អង្គភាពប្រឆាំងអំពើពុករលួយ(ACU)តម្រូវឲ្យសមាជិកក្រុមប្រឹក្សាឃុំសង្កាត់ទូទាំង២៥រាជធានីខេត្ត ចាប់ផ្តើមប្រកាសទ្រព្យសម្បត្តិនិងបំណុលក្នុងរយៈពេល៣០ថ្ងៃក្រោយពេលចូលកាន់តំណែងគឺចាប់ពីថ្ងៃទី១៥ ខែកក្កដា ដល់ថ្ងៃទី១៥ សីហា ឆ្នាំ២០១៧។
តាមសេចក្តីជូនដំណឹងរបស់អង្គភាពប្រឆាំងអំពើពុករលួយកាលពីថ្ងៃទី១១ ខែកក្កដា បានកំណត់កាលបរិច្ឆេទចែកចេញជា៤ក្រុម សម្រាប់ឲ្យក្រុមប្រឹក្សាឃុំសង្កាត់ទូទាំងប្រទេសប្រកាសទ្រព្យសម្បត្តិនិងបំណុល។
អង្គភាពប្រឆាំងអំពើពុករលួយកំណត់ឲ្យក្រុមប្រឹក្សាឃុំ សង្កាត់នៅខេត្តបាត់ដំបង ព្រៃវែង ស្វាយរៀង កណ្ដាល តាកែវ និងខេត្តកំពង់ចាម គឺ ចាប់ពីថ្ងៃទី១៥ ដល់ថ្ងៃទី២១ កក្កដា។ ខេត្ត ព្រះវិហារ បន្ទាយមានជ័យ កំពង់ធំ រាជធានីភ្នំពេញ កំពត និងខេត្តកំពង់ស្ពឺ ថ្ងៃទី២២ដល់ ថ្ងៃទី២៨ កក្កដា។ ខេត្តឧត្តរមានជ័យ រតនគិរី កំពង់ឆ្នាំង ស្ទឹងត្រែង កែប និងខេត្តកោះកុង ថ្ងៃទី២៩ កក្កដាដល់ថ្ងៃទី៤ សីហា។ ខេត្តមណ្ឌលគិរី សៀមរាប ក្រចេះ ពោធិ៍សាត់ ព្រះសីហនុ ត្បូងឃ្មុំ និងខេត្តប៉ៃលិន ថ្ងៃទី៥ដល់១៥ ខែសីហា ឆ្នាំ២០១៧៕
ហូរ តុងហាន់