តំណាងសហភាពអឺរ៉ុបប្រចាំកម្ពុជា លោក George Edgar បានឲ្យដឹងថា សហភាពអឺរ៉ុបបានសម្រេចផ្ដាច់ជំនួយផ្ដល់ទៅគណៈកម្មាធិការជាតិរៀបចំការបោះឆ្នោត គ.ជ.ប. ហើយ បន្ទាប់ពីគណបក្សប្រឆាំងដ៏ធំជាងគេនៅក្នុងប្រទេសកម្ពុជា ត្រូវបានរំលាយចោលកាលពីខែមុន។
លោក George Edgar បានប្រកាសឲ្យដឹងអំពីសេចក្ដីសម្រេចបែបនេះ នៅក្នុងលិខិតជូនដំណឹងមួយផ្ញើទៅប្រធាន គ.ជ.ប. លោក ស៊ិក ប៊ុនហុក នៅថ្ងៃទី១២ ខែធ្នូនេះ។
ក្នុងលិខិតជូនដំណឹងដែលផ្ញើភ្ជាប់ជូនទៅរដ្ឋមន្ត្រីក្រសួងការបរទេស លោក ប្រាក់ សុខុន និងរដ្ឋមន្ត្រីសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន ផងនោះ លោក George Edgar បានប្រាប់ទៅលោក ស៊ិក ប៊ុនហុក ថា គណៈកម្មការអឺរ៉ុប បានសម្រេចផ្អាកជំនួយដែលត្រូវបានផ្ដល់ទៅឲ្យ គ.ជ.ប. តាមរយៈការិយាល័យសេវាកម្មគម្រោងអង្គការសហប្រជាជាតិ (UNOPS)។
សហភាពអឺរ៉ុប បានសម្រេចចិត្តផ្អាកជំនួយដល់ស្ថាប័នរៀបចំការបោះឆ្នោតបែបនេះ បន្ទាប់ពីគណបក្សសង្គ្រោះជាតិ ដែលទទួលបានសំឡេងឆ្នោតគាំទ្រប្រហែល ៣លានសំឡេង នៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកាកន្លងមក ហើយថ្នាក់ដឹកនាំ ១១៨រូបរបស់បក្សនេះ ក៏ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំថែមទៀត។
ខណៈដែលមេដឹកនាំបក្សនេះលោក កឹម សុខា បន្តស្ថិតនៅក្នុងការឃុំខ្លួនក្រោមការចោទថា «ក្បត់ជាតិ» នោះ អាសនៈសភាចំនួន ៥៥របស់បក្សប្រឆាំង ក៏ត្រូវបាន គ.ជ.ប. សម្រេចដកហូត និងបែងចែកទៅឲ្យគណបក្សផ្សេង ដែលមិនត្រូវបានពលរដ្ឋបោះឆ្នោតឲ្យ។
តំណាងសភាពអឺរ៉ុប លោក George Edgar បានប្រាប់ទៅប្រធាន គ.ជ.ប. លោក ស៊ិក ប៊ុនហុក ថា ការរំលាយបក្សប្រឆាំង មានន័យថា គ.ជ.ប. មិនអាចចាត់ចែងការបោះឆ្នោតជ្រើសរើសតំណាងរាស្ត្រនៅឆ្នាំ២០១៨ខាងមុខនោះឡើយ។
លោកបន្ថែមថា ដរាបណាបក្សប្រឆាំងដ៏ធំនេះ ត្រូវបានគេផាត់ចេញ ដំណើរការបោះឆ្នោតខាងមុខ មិនអាចឲ្យគេចាត់ទុកថា «ស្របច្បាប់» នោះឡើយ។
