កម្មកររោងចក្រមួយនៅក្រុងខ្មៅ ខេត្តកណ្តាល នៅបន្តដេកយាមមុខរោងចក្ររងចាំដំណោះស្រាយរឿងវិវាទការ ងារ បើទោះបីជាដល់ថ្ងៃចូលឆ្នាំប្រពៃណីជាតិខ្មែរក៏ដោយ។
កម្មកររោងចក្រ ហ្គាវ័ន ស្ថិតក្នុងក្រុងតាខ្មៅ អ្នកស្រី សាន់ សុខន អះអាងប្រាប់វីអូឌីនៅថ្ងៃនេះថា ក្រុមកម្មករ មិនទទួលបានសំណងទេ ហើយពួកគេនៅតែបន្តដេកយាមមុខរោងចក្រដដែលរហូតមកដល់ថ្ងៃនេះ ខណៈស្អែកជាថ្ងៃចូលឆ្នាំទី១។
អ្នកស្រីបន្តថា ការបន្តដេកយាមនៅមុខរោងចក្រដោយពុំបានទៅលេងស្រុកកំណើតនេះដោយសារពួកគាត់គ្មានថវិកាសម្រាប់ធ្វើដំណើរ និងចាយវាយនៅរដូវបុណ្យចូលឆ្នាំ។
អ្នកស្រីបន្តថា«អត់មានការបើកលុយ ទទួលលុយអ្វីទាំងអស់ ពួកខ្ញុំនៅថ្ងៃនេះនាំគ្នាចងតង់ដាក់បដារូបសម្តេចនៅខាងមុខរោងចក្រហ្នឹងដដែល ដេកយាមទ្រព្យសម្បត្តិរោងចក្រហ្នឹងដដែល ហើយអត់បានទៅចូលរួម ពិធីបុណ្យចូលឆ្នាំដែរ ព្រោះអីពួកខ្ញុំអត់មានថវិកាទេ និយាយទៅពិបាកណាស់។ ស្អែកនេះពួកខ្ញុំនឹងធ្វើពិធីទទួលទេវតានៅមុខរោងចក្រហ្នឹងតែម៉ង។ និយាយរួមពួកខ្ញុំប៉ះពាល់ខ្លាំងគឺអត់ហ្មងហាស់»។
លោកនាយករដ្ឋមន្ត្រី ហ៊ុន សែន កាលពីខែកុម្ភៈប្រកាសផ្តល់ថវិកាបុរេប្រទានជាង៤លាន៥៧ម៉ឺនដុល្លារទៅដោះស្រាយសំណងជូនកម្មករនៅ៩រោងចក្រដែលថៅកែរត់ចោលដោយមិនបានបើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនកម្មករ។
ប្រធានមន្ទីរការងារខេត្តកណ្តាល លោក លឹម សារ៉ុម មានប្រសាសន៍ថា ករណីវិវាទការងារនៅរោងចក្រហ្គាវ័ន បានឆ្លងផុតពីដៃមន្ទីរការងារហើយថា បានបញ្ជូនដល់ដៃតុលាការហើយដែរ។
លោក លឹម សារ៉ុម បន្តថា រោងចក្រហ្គាវ័ន មិនស្ថិតក្នុងចំណោមរោងចក្រ៩ដែលរដ្ឋាភិបាលប្រកាសចេញសំ ណងជូនជំនួសថៅកែនោះទេ។
លោកបន្ថែមថា«រឿងរបស់ពួកគាត់នេះយើងបានដោះស្រាយចប់សព្វគ្រប់ហើយ យើងបានបញ្ជូនទៅក្រសួង ហើយអាជ្ញាកណ្តាលបានដោះស្រាយហើយៗ បច្ចុប្បន្ន រឿងនេះស្ថិតក្នុងនីតិវិធីតុលាការ អញ្ចឹងគាត់រង់ចាំការ ដោះស្រាយតាមប្រព័ន្ធតុលាការ។ រោងចក្រនេះមិនមែនស្ថិតនៅក្នុង៩រោងចក្រទេ ៩រោងចក្រនោះគឺថៅកែរត់ ចោលប៉ុន្តែរោងចក្រហ្គាវ័ននេះថៅកែមិនរត់ចោលនោះទេ គឺថៅកែគេរងចាំការដោះស្រាយ»។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា មិនមែនមានតែរោងចក្រហ្គាវ័ននេះមួយទេដែលពុំទទួលសំណងមុនថ្ងៃចូលឆ្នាំ គឺមានរោងផ្សេងទៀត ដូចជា រោងចក្រ ហ្វឺស ហ្គាវ័ន រោងចក្រថបវើល រោងចក្រក្បាលកោះ និងរោងចក្រដៃយ៉ាងក៏មិនទទួលបានដំណោះស្រាយដែរ។
លោក អាត់ ធន់ បានបន្ទោសទៅមន្រ្តីក្រសួងការងារចំពោះការដោះស្រាយយឺតយ៉ាវនេះ ដោយថា វាជាភាព កំសោយរបស់អាជ្ញាធរក្នុងការជួយដោះសាយជូនកម្មករ។
លោកបន្ថែមថា«ខ្ញុំស្នើទៅរដ្ឋាភិបាលទី១គឺសុំឲ្យមន្រ្តីរបស់ខ្លួនហ្នឹងចុះធ្វើការឲ្យខានតែបានព្រោះថ្ងៃនេះនៅសល់ មួយថ្ងៃទៀតដែរ បើក្រុមហ៊ុនណាអាចផ្តល់បានត្រូវ បើកអាចទេ រដ្ឋត្រូវជួយចេញលុយទៅ បើចេញមិនបានទេ អាហ្នឹងកម្មករលំបាកហើយ។ ហើយអ្វីដែលរដ្ឋាភិបាលត្រូវដោះស្រាយបន្តទៀតនោះ គឺធ្វើយ៉ាងណាកុំឲ្យមន្រ្តី របស់ខ្លួនជាប់ពាក់ព័ន្ធជាមួយ ឬកាងក្រុមហ៊ុន បើរកឃើញថា មានកាងត្រូវដាក់ទោសទណ្ឌ»។
កម្មករប្រមាណជាង៧០០នាក់បម្រើការងារនៅរោងចក្រហ្គាវ័ន្តស្ថិតក្នុងក្រុងតាខ្មៅមានវិវាទការងាររយៈពេល ជាង១ឆ្នាំហើយជុំវិញរឿងថៅកែបើកប្រាក់ឈ្នួលឲ្យពួកគេមិនទៀងទាត់ និងមិនទូរទាត់ប្រាក់អត្ថប្រយោជន៍ជូន ពួកគេ ខណៈកម្មករទាំងនោះអះអាងថា ពួកគេធ្វើការនៅរោងចក្រនោះចម្លោះពី៧ទៅ១០ឆ្នាំ៕
