ចិនបង្ហាញនាវាចម្បាំងទ្រង់ទ្រាយធំមិនធ្លាប់មាន​

មេដឹកនាំចិនលោក ស៊ី ជីនពីង បានចូលរួមក្នុងពិធីដាក់តាំងនាវាចម្បាំងទ្រង់ទ្រាយធំកាលពីម្សិលមិញ នៅក្នុងតំបន់មានជម្លោះនៅក្នុងសមុទ្រចិនភាគខាងត្បូង។​

តាមទូរទស្សន៍រដ្ឋចិនលោក ស៊ី បានថ្លែងថា នាវាចម្បាំងត្រូវតែមានភាពរឹងមាំ ប៉ុន្តែមិនមែនជាការដាក់សម្ពាធលើភាគីណាមួយនោះទេ។​

នៅក្នុងពិធីនោះមានកងទ័ពជើងទឹកជាង១០ ០០០នាក់ចូលរួម មាននាវាចម្បាំង៤៨គ្រឿង និង យន្តហោះចម្បាំង៧៦គ្រឿង រួមទាំងនាវាមុជទឹកមួយចំនួនផង។​

តាមគម្រោងចិនក៏គ្រោងធ្វើសមយុទ្ធកងទ័ពជើងទឹកនៅជិតដែនកោះតៃវ៉ាន់នៅថ្ងៃទី១៨ខែមេសាខាងមុខ ខណៈដែលចិននៅតែចិញ្ចឹមចិត្តថា នឹងយកដែនដីតៃវ៉ាន់គ្រប់គ្រងវិញនៅពេលណាមួយ។​

បន្ទាប់ពីការថ្លែងសាររបស់លោក ស៊ី ជីនពីង នាវានិងយន្តហោះចម្បាំងលើនាវាបានចល័តដើម្បីបង្ហាញពីសមត្ថភាពតាមផ្នែក។​ ទូរទស្សន៍រដ្ឋចិនបានពិពណ៌នាថានេះ ជាការបង្ហាញធំបំផុតដែលមិនធ្លាប់មាន។​

នៅប៉ុន្មានឆ្នាំចុងក្រោយនេះ ចិនគឺជាប្រទេសដែលចំណាយលុយច្រើនជាគេបំផុតលើពិភពលោក ក្នុងការពង្រីកវិស័យយោធា ខណៈប្រទេសនេះកំពុងមានជម្លោះជាមួយប្រទេសជិតខាងទាំងដែនទឹក និងដែនគោក។​

កាលពីខែមីនាកន្លងទៅ នាវាចម្បាំងរបស់អាមេរិក​ ដែលមានផ្ទុកយន្តហោះចម្បាំងប្រើកម្លាំងនុយក្លេអ៊ែបានបើកទៅកាន់ប្រទេសវៀតណាម និងចូលទៅដែនទឹកមានជម្លោះនៅសមុទ្រចិនខាងត្បូង។​