ក្រសួងការបរទេសកម្ពុជារំឭកមន្ត្រីរបស់ខ្លួនឲ្យបង្កើនការយកចិត្តទុកដាក់ កាត់បន្ថយការចំណាយលើការធ្វើលិខិតឆ្លងដែនដល់ពលករចំណាកស្រុកនៅប្រទេសម៉ាឡេស៊ី ខណៈប្រទេសនោះប្រកាសពីផែនការបណ្តេញពលករខុសច្បាប់ចេញពីប្រទេសរបស់ខ្លួន។
សេចក្តីជូនដំណឹងរបស់ក្រសួងការបរទេសកម្ពុជាចុះថ្ងៃទី៧ខែកក្កដា ដែលVODទទួលបាននៅថ្ងៃនេះ បានលើកឡើងថា ពលករខ្មែរមួយចំនួនដែលកំពុងធ្វើការនៅប្រទេសម៉ាឡេស៊ី ត្រូវធ្វើលិខិតឆ្លងដែនថ្មី ពួកគេបានចំណាយថវិកាយ៉ាងច្រើន នៅពេលលិខិតឆ្លងដែនចាស់អស់សុពលភាព មិនអាចពន្យារតទៅទៀតបាន។
ក្រសួងថា ករណីនេះខ្លួនបានណែនាំមន្ត្រីស្ថានទូតប្រចាំនៅប្រទេសនោះហើយ ដោយថាដើម្បីធ្វើការពិនិត្យនិងកំពុងពិភាក្សាជាមួយក្រសួងពាក់ព័ន្ធ រកវិធីសមស្របជួយកាត់បន្ថយការចំណាយរបស់ពលករ ពិសេសការចំណាយទៅលើអ្នករត់ការកណ្តាល។
ប្រធានមជ្ឈមណ្ឌលនៃសម្ព័ន្ធភាពការងារនិងសិទ្ធិមនុស្ស លោក មឿន តុលា បានស្វាគមន៍ទៅនឹងវិធានការរបស់រដ្ឋាភិបាល។ ប៉ុន្តែលោកថា ប្រសិទ្ធភាពជាងនេះនឹងជួយដោះស្រាយបន្ទុកពលករពិតប្រាកដនោះ គឺរដ្ឋាភិបាលត្រូវប្រកាសតម្លៃធ្វើលិខិតឆ្លងដែននេះជាសាធារណៈនិងប្រកាសពីវិធានការដាក់ទោសទណ្ឌដល់មន្ត្រីខិលខូច ដែលប្