រដ្ឋាភិបាលបានប្រាប់ទៅនាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិប៉ោយប៉ែត ឲ្យឈប់យកលុយពីប្រជាពលរដ្ឋខ្មែរទូទៅដែលឆ្លងកាត់ចេញចូលផ្សាររុងក្លឿប្រទេសថៃ ដោយមិនបានបញ្ជាក់ពីមូលហេតុច្បាស់លាស់នោះទេ។
ការសម្រេចរបស់រដ្ឋាភិបាលនេះ ទំនងជាចង់ឲ្យប្រជាពលរដ្ឋស្ងប់ចិត្ត ករណីចាប់ខ្លួន លោក ឌិន ពុទ្ធី ក្រោយពីតុលាការខេត្តបន្ទាយមានជ័យ សម្រេចចោទពីបទហិង្សាដោយចេតនានិងមានស្ថានទំងន់ទោស បន្ទាប់ពីមន្ដ្រីប៉ូលិសព្រំដែនលោក ឈាន ពិសិដ្ឋ ដួលមុខឡានមន្ដ្រីបក្សប្រឆាំងរូបនោះ កាលពីថ្ងៃទី២៣ ខែធ្នូ ឆ្នាំ២០១៦កន្លងមក។
លិខិតរដ្ឋបាលសាលាខេត្តបន្ទាយមានជ័យ ចុះថ្ងៃទី១២ ខែមករា ឆ្នាំ២០១៧ម្សិលមិញ បានដកស្រង់សម្តីលោក កែ គឹមយ៉ាន ប្រធានក្រុមការងារចុះមូលដ្ឋានខេត្តនេះមានខ្លឹមសារថា ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែតនិងលោកនាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិទំាងនោះ ត្រូវបញ្ឈប់ការយកកម្រៃលក់លិខិតអនុញាតបណ្តោះអាសន្ន១០០០រៀល(១០បាត) ចេញ-ចូល ផ្សាររុងក្លឿប្រទេសថៃ ពីប្រជាពលរដ្ឋទូទៅ។ ប៉ុន្តែសេវាផ្សេងៗរដ្ឋបាលខេត្តនិងស្ថាប័នពាក់ព័ន្ធខាងលើ ត្រូវបន្តយកចិត្តទុកដាក់បម្រើសេវាជូនប្រជាពលរដ្ឋ ប្រកបដោយតម្លាភាព សមធម៌ និងទាន់ពេលវេលា។
ប្រជាពលរដ្ឋរស់នៅក្រុងប៉ោយប៉ែត ខេត្តបន្ទាយមានជ័យ លោក ប៊ុន សុទ្ធី សាទរនឹងរដ្ឋាភិបាលដែលមិនឲ្យពលរដ្ឋបង់កម្រៃលក់លិខិតអនុញ្ញាតបណ្តោះអាសន្ន ចេញ-ចូល ផ្សាររុងក្លឿប្រទេសថៃ។ ប៉ុន្តែលោកថា ករណីនេះមិនអាចធ្វើឲ្យពលរដ្ឋស្ងប់ចិត្ត ឈប់តវ៉ារកយុត្តិធម៌ឲ្យមន្ត្រីបក្សប្រឆំាងលោក ឌិន ពុទ្ធី បាននោះទេ៖ «វាអាចដូចថាលួងលោមប្រជាពលរដ្ឋ លួងលោមពលករ កម្មករដែលគាត់ចេញចូលនៅច្រកហ្នឹង(ច្រកទ្វារអន្តរជាតិប៉ោយប៉ែត) គាត់ក៏កាត់បន្ថយនូវលុយការបង់ការចំណាយ ធ្វើឲ្យគេយល់ថារដ្ឋាភិបាលល្អឡើងវិញ ចេះកែទម្រង់ វាអាចថាកុំឲ្យមានការផ្ទុះកំហិង្សតវ៉ាថា កុំឲ្យរដ្ឋាភិបាលពុករលួយខ្លំាងពេក អាក្រក់ខ្លំាងពេក ក៏វាជាចំណែកមួយដែរ»។
អ្នកសម្របសម្រួលអង្គការលីកាដូប្រចំាខេត្តបន្ទាយមានជ័យ លោក ភុន ឈិន យល់ថា ការបញ្ឈប់យកកម្រៃលក់លិខិតអនុញ្ញាតបណ្តោះអាសន្ន១០០០រៀល(១០បាត) ចេញ-ចូល ផ្សាររុងក្លឿប្រទេសថៃ ពីប្រជាពលរដ្ឋទូទៅ រដ្ឋាភិបាលគួរតែបញ្ឈប់យករហូតជាការល្អ។
ដោយឡែក ករណីលោក ឌិន ពុទ្ធី និងមន្ត្រីប៉ូលីសលោក ឈាន ពិសិដ្ឋ លោកថាទុកឲ្យភាគីទំាងពីរដោះស្រាយគ្នាតាមច្បាប់៖ «ចំពោះថាតើអ្នកដែលត្រូវបានគេឃុំខ្លួន ដោយមិនត្រឹមត្រូវ ឬយ៉ាងម៉េច គាត់ចង់ប្តឹងទាមទារ ឬក៏គាត់ចង់សម្របសម្រួលឲ្យវាស្ងប់ចិត្តគឺជាសិទ្ធិរបស់គាត់ខ្លួនឯង ខ្ញុំគិតថាវាដូចជាមិនមានអីពាក់ព័ន្ធគ្នាទេ»។
អភិបាលខេត្តបន្ទាយមានជ័យ លោក សួន បរវ បានថ្លែងនៅក្នុងកិច្ចប្រជុំមួយកាលពីល្ងាចថ្ងៃទី៩ខែមករាថា លោកចង់ឲ្យមានការសម្របសម្រួលគ្នារវាង លោក ឈាន ពិសិដ្ឋ ជាមួយលោក ឌិន ពុទ្ធី ដើម្បីបញ្ចប់បញ្ហា។ ជាមួយគ្នានោះ លោកបន្តថា លោកនឹងស្នើទៅក្រសួងមហាផ្ទៃឲ្យផ្ទេរការងារលោក ឈាន ពិសិដ្ឋ ចេញពីក្រុងប៉ោយប៉ែត ដើម្បីឲ្យប្រជាពលរដ្ឋស្ងប់អារម្មណ៍។
ទោះជាយ៉ាងណា លោក ឌិន ពុទ្ធី ត្រូវបានតុលាការខេត្តបន្ទាយមានជ័យឃុំខ្លួនជិតមួយខែហើយ បើទោះជាមានការតវ៉ាពីសំណាក់ពលរដ្ឋរាប់រយនាក់ និងក្រុមគ្រួសារសុំដោះលែងលោករូបក៏ដោយតែនៅថ្ងៃនេះសាលាឧទ្ធរណ៍បានសម្រេចឲ្យនៅក្រៅឃុំ៕