អគ្គលេខាធិការរង គ.ជ.ប លោក សោម សូរីដា បានបង្ហាញការសោកស្តាយចំពោះការផ្អាកជំនួយរបស់សហភាពអឺរ៉ុបនេះ ប៉ុន្តែ លោកអះអាងថា ការសម្រេចបែបនេះរបស់សហភាពអឺរ៉ុប មិនប៉ះពាល់ដល់ដំណើរការរបស់ គ.ជ.ប. និងការបោះឆ្នោតឆ្នាំ២០១៨ខាងមុខនោះទេ ដោយលោកថា នៅមានប្រទេសជាច្រើនទៀតនៅជួយជ្រោមជ្រែងដល់ស្ថាប័នរៀបចំការបោះឆ្នោតមួយនេះ រួមមានជប៉ុន ចិន កូរ៉េខាងត្បូង រុស្ស៊ីជាដើម។
លោកប្រាប់ថា៖ «ទាំងថវិកា ទាំងមធ្យោបាយ ទាំងធនធានមនុស្ស គឺ គ.ជ.ប. បានត្រៀមលក្ខណៈបានគ្រប់គ្រាន់អស់ហើយ។ សម្រាប់ការបោះឆ្នោតជ្រើសតាំងព្រឹទ្ធសភា គឺយើងគ្រោងចំណាយប្រមាណជាង ២លានដុល្លា ហើយសម្រាប់ការបោះឆ្នោតជ្រើសតាំងតំណាងរាស្ត្រ គ្រោងចំណាយប្រហែល ៥២លានដុល្លារ។ អញ្ចឹងអ្វីដែលជាការសម្រេចរបស់សហភាពអឺរ៉ុបព្យួរជំនួយសម្រាប់ការបោះឆ្នោតនេះ គឺមិនប៉ះពាល់ទៅដល់ការបោះឆ្នោតនោះទេ គឺ គ.ជ.ប. នឹងអនុវត្តន៍ភារកិច្ចរបស់ខ្លួនសម្រាប់ការរៀបចំការបោះឆ្នោតនោះ ដោយគ្មានលើកពេលវេលានៃការបោះឆ្នោតទេ»។
ខណៈដែលសហភាពអឺរ៉ុបព្រមានមិនទទួលស្គាល់ដំណើរការបោះឆ្នោតនាពេលខាងមុខនោះ លោក សោម សូរីដា ប្រាប់ថា វាមិនសំខាន់សម្រាប់ គ.ជ.ប. នោះទេ ដោយថា អ្វីដែលសំខាន់សម្រាប់ គ.ជ.ប. នោះ គឺការគោរពច្បាប់កម្ពុជា។
មន្ត្រីជាន់ខ្ពស់ផ្នែកស៊ើបអង្កេតរបស់អង្គការខុមហ្វ្រែល លោក កន សាវាង្ស លើកឡើងថា រដ្ឋាភិបាលគួរតែពិចារណាឡើងវិញពីសកម្មភាពរបស់ខ្លួន ដើម្បីកែប្រែស្ថានភាពឲ្យមានភាពល្អប្រសើរឡើងវិញ។ លោកថា បញ្ហាជាច្រើននឹងកើតមានជាបន្តបន្ទាប់សម្រាប់កម្ពុជា ប្រសិនជាប្រទេសលោកសេរីចាប់ផ្តើមឈប់ផ្តល់ជំនួយ និងមិនទទួលស្គាល់ការបោះឆ្នោតនោះ។
លោកថា៖ «អាចរាលដាលទៅជំនួយផ្សេងៗ ដូចជា វិស័យអភិវឌ្ឍន៍ ជាពិសេសរោងចក្រ ឬក៏អីផ្សេងៗដែលខោអាវដែល EUជួយក្នុងការបន្ថូរបន្ថយពន្ធក្នុងការនាំចូលផលិតផលទាំងអស់នោះទៅស្រុកគេទៀត។ នេះគឺរឹតតែប៉ះពាល់ដល់សេដ្ឋកិច្ច ឬមួយជីវភាពរស់នៅរបស់ប្រជាពលរដ្ឋ បងប្អូនកម្មករថែមទៀត នេះហើយដែលជាបញ្ហាផលវិបាក នៃការកាត់បន្ថយជំនួយរបស់សហគមន៍អឺរ៉ុបនោះ»។
សហគមន៍អន្តរជាតិ បានថ្កោលទោសរដ្ឋាភិបាលកម្ពុជាជាបន្តបន្ទាប់ ដោយមើលឃើញថា កម្ពុជាកំពុងដើរចាកឆ្ងាយពីគន្លងលទ្ធិប្រជាធិបតេយ្យសេរីពហុបក្ស៕
