បន្ទាប់ពីរដ្ឋមន្រ្តីក្រសួងព័ត៌មាន លោក ខៀវ កាញារិទ្ធ បង្ហាញការអន់ចិត្ត ចំពោះការតែងតាំងអគ្គនាយកថ្មីរបស់ទូរទស្សន៍ជាតិកម្ពុជា ដោយថាមិនបានសួរយោបល់លោកនោះ លោក ហ៊ុន សែន បានឆ្លើយតបបែបព្រមានថា «តើនាយករដ្ឋមន្ត្រីមានការចាំបាច់អង្គុយរង់ចាំពិគ្រោះជាមួយរដ្ឋមន្ត្រីដែលហៅទូរសព្ទ៥ដងមិនចូលឬទេ»។
តាមហ្វេសប៊ុករបស់នាយករដ្ឋមន្ត្រី នៅថ្ងៃអង្គារនេះ លោក ហ៊ុន សែន បានបញ្ជាក់ថាការតែងតាំងអគ្គនាយកថ្មីជំនួស លោក កឹម គុណវឌ្ឍន៍ ដែលត្រូវនិវត្តន៍ គឺលោកបានពិគ្រោះយោបល់ជាមួយរដ្ឋមន្ត្រីក្រសួងមុខងារសាធារណៈ ដែលជាអ្នកធ្វើសំណើតាមការស្នើសុំរបស់ក្រសួងព័ត៌មានដែលសុំតែងតាំង លោក ខ្វៃ អាទិត្យា។ ប៉ុន្តែលោកនាយករដ្ឋមន្រ្តីបានបដិសេធចំពោះបេក្ខភាពលោកខ្វៃអាទិត្យា។ លោក ហ៊ុន សែន បន្តថា «តើមានគ្រាប់ភ្នែកមើលព្រះរាជក្រិត្យដែលចែងថា (បានទ្រង់យល់សេចក្តីក្រាបបង្គំទូលថ្វាយរបស់សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាណាចក្រកម្ពុជា) ឬទេ បានជាម្នាក់និយាយថា ការតែងតាំងនេះចេញពីណា?»។
លោក ហ៊ុន សែន អះអាងថា បើពុំមានសំណើពីនាយករដ្ឋមន្ត្រីទេ ព្រះមហាក្សត្រ ព្រះអង្គនឹងមិនឡាយព្រះហស្តលេខាទេ។ លោកថា «សុំចងចាំកុំល្ងង់ពេក»។
ព្រះមហាក្សត្រ បានតែងតំាង លោក ឃឹម វុទ្ធី ជាអគ្គនាយក នៃអគ្គនាយកដ្ឋានទូរទស្សន៍ជាតិកម្ពុជា ជំនួស លោក កឹម គុណវឌ្ឍ ដែលធ្លាប់បានសុំលាលែងកាលពីពេលកន្លងទៅ។
លោក ឃឹម វុទ្ធី គឺអគ្គនាយករង នៃអគ្គនាយកដ្ឋានទូរទស្សន៍ជាតិកម្ពុជា ដែលគេស្គាល់ថា ជាពិធីករ និងជាអ្នកធ្វើការអត្ថាធិប្បាយលើទូរទស្សន៍ ទទក ក្នុងព្រឹត្តិការណ៍ធំៗ របស់រដ្ឋាភិបាល៕