន់ស្វាងដែលមិនអាចដំណើរការរឿងទៅបាន។
ការលើកឡើងរបស់លោកនៅត្រង់ចំណុចនេះ គឺស្របនឹងការទម្លាយរបស់លោក គាំ ចន្ធី ដែលបានផ្ដល់សម្ភាសន៍ថា កញ្ញា ឌុច លីដា ក្រៅពីជាតារាដែលពិបាកធ្វើការរឿងពេលវេលា នាងក៏មានទម្លាប់មិននិយាយទូរសព្ទដោយអោយតែជំនួយជាអ្នកលើក ហើយពេលណាត់ម៉ោង៦ ម៉ោង៨ ឬម៉ោង១០ទើបដល់ ខណៈដែលក្នុងថ្ងៃខ្លះគឺនាងសុំសម្រាក២បីម៉ោងដោយអះអាងនៅស្រវឹងពីយប់។
លោក ហេង កក្កដា បន្តថាលោកមិនដឹងថាអ្វីដែលលោក គាំ ចន្ធី និយាយពី ឌុច លីដា ជាការពិតឬយ៉ាងណានោះទេ ប៉ុន្តែលោកនៅតែលើកទឹកចិត្តអោយតារាសម្ដែងគ្រប់រូបមានការទទួលខុសត្រូវ និងគួរកែប្រែទម្លាប់ដើម្បីអោយមានទំនួលខុសត្រូវច្បាស់លាស់ ដោយមិនអាចត្រូវថតព្រឹកស្អែក ហើយក៏ផឹកដល់យប់បានទេ។
លោកថាតារាសិល្បៈបើទោះជាមានទេពកោសល្យប៉ុណ្ណាក៏ដោយ ប៉ុន្តែបើពេលចេញថតមានសភាពងងុយគេង ឬនៅជាប់ជាតិស្រវឹងក្នុងខ្លួន គឺអារម្មណ៍ក្នុងការសម្ដែង និងការលេងទឹកមុខក៏មានផលប៉ះពាល់នោះដែរ ដោយលោកបានចាត់ទុកថាតារាដែលមានទម្លាប់មិនថែសុខភាពបែបនេះ គឺអារម្មណ៍ក្នុងពេលសម្ដែងក៏ពិតជាមិនល្អតាមប្លង់សម្ដែង។
លោកទទូចអោយកញ្ញា ឌុច លីដា និងផលិតករធ្វើការសម្របគ្នា ដោយលោកមិនចង់ឃើញឃើញតារាសិល្បៈ មានជម្លោះជាមួយផលិតករនោះទេ។ យ៉ាងណាមិញ លោកថាលោកក៏មិនកាន់ជើងផលិតករនោះដែរដោយសារតែមានផលិតករខ្លះក៏មានទម្លាប់ពិបាកដូចគ្នាដូចជារៀបចំប្លង់ការងារ មិនច្បាស់លាស់ និងពិបាករឿងលុយកាក់ជាដើម។
លោកនិយាយថាជម្លោះរវាងផលិតករនិងតួសម្ដែងជាទូទៅគឺមានកំហុសបន្តិចម្នាក់ ហើយជម្លោះបែបគឺលុះត្រាតែអស់ការអត់ធ្មត់រៀងខ្លួន ទើបបែកចេញក្រៅ។ លោកស្នើអោយភាគីទាំងបន្ថយកំដៅក្នុងការវាយប្រហារគ្នា
ហើយក៏ទទូចសុំអោយតារាសម្ដែងដែលមានទម្លាប់អោយគេរង់ចាំមានការទទួលខុសត្រូវឡើងវិញ ដោយមិនមែនអាងតែខ្លួនជាតួល្បីហើយបង្កផលលំបាកក្នុងពេលសម្ដែងនោះទេ។
ប៉ុន្តែលោកនៅតែអះអាងថាមិនបានដៀមដាមអោយ ឌុច លីដា ក្នុងឃ្លីបរបស់ខ្លួនឡើយ។ គួរបញ្ជាក់ថាហេតុផលនៃជម្លោះគឺដោយសារតែ ឌុច លីដា ស្នើសុំបើកលុយ៥០ភាគីពីលោក គាំ ចន្ធី កាលពីថ្ងៃទី១០ តុលា ហើយដោយសារតែការសុំបើកនោះត្រូវបានពន្យារទៅថ្ងៃស្អែក ទើបបណ្ដាលអោយ ឌុច លីដា ឆេះដុំរហូតផ្ទុះជម្លោះតាមឆាត ហើយឈានទៅបង្ហោះនៅលើហ្វេសប៊ុកវាយប្រហារលោក គាំ ចន្ធី ក្រោយការបង្ហោះរបស់នាង លោក គាំ ចន្ធី ក៏ចេញមុខវាយបកមកវិញ ដោយមកទល់ពេលនេះ នៅមិនទាន់មានប្រតិកម្មណាមួយពី ឌុច លីដា ឡើយ៕