តម្លៃប្រេងបានហក់ឡើងជាង ៥ភាគរយនៅថ្ងៃចន្ទនេះ បន្ទាប់ពីបណ្ដាប្រទេសផលិតប្រេងជាសមាជិកអង្គការ OPEC និងមិនមែនជាសមាជិកអង្គការ OPEC បានឯកភាពគ្នាក្នុងការកាត់បន្ថយទិន្នផលប្រេង និងកាត់បន្ថយផលិតកម្មប្រេងសកល ខណៈដែលតម្លៃប្រាក់ដុល្លារបន្តមានកំណើន។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
កិច្ចព្រមព្រៀងរវាងបណ្ដាប្រទេសសមាជិកអង្គការ OPEC និងបណ្ដាប្រទេសផលិតប្រេងមួយចំនួនទៀត គឺជាសកម្មភាពរួមគ្នាលើកដំបូងគិតចាប់តាំងពីឆ្នាំ២០០១មក បន្ទាប់ពីតម្លៃប្រេងបានធ្លាក់ចុះទាបអស់រយៈពេលជាង ២ឆ្នាំមកហើយ ដែលនាំឲ្យរដ្ឋាភិបាលជាច្រើនប្រឈមមុខនឹងកង្វះថវិកា និងជំរុញឲ្យមានចលាចលក្នុងប្រទេសនានាចាប់ពីមជ្ឈឹមបូព៌ា រហូតដល់តំបន់អាមេរិកឡាទីន។
ប្រេងឆៅសម្រាប់លក់ក្នុងខែកុម្ភៈខាងមុខ បានកើនឡើង ៥ភាគរយ ឬមានតម្លៃ ៥៦.៩៤ដុល្លារក្នុងមួយបារ៉ែលនៅថ្ងៃចន្ទនេះ ខណៈតម្លៃប្រេងឆៅនៅអាមេរិក បានកើនឡើងប្រហាក់ប្រហែលគ្នាទៅដល់តម្លៃ ៥៤.០៧ដុល្លារក្នុងមួយបារ៉ែល។
តម្លៃរូបិយប័ណ្ណ និងតម្លៃភាគហ៊ុនថាមពល ក៏បានកើនឡើងផងដែរ បន្ទាប់ពីទទួលបានកំណើនខ្លាំងនៅលើទីផ្សារ Wall Street កាលពីថ្ងៃសុក្រសប្ដាហ៍មុន។
ទីផ្សារភាគហ៊ុនថាមពល និងធនធាន បានជួយជំរុញកំណើនរូបិយប័ណ្ណដុល្លារអូស្ត្រាលី ០.៣ភាគរយ ប៉ុន្តែ តម្លៃផ្សារហ៊ុននៅតំបន់អាស៊ីប៉ាស៊ីហ្វិក លើកលែងតែជប៉ុនចេញ មិនមានកំណើននោះឡើយ បន្ទាប់ពីទទួលបានកំណើនខ្លាំងកាលពីសប្ដាហ៍មុន៕