សមត្ថកិច្ចបានចាប់ខ្លួនមន្រ្តីបក្សប្រឆាំងម្នាក់នៅខេត្តសៀមរាប ដោយចោទថាបានបូមខ្សាច់លក់ដោយគ្មានការអនុញ្ញាត តែគណបក្សប្រឆាំងចាត់ទុកថានេះ ជារឿងនយោបាយ ខណៈដែលសមាជិកខ្លួនរូបនេះត្រៀមឈរឈ្មោះសម្រាប់ការបោះឆ្នោតឃុំនាពេលខាងមុខ។
អនុប្រធានគណៈកម្មការប្រតិបត្តិបក្សសង្គ្រោះជាតិខេត្តសៀមរាប លោកសុខ គឹមសេង បានប្រាប់វីអូឌី(VOD)ថា អនុប្រធានគណៈកម្មការប្រតិបត្តិបត្តិស្រុកអង្គរជុំដែលតៀមខ្លួនជាបេក្ខជនឈរឈ្មោះជាក្រុមប្រឹក្សាឃុំតាសោម លោក ថុន ធឿត ត្រូវបានសមត្ថកិច្ចស្រុកវ៉ារិនចាប់ខ្លួនកាលពីថ្ងៃ១១ មករារួចបញ្ជូនទៅតុលាការខេត្តសៀមរាបដោយចោទថាបូមខ្សាច់លក់ដោយគ្មានការអនុញ្ញាត។
លោក គឹមសេង បានទទួលស្គាល់ថាលោកថុន ធឿតពិតជាបានបូមខ្សាច់លក់មែនតែលោកថាការចាប់ខ្លួននេះគឺពាក់ព័ន្ធនឹងរឿងនយោបាយច្រើនជាង ព្រោះលោកថា លោក ថុន ធឿត ធ្លាប់ត្រូវបានអាជ្ញាធរស្រុកអង្គជុំណែនាំឲ្យចេញពីបក្សប្រឆាំងប្រសិនជាចង់ប្រកបរបរបូមខ្សាច់នេះ។
លោកថា៖ «ខ្ញុំយល់ថាជាហេតុផលនយោបាយព្រោះហេតុផលនៃការចាប់ខ្លួននោះគឺមិនសមរម្យ! ដូចខ្ញុំជម្រាបចឹងថាកន្លងទៅមានការរកស៊ីជាលក្ខណៈគ្រួសារ នៅជុំវិញតំបន់ហ្នឹងហេតុអីមិនចាប់។ គ្រាន់តែមានការឃាត់ខ្លួន ឃាត់សម្ភារៈហើយដោះស្រាយទៅលែងវិញ តែដោយឡែកគាត់ហេតុអីត្រូវចាប់ខ្លួនទីមួយ ទីពីរដូចខ្ញុំជម្រាបអញ្ចឹងថាមានការចរចាក្រៅផ្លូវការពាក់ព័ន្ធនឹងរឿងគាត់ចូលរួមនយោបាយជាមួយបក្សសង្គ្រោះជាតិហ្នឹង ហើយចុងក្រោយគឺគាត់បានបញ្ចេញសកម្មភាពក្នុងនាមជាសកម្មជនបក្សសង្គ្រោះជាតិ ហើយគាត់នឹងក្លាយទៅជាបេក្ខជនឈរឈ្មោះក្នុងឃុំនោះផង ទើបធ្វើឲ្យមានបញ្ហា!»។
អធិការនគរបាលស្រុកវ៉ារិនលោក ណុប សារ៉ាក់ បានឲ្យវីអូឌីដឹងថា ការចុះទៅចាប់ខ្លួនលោក ថុន ធឿត នោះគឺដោយសារមានដីកាបង្គាប់ឲ្យនាំខ្លួនចេញពីចៅក្រមស៊ើបសួរនៃសាលាដំបូងខេត្តសៀមរាបលោក រ៉ាន់ សុភ័ក្រ។ លោកបញ្ជាក់ថានេះគឺជាការអនុវត្តច្បាប់មិនពាក់ព័ន្ធនឹងរឿងនយោបាយនោះទេ។
