ខុសពីរឿងបែបកំប្លែង និងភ័យរន្ធត់ភាគច្រើនដែលត្រូវគេរិះគន់ថាមិនមានខ្លឹមសារអប់រំជាសារដល់អ្នកទស្សនា ផលិតករមកពីផលិតកម្ម Wonderfilm Cambodia បានអះអាងថាស្នាដៃរបស់ខ្លួនក្នុងរឿង «ស្នូរជើងអ្នកណា» បានផ្ដោតជាសំខាន់លើទស្សនៈអប់រំយ៉ាងពិសេស ដោយក្នុងរឿងនោះក៏បង្ហាញពីបញ្ហាអវិជ្ជមាននិងលទ្ធផលចុងក្រោយ ដើម្បីអោយអ្នកទស្សនាធ្វើការវិភាគផងដែរ។
ជាមួយគ្នានោះ ក៏បានបញ្ជ្រាបអោយស្គាល់ពីវប្បធម៌ ប្រពៃណីសម័យដើម និងសម័យបច្ចុប្បន្នដើម្បីផ្សារភ្ជាប់រវាងគ្នា អោយអ្នកជំនាន់ក្រោយបានដឹងយ៉ាងពិសេស។
លោក សែម វិសាល អ្នកគ្រប់គ្រងទូទៅប្រចាំផលិតកម្ម Wonderfilm Cambodia បានអះអាងថាការផលិតរឿងនីមួយៗ មិនមែនគ្រាន់តែត្រូវបង្កើតសាច់រឿងមួយដោយមិនបានគិតពីទម្រង់អប់រំ និងសារដាស់តឿនដល់សតិអារម្មណ៍របស់អ្នកទស្សនានៅក្នុងសង្គមនោះទេ ដោយសារតែគ្រប់ភាពយន្តមិនខុសពីអាវុធមុខ២ដែលចាំបាច់ត្រូវតែឆ្លុះបញ្ចាំងពីសារវិជ្ជមានអោយបានច្រើន។
លោកថាភាពយន្តមិនខុសពីកញ្ចក់ឆ្លុះបញ្ចាំងនោះទេ ដោយឥទ្ធិពលរបស់ភាពយន្តងាយនឹងជះទៅលើមហាជនបានលឿន ប្រសិនបើការផលិតគិតតែធ្វើអោយអ្នកទស្សនាសើច និង ភ័យ ហើយមិនផ្ដល់គំនិតអប់រំ។
ក្នុងរឿង «ស្នូរជើងអ្នកណា» លោកថាមានខ្លឹមសារអប់រំធំមួយគឺបង្ហាញពីផលប៉ះពាល់នៃភាពភ្លើតភ្លើនរវាងយុវវ័យនិងយុវវ័យ ដែលបានបណ្ដោយខ្លួនជ្រុលជ្រួសអោយមានកូន ដែលធ្វើអោយនារីខុសឆ្គងក្លាយជានារីបាត់បង់កិត្តិយសនៅក្នុងសង្គម។ សារសំខាន់មួយទៀតគឺលោកចង់បង្ហាញពីផលប៉ះពាល់នៃការយកកូនចេញ និងអសីលធម៌របស់គ្រូពេទ្យដែលចង់បានប្រាក់ ហើយសុខចិត្តទទួលធ្វើសេវាយកកូនចេញ ដែលសុទ្ធតែជារឿងដែលសង្គមមិនគួរនឹងមាន។
អ្វីដែលលោកចង់បង្ហាញ គឺបានបង្ហាញពីទំនាស់បញ្ហាមួយទៀតថាក្នុងនាមជាមេគ្រួសារតើបុរសគួរមានការទទួលខុសត្រូវបែបណាខ្លះ ដើម្បីរក្សា និងការពារគ្រួសារមួយអោយមានសុភមង្គល។ លោកថារឿង «ស្នូរជើងអ្នកណា» ថ្វីដ្បិតថាបានបង្កប់នូវឈុតភ័យខ្លាច និងកំប្លែង តែសារសំខាន់ដែលលោកចង់បង្ហាញគឺសំខាន់ច្រើនណាស់ ដើម្បីអោយអ្នកទស្សនាអង្គុយទស្សនាត្រឹមរយៈពេលជាងមួយម៉ោងតែបានចំណេះដឹង និងបទពិសោធន៍យកទៅគិត។
លោកនិយាយថា៖ «ខ្ញុំធ្វើ៣រឿងហើយ ខ្ញុំតែងគិតពីសារអប់រំជាសំខាន់ ជាក់ស្ដែងដូចរឿង ស្នូរជើងអ្នកណា នេះចឹង ខ្ញុំនិពន្ធដោយផ្ដោតដល់គំនិតអប់រំតែម្ដង ដោយសាច់រឿងហ្នឹងរិះគន់ចំពោះមនុស្សស្រីដែលបណ្ដោយខ្លួនខុសប្រពៃណីជាមួយសង្សារ! រឿងពេទ្យទទួលសេវាកម្មយកកូនចេញ និងរឿងមនុស្សប្រុសអត់មានការទទួលខុសត្រូវអីនៅក្នុងផ្ទះជាដើម!»។
