មន្ត្រីក្រសួងមហាផ្ទៃមួយរូប ដែលសរសេរប្រមាថអាយុជីវិតលោកនាយករដ្ឋមន្ត្រី ហ៊ុន សែន និងក្រុមគ្រួសារនៅលើបណ្ដាញសង្គម Facebook ត្រូវបានកម្លាំងសមត្ថកិច្ចចាប់ខ្លួននៅថ្ងៃអង្គារនេះ។
មន្ដ្រីនគរបាលរូបនោះ ឈ្មោះ លាង ឡា ពាក់ស័ក្ដិ៣ មានតួនាទីជានាយរងផ្នែក នៃការិយាល័យគណនេយ្យ នាយកដ្ឋានភស្ដុភារ និងសម្ភារបច្ចេកទេសរបស់ក្រសួងមហាផ្ទៃ ប្រើគណនី Facebook ឈ្មោះ Leala Leang។ នៅលើហ្វេសប៊ុក របស់ឈ្មោះនេះ បានសរសេរថា «អាជោ ហ៊ុន សែន ជិតដល់ថ្ងៃអន្សាហើយ សូមព្រមានក្រកូលហ៊ុនទំាងអស់ចាកចេញ និរន្ទេសខ្លួនឲ្យបានមុនឆ្នាំ២០១៨។ បុណ្យវាសនាឯងត្រូវងាប់ ឬជាប់គុកដែលមិនអាចចៀសផុតឡើយ»។
អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ បានប្រាប់VODនៅរសៀលថ្ងៃអង្គារនេះថា សមត្ថកិច្ចជំនាញបានចាប់ខ្លួនមន្រ្តីនគរបាល លាង ឡា មកសួរនាំ ដោយថាបុគ្គលរូបនេះ បានជេប្រមាថអាយុជីវិតលោកនាយករដ្ឋមន្ត្រីហ៊ុន សែន និងក្រុមគ្រួសារ។ លោកថាបើសមត្ថកិច្ចរកឃើញកំហុសធ្ងន់ធ្ងរនឹងបញ្ជូនទៅតុលាការឲ្យចាត់ការតាមនីតិវិធីច្បាប់។
លោកនិយាយថា «បើមើលទៅខុសវិន័យ ត្រូវអនុវត្តតាមវិន័យ កំរិតណាអនុវត្តកំរិតហ្នឹង បើទៅវាខុសច្បាប់ ដាក់ទោសតាមច្បាប់»។
មេធាវីសុក សំអឿន មានប្រសាសន៍ថា ការលើកឡើងរបស់មន្ត្រីនគរបាលស័ក្តិ៣នោះ ជាការបញ្ចេញមតិច្រើនជាង ដោយលោកថា ករណីនេះ បុគ្គលរូបនោះអាចប្រឈមនឹងការដាក់វិន័យ។ លោកនិយាយថា «គ្រាន់តែសរសេរ គ្រាន់តែជាមតិមួយ យើងថាបរិហាកេរ្តិ៍ក៏មិនត្រូវ ជេប្រមាថក៏មិនទាន់ច្បាស់ គ្រាន់តែច្បាប់យើងពិបាកណាស់ កាលណាគេប្តឹងទៅជាប់គុកសិន បើខ្ញុំគិត វាអាចខុសវិន័យច្រើនជាង ព្រោះវិន័យយើងកងទ័ព យើងត្រូវអព្យាក្រិត ពេញចិត្ត មិនពេញចិត្តក្តីនៅឲ្យស្ងៀម តាមបញ្ជាថ្នាក់លើ ហើយនៅក្នុងរឿងកងទ័ព គេហាមមិនឲ្យមានយោបល់ពាក់ព័ន្ធនយោបាយ»។
កាលពីខែតុលាឆ្នាំ២០១៦ តុលាការរាជធានីភ្នំពេញ បានកោះហៅពលករម្នាក់ឈ្មោះ សាម ភាព អាយុ ២៧ឆ្នាំ ឲ្យចូលបំភ្លឺនៅក្រសួងមហាផ្ទៃ ក្រោមបទសង្ស័យថាបានដាក់បណ្ដាសាប្រមាថអាយុជីវិតលោកនាយករដ្ឋមន្ត្រី ហ៊ុន សែន នៅលើបណ្ដាញព័ត៌មានសង្គម។ លោក សាម ភាព គឺជាពលករខ្មែទីពីរ ដែលត្រូវបានកោះហៅឲ្យចូលបំភ្លឺ បន្ទាប់ពីពលករខ្មែរឈ្មោះ ផង់ សីហា អាយុ ២៧ឆ្នាំ និងមកពីខេត្តព្រៃវែងដូចគ្នា ត្រូវបានអាជ្ញាធរកម្ពុជាចាប់ខ្លួន កាលពីខែកញ្ញា ឆ្នាំ២០១៥។
យុវជន ផង់ សីហា ត្រូវបានតុលាការកាត់ទោសឲ្យជាប់ពន្ធនាគារ ១៨ខែ កាលពីដើមឆ្នាំ២០១៦នេះ ប៉ុន្តែ អនុវត្តទោសត្រឹម ៦ខែ បន្ទាប់ពីពលករខ្មែររូបនេះ បង្ហោះសារនៅលើហ្វេសបុក ដែលតុលាការចាត់ទុកជាបទល្មើសគំរាមកំហែងទៅលើលោកបណ្ឌិត សុខ ទូច។
ករណីគំរាមសម្លាប់នៅលើហ្វេសប៊ុកនេះ ក៏កើតមានចំពោះលោក កឹម សុខា ប្រធានគណបក្សសង្គ្រោះជាតិផងដែរ កាលពីឆ្នាំ២០១៣ ឆ្នាំ ប៉ុន្តែ អាជ្ញាធរគ្រាន់តែហៅឈ្មោះ ផែង វណ្ណៈ ជាប៉ូលីសក្រសួងមហាផ្ទៃ ទៅសាកសួរដោយមិនបញ្ជួនទៅតុលាការនោះឡើយ ៕