លោកថា៖ «ការងារអីផ្សេងៗខ្ញុំមិនបានជ្រាបទេ ព្រោះខ្ញុំធ្វើតាមតែបញ្ជារបង្គាប់ឲ្យនាំខ្លួនចុះថ្ងៃទី៩ ខែមករា ឆ្នាំ២០១៧ តែប៉ុណ្ណោះ។ … បើតាមខ្ញុំដឹងវានេះជាសំណុំរឿងចាស់របស់គាត់មក គេចាប់ប្រមូលយកវត្ថុតាង(កាលពីខែតុលា ឆ្នាំ២០១៦) ដល់ពេលអញ្ចឹងទៅគេដាក់ទៅព្រះរាជអាជ្ញា អញ្ចឹងព្រះរាជអាជ្ញាគាត់បើកការចោទ អញ្ចឹងគេបញ្ជូនសំណុំរឿងមកចៅក្រមជំនុំជម្រះ។ អញ្ចឹងបើតាមនីតិវិធីប្រហែលជាគេចេញដីកាចូលខ្លួនហើយគាត់អត់ចូលបានជាចេញដល់ដីកានាំខ្លួននោះ»។
បើតាមអធិការរូបនេះ លោក ថុន ធឿត ត្រូវបានតុលាការខេត្តសៀមរាបចោទប្រកាន់ពាក់ព័ន្ធនឹងការធ្វើអាជីវកម្មបូមយករ៉ែខ្សាច់ដោយគ្មានអាជ្ញាប័ណ្ណ។
មន្ត្រីសម្របសម្រួលរបស់អង្គការលីកាដូខេត្តសៀមរាបលោក ម៉ែន គឹមសួរ មានប្រសាសន៍ថាលោកមិនទាន់ទទួលបានដំណឹងពីចាប់ខ្លួនមន្ត្រីបក្សប្រឆាំងនេះទេ តែលោកថាប្រសិនជាការអនុវត្តន៍ច្បាប់នោះតែទៅលើមន្ត្រីរបស់បក្សប្រឆាំង ហើយអ្នកផ្សេងដែលប្រព្រឹត្តិដូចគ្នានោះមិនត្រូវបានច្បាប់អនុវត្តន៍នោះវាអាចជាចេតនានយោបាយ។
លោកថា៖ «បើសិនជាមានបទល្មើសហ្នឹងពិតប្រាកដមែន តួនាទីរបស់អាជ្ញាធររបស់សមត្ថកិច្ចវាត្រឹមត្រូវហើយ បើអត់មានអជ្ញាប័ណ្ណយើងទៅប្រព្រឹត្តសកម្មភាពដែលផ្ទុយនឹងច្បាប់នោះណា! តែប្រសិនជារូបភាពអ្នកស្រុកអ្នកដទៃទៀតគេធ្វើដែរអត់មានការអនុវត្តន៍ច្បាប់លើ តែអនុវត្តន៍តែលើមន្ត្រីបក្សប្រឆាំងអាហ្នឹងវាអាចករណីនយោបាយ តែគ្រាន់ថាជាអាចទេណាមិនអាចថា១០០%ជាករណីនយោបាយទេ»។
បើតាមមន្ត្រីបក្សប្រឆាំង លោកសុខ គឹមសេង ថាខ្លួនកំពុងស្វែងរកជំនួយពីមេធាវីក្នុងការពារមន្ត្រីរបស់ខ្លួន និងសុំឲ្យមន្ត្រីខ្លួនបាននៅក្រៅឃុំបណ្តោះអាសន្ន។ លោកអះអាងថា ការចាប់ខ្លួនមន្ត្រីរបស់ខ្លួនគឺជាភាពលំអៀងរបស់អ្នកអនុវត្តន៍ច្បាប់ ខណៈដែលអ្នកផ្សេងដែលប្រកបការបូមខ្សាច់នេះដោយគ្មានអាជ្ញាប័ណ្ណដូចគ្នានោះមិនត្រូវបានសមត្ថកិច្ចឃាត់នោះទេ៕