លោកថា នៅចុងបញ្ចប់រឿង លោកបានតម្រូវអោយស្រ្តីបង្ហាញពីការលះបង់ក្នុងការតស៊ូប្រឈមមុខ ហើយបញ្ចេញភាពក្លាហានរហូតអាចដោះស្រាយបញ្ហាធ្ងន់ធ្ងរមួយបាន ដើម្បីជាសារបញ្ជាក់ទៅកាន់អ្នកទស្សនាថាមនុស្សស្រីក៏អាចដោះស្រាយបញ្ហាធំៗបានដែរ បើនារីម្នាក់នោះហ៊ានបញ្ចាញសមត្ថភាពដោះស្រាយ។ លោកថារឿងនេះមានគម្រោងចេញថតផ្លូវការនៅថ្ងៃទី១៧ មីនាខាងមុខ ដោយប្រើរយៈពេល៣ខែដើម្បីបញ្ចប់ ទើបឈានទៅកំណត់ពេលវេលាដាក់បញ្ចាំងតាមរោង។ រឿងនេះគម្រោងចាយដើមទុនប្រមាណ៦ម៉ឺនដុល្លារ ដោយមិនទាន់រាប់បញ្ចូលការចំណាយលើការទិញចូលសម្ភារៈមួយចំនួនបន្ថែមដើម្បីផលិតកុននោះផង។
រឿងនេះលោកបានសម្រេចចិត្តមិនយកតារាសម្ដែងដោយមិនជ្រើសយកតារាល្បីៗដែលមានទីផ្សារថតរឿងតាមរោងភាគច្រើនយកមកសម្ដែងនោះទេ ដោយងាកទៅរើសតារាសម្ដែងដែលលោកយល់ថាជាអ្នកមានសមត្ថភាពអោយត្រូវនឹងសាច់រឿងរបស់លោកច្រើនជាង។
លោកនិយាយថា៖ «ក្នុងរឿងហ្នឹង ខ្ញុំអត់យកតារាដែលគេចូលចិត្តហៅសម្ដែងច្រើនអោយមកលេងទេ ព្រោះអីខ្ញុំអត់ខ្វល់រឿងហ្នឹងអត់មានតួដែលអ្នកចូលចិត្ត ហើយអត់ទិញសំបុត្រទស្សនានោះទេ ខ្ញុំចង់អោយពួកគាត់បានទស្សនាហើយពេញចិត្តនឹងទេពកោសល្យរបស់តួសម្ដែងនីមួយៗច្រើនជាង ព្រោះខ្ញុំត្រូវការគុណភាព អត់ត្រូវយកតួតម្រូវតាមចិត្តយុវ័យមួយក្រុម ហើយធ្វើអោយសាច់រឿងតម្រូវតាមតួវិញទេ!»។
លោកថាភាពយន្តច្រើនឡើង បានក្លាយជាភាពយន្តល្បីល្បាញ ដោយមិនបានជ្រើសយកតួសម្ដែងល្បីៗដែលសំបូរទីផ្សារអោយទៅសម្ដែងនោះទេ ជាក់ស្ដែងភាពយន្តរឿង«វិកលចរឹត» និងរឿងមួយចំនួនគឺភស្ដុតាងស្រាប់។
មិនខុសពីអ្វីដែលលោកអះអាងថា គេឃើញរឿង «កំណត់នាងនាថ» ជ្រើសសុទ្ធយកតារាថ្មីៗអោយសម្ដែងនៅក្នុងរឿងទាំងនោះ ប៉ុន្តែចុងក្រោយតួអង្គនីមួយៗសុទ្ធតែបានក្លាយជាតារាល្បី ដោយសារតែមានសមត្ថភាពសម្ដែងដល់របស់ពួកគេ។ លោកសែម វិសាល បន្តថាលោកនឹងកែទស្សនៈមហាជនអោយងាកមកទទួលស្គាល់សមត្ថភាពតារាសម្ដែងជាជាងប្រកាន់ឈ្មោះតួ ដើម្បីលើកកម្ពស់ភាពយន្តខ្មែរ។ យ៉ាងណាមិញ លោកថាខ្សែរឿង «ស្នូរជើងអ្នកណា» នឹងទទួលជោគជ័យ ដោយសារតែសម្អាងថារឿងនោះមានរសជាតិកំប្លែង ភ័យរន្ធត់ កំសត់ និងមានសារអប់រំខ្ពស់តាំងពីដើមដល់ចប់៕
