សហរដ្ឋអាមេរិកកាលពីថ្ងៃចន្ទម្សិលមិញ បានជំរុញឲ្យអង្គការសហប្រជាជាតិរក្សាការដាក់ទណ្ឌកម្មលើប្រទេសកូរ៉េខាងជើងរហូតដល់មានការរីកចម្រើនឈានដល់ទីក្រុងព្យុងយ៉ាងលុបចោលកម្មវិធីអាវុធនុយក្លេអ៊ែ។
ទីប្រឹក្សាសន្តិសុខជាតិរបស់សហរដ្ឋអាមេរិកលោក HR McMaster បានជួបជាមួយអគ្គរដ្ឋទូតជាច្រើនប្រចាំនៅក្នុងទីក្រុងញូយ៉ក។ ជំនួបនេះធ្វើឡើងប៉ុន្មានថ្ងៃក្រោយពេលប្រធានាធិបតី ដូណាល ត្រាំ ព្រមជួបជាមួយមេដឹកនាំកូរ៉េខាងជើងលោ គីម ជុងអ៊ុន នៅក្នុងខែឧសភាខាងមុខ។
លោក McMaster ថ្លែងថា លោកមានសុទិដ្ឋិនិយមចំពោះឱកាសល្អនៃជំនួបរវាងមេដឹកនាំកូរ៉េខាងជើង និងសហរដ្ឋអាមេរិកនេះ។ ទោះយ៉ាងណាលោកថា ក្នុងជំនួបបិទទ្វារនៅអង្គការសហប្រជាជាតិនោះគឺ អាមេរិកជំរុញឲ្យនៅបន្តរក្សាការដាក់សម្ពាធលើកូរ៉េខាងជើងរហូតដល់មានកិច្ចព្រមព្រៀងណាមួយជាក់លាក់ពីការបំផ្លាញឬ ទម្លាក់ចោលកម្មវិធីអាវុធនុយក្លេអ៊ែ។
កាលពីចុងឆ្នាំ២០១៧ សហរដ្ឋអាមេរិកបានព្រមានជាញឹកញាប់ក្នុងការប្រើប្រាស់កម្លាំងព័ទវាយលើរបបទីក្រុងព្យុងយ៉ាង ហើយអាមេរិកថែមទាំងមានការចល័តនាវាចម្បាំងទៅកាន់ឧបទ្វីបកូរ៉េទៀតផង។ ប៉ុន្តែជម្លោះនេះបានធូរស្រាលវិញចាប់តាំងពីដើមឆ្នាំ២០១៨ក្រោយពេលដែលលោក គីម ជុងអ៊ុនបន្ទន់ឥរិយាបថ៕
