សេចក្ដីរាយការណ៍ បានឲ្យដឹងថា សេដ្ឋកិច្ចម៉ាឡេស៊ី បានកើនឡើង ក្នុងកម្រិត ៤.៣ភាគរយនៅក្នុងត្រីមាសទី ៣ ក្នុងឆ្នាំនេះ បើធៀបទៅនឹងរយៈពេលដូចគ្នាក្នុងឆ្នាំកន្លងមក។
សារព័ត៌មាន Channel News Asia បានផ្សាយថា កំណើនសេដ្ឋកិច្ចក្នុងកម្រិតនេះ បានធ្វើឲ្យសេដ្ឋកិច្ចប្រទេសនេះ វិលទៅរកកំណើនឡើងវិញ បន្ទាប់ពីមានកំណើនយឺតយ៉ាវនៅក្នុងត្រីមាសនីមួយៗអស់រយៈពេល ៥ឆ្នាំកន្លងមក។ ទូរលេខកំណើននេះ បានមកពីការចេញផ្សាយរបស់ធនាគារកណ្ដាលរបស់ម៉ាឡេស៊ី កាលពីថ្ងៃម្សិលមិញ។
ធនាគារកណ្ដាលម៉ាឡេស៊ី បាននិយាយក្នុងសេចក្ដីប្រកាសព័ត៌មាននោះថា កំណើននៅក្នុងវិស័យធំៗ មានដំណើរស្របគ្នានឹងតម្រូវការក្នុងស្រុក។ ធនាគារនេះ បញ្ជាក់ថា វិស័យសំខាន់ៗដែលទទួលបានកំណើន មានសេវកម្មមានកំណើន ៦.១ភាគរយ វិស័យឧស្សាហកម្មមានកំណើន ៤.២ភាគរយ វិស័យរ៉ែ កើនឡើង ៣.៦ភាគរយ និងវិស័យសំណង់កើនឡើង ៧.៩ភាគរយ។ ទោះជាយ៉ាងណា វិស័យកសិកម្មបែរជាធ្លាក់ចុះអស់ ៥.៩ភាគរយទៅវិញ។
តម្រូវការក្នុងស្រុក ដោយមិនរាប់បញ្ចូលកំណើនទីផ្សារភាគហ៊ុននោះ បានកើនឡើង ៤.៧ភាគរយនៅត្រីមាសទី ៣ កន្លងមកនេះ បើធៀបនឹងត្រីមាសទី ៣ ឆ្នាំ២០១៥កន្លងមក។ ចំណែកការនាំចេញទំនិញ និងសេវាកម្ម ក៏បានកើនឡើង ៥.៩ភាគរយផងដែរ។
ការចំណាយរបស់វិស័យឯកជន បានកើនឡើង ៦ភាគរយ ដោយការចំណាយលើការប្រើប្រាស់របស់វិស័យឯកជន កើនឡើង ៦.៤ភាគរយ ខណៈការវិនិយោគរបស់វិស័យនេះ បានកើនឡើង ៤.៧ភាគរយ៕
