ការប្រកួតអន្តរជាតិប្រចាំសប្ដាហ៍របស់ទូរទស្សន៍អាស៊ីអាគ្នេយ៍ កីឡាករកម្ពុជានិងថៃប៉ះគ្នា ទទួលបានអ្នកគាំទ្រយ៉ាងខ្លាំង ដោយសារតែភាគីម្នាក់ៗប្រឹងប្រែងរៀងខ្លួនតាំងពីដើមទឹករហូតដល់ចប់ បើទោះជាកីឡាកររបស់កម្ពុជាម្នាក់ ត្រូវគេកត់សម្គាល់ថាឆាប់ហត់បណ្ដោយអោយបច្ចេកទេសប្រកួតធ្លាក់ដៃ។ ជាមួយនឹងការប្រកួតស្វិតស្វាញ គេឃើញកីឡាករ ម៉ន វិរៈ បានត្រឹមបរាជ័យ ក្នុងពេលកីឡាករ ជា សំនៀង បានត្រឹមឈ្នះពិន្ទុទាំងវេទនា។
ការប្រកួតដែលបានធ្វើឡើងចាប់ផ្ដើមឡើងចាប់ពីម៉ោង៨ព្រឹករហូតដល់ម៉ោងជិត១១ថ្ងៃត្រង់នាថ្ងៃអាទិត្យ ទី១២ កុម្ភៈ ក្រោមការរៀបប្រដាល់របស់ទូរទស្សន៍អាស៊ីអាគ្នេយ៍នោះ ត្រូវគេឃើញមានការចូលរួមទស្សនាយ៉ាងច្រើនកុះករមិនខុសពីសព្វដង បើទោះជាការប្រកួតនាថ្ងៃនោះត្រូវចំថ្ងៃចុងក្រោយ ដែលមានពលរដ្ឋខ្មែរភាគច្រើននិយមដើរកម្សាន្ត។
អ្នករៀបចំកម្មវិធីបានអះអាងថាអ្នកទស្សនានៅតែមានចំនួនច្រើន ដោយសារតែក្នុងចំនួនអ្នកដើរលេងសម្រាប់ឱកាសថ្ងៃសម្រាក អាចមិនមែនជាអ្នកគាំទ្រភាគច្រើននៅក្នុងវិស័យបាល់ទាត់ និងអាចថាបណ្ដាលមកពីការប្រកួតរវាងកីឡាករកម្ពុជានិងកីឡាករថៃ មានការកន្ទ្រាក់អារម្មណ៍អ្នកដែលមិនទៅដើរលេង ដែលធ្វើអោយស្ទីឌីយោរបស់ទូរទស្សន៍អាស៊ីអាគ្នេយ៍ដែលធ្វើការប្រកួតប្រដាល់កាលពីថ្ងៃអាទិត្យនោះ។
យ៉ាងណាមិញ ចំនួនអ្នកទស្សនាមិនច្រើនកុះករពេញសាលនិងលើឆាកហូរហៀរពេញរេញដូចគ្នានឹងការប្រកួតសព្វដងនោះទេ បើទោះជាមានចំនួនច្រើន ដែលធ្វើអោយកីឡាករទាំងកម្ពុជានិងថៃ មានកម្លាំងចិត្តក្នុងការប្រកួតគ្នានៅក្នុងថ្ងៃនោះ។ កីឡាករកម្ពុជា២រូប គឺ ម៉ន វិរៈ និង ជា សំនៀង បានក្លាយជាគូប្រកួតស៊ីសាច់ហុតឈាមគួរអោយសរសើរជាមួយកីឡាករថៃនៅលើសង្វៀន។
អ្នករៀបចំការប្រកួតបានអះអាងថា កីឡាករទាំង៤ត្រូវអោយប៉ះគ្នា ដើម្បីរំលេចសមត្ថភាពនៅលើសង្វៀន ហើយម្នាក់ៗក៏ធ្វើអោយមហាជនពេញចិត្តណាស់ដែរក្នុងការវាយប្រដេញយកពិន្ទុពីគ្នាទៅវិញទៅមក។
លោកថាកីឡាករកម្ពុជាទាំងពីរសុទ្ធតែបានត្រៀមខ្លួនមុនពេលប៉ះគ្នា ទើបធ្វើអោយការប្រកួតដែលបានធ្វើឡើងមានភាពស្វិតស្វាញតាំងពីដើមទីដល់ចប់ រហូតធ្វើអោយអ្នកទស្សនាស្រែកហ៊ោកញ្រ្ជៀវយ៉ាងកងរំពឹងឡើងខ្ទរសង្វៀន។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ ម៉ន វិរៈ មកពីក្លិបការិយាល័យទី៥កងទ័ពជើងគោក អោយឡើងប៉ះប្រកួតជាមួយកីឡាកថៃឈ្មោះ Vath Chhalaksak ក្នុងនាមជាគូឯករងបើកឆាកគូអន្តរជាតិសម្រាប់ប្រដាល់អន្តរជាតិនៅព្រឹកម្សិលម្ងៃនោះ។
លោកថាជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់អោយគេប៉ះគ្នាដើម្បីរំលេចព្រឹត្តិការណ៍មុនការមកដល់នូវទិវារនៃក្ដីស្រឡាញ់នោះតែម្ដង ទើបលោកនិងក្រុមការងារដាក់ពួកគេប៉ះគ្នាដោយលោកប្រកាសថាត្រូវចិត្ត។ លោកថាកីឡាករ ម៉ន វិរៈ ដែលត្រូវបានចាត់ទុកថាជាជើងខ្លាំងម្នាក់ បានបើកឆាកប្រយុទ្ធតាំងពីដើមដល់ចប់ ប៉ុន្តែការប្រកួតរបស់គេមិនសូវបានផលនោះទេ សម្រាប់ការប្រកួត២ទឹកចុងក្រោយ។
លោកថាដើមទឹករបស់គូនេះសឹងនឹងធ្វើអោយអ្នកទស្សនារកពេលដកដង្ហើមអត់បាន ដោយសារជក់ចិត្ត តែភាពស្វិតស្វាញក៏មិនចប់គោលដៅនោះដែរ ដោយសារតែកីឡាករកម្ពុជាបានធ្លាក់បាក់កម្លាំង។
អ៊ីចឹងហើយទើបធ្វើអោយម្នាក់ៗជាអ្នកទស្សនាភ្ញាក់ផ្អើល បន្ទាប់ពីកីឡាករកម្ពុជាដែលធ្លាប់តែបំបាក់គូប្រកួតដល់ចប់ទឹកបានត្រឹមកំដរដល់ទឹកទី៥ទាំងវេទនាវិញ។
លោកថាកីឡាករថៃមានសមត្ថភាពខ្ពស់ក្នុងការវាយកែង ទាត់ និងម៉ាត់ ជាពិសេសក្នុងទឹកទី៤ និងទី៥ ខណៈដែលទឹកទី២ និងទី៣ កីឡាករកម្ពុជាក៏ប្រកួតបានល្អ តែនៅតែធ្វើអោយអ្នកគាំទ្រខកបំណង។
ក្នុងទឹកចុងក្រោយ លោកថាកីឡាករ ម៉ន វិរៈ កាន់តែត្រូវទក់សាច់ ទើបលទ្ធផលប្រកាសឡើងត្រូវចាញ់ពិន្ទុដោយគ្មានការតវ៉ា។
នៅក្នុងព្រឹត្តិការណ៍នោះដែរ កីឡាករ ជា សំនៀង មកពីក្លិបកងទ័ពឆត្រយោង៩១១ បានឈ្នះការប្រកួតនៅក្នុងថ្ងៃនោះ នៅពេលដែលការប្រកួតត្រូវបានប៉ះគ្នាជាមួយកីឡាករថៃឈ្មោះ Pich Num Ek ដែលជាជើងខ្លាំងម្នាក់ដែរ។ ការប្រកួតរបស់គូនេះត្រូវគេឃើញកំរើកខ្លាំងតាំងពីដើមដល់ចប់ ដោយអាចនិយាយបានថាជាគូជក់ចិត្តសម្រាប់សង្វៀននោះផង។
អ៊ីចឹងហើយទើបលោកគម្រោងអោយគូមួយនេះប៉ះគ្នាជាថ្មីម្ដងទៀត ដើម្បីចង់ដឹងថាក្រោយការប្រកួតចាញ់របស់កីឡាករថៃ តើកីឡាករកម្ពុជា ជា សំនៀង នៅតែឈ្នះដដែលឬមានលទ្ធផលប្រែប្រួល បន្ទាប់ពីបានយកឈ្នះកីឡាករថៃដោយលំបាកក្នុងអំឡុង៥ទឹក។
យ៉ាងណាក៏ដោយ លោកថាជ័យជម្នះរបស់ ជា សំនៀង ស្ថិតក្នុងភាពប្រកៀកប្រកិតជាមួយកីឡាករថៃប៉ុណ្ណោះ គឺមិនបានឈ្នះដាច់នោះឡើយ៕