រដ្ឋការប្រធានាធិបតី បារ៉ាក់ អូបាម៉ា បានផ្អាកកិច្ចខិតខំប្រឹងប្រែងរបស់ខ្លួន ក្នុងការជម្នះឲ្យសភាអនុម័តកិច្ចព្រមព្រៀងពាណិជ្ជកម្មសេរីអាស៊ីទៅវិញហើយ នៅមុនប្រធានាធិបតីជាប់ឆ្នោត លោក ដូណាល់ ត្រាំ ចូលកាន់តំណែង។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
បើតាម Reuters រដ្ឋការលោក អូបាម៉ា នឹងទុកឲ្យលោក ត្រាំ និងក្រុមសមាជិកសភាបក្សសាធារណរដ្ឋ សម្រេចពីជោគវាសនានៃកិច្ចព្រមព្រៀងពាណិជ្ជកម្មសេរីនេះ។
Reuters បានដកស្រង់សម្ដីក្រុមមន្ត្រីរដ្ឋការ ដែលបាននិយាយថា លោក អូបាម៉ា នឹងព្យាយាមពន្យល់ពីស្ថានការណ៍នេះ ទៅមេដឹកនាំនៃបណ្ដាប្រទេសចំនួន ១១ នៃកិច្ចព្រមព្រៀងដៃគូពាណិជ្ជកម្មតំបន់ប៉ាស៊ីហ្វិក នៅសប្ដាហ៍ក្រោយ នៅពេលលោក អូបាម៉ា ចូលរួមជំនួបកំពូលថា្នក់តំបន់នៅប្រទេសប៉េរូ។
រដ្ឋមន្ត្រីគណៈរដ្ឋមន្ត្រីលោក អូបាម៉ា និងការិយាល័យតំណាងពាណិជ្ជកម្មអាមេរិក បានបញ្ចុះបញ្ចូលក្រុមសមាជិកសភាជាច្រើនខែ ដើម្បីឲ្យអនុម័តលើកិច្ចព្រមព្រៀងពាណិជ្ជកម្ម TPP នេះ នៅក្រោយការបោះឆ្នោត។ ទោះជាយ៉ាងណា ជ័យជម្នះរបស់លោក ត្រាំ និងការរក្សាបានអាសនៈភាគច្រើននៅក្នុងសភារបស់បក្សសាធារណរដ្ឋ បានរារាំងដល់ផែនការនោះ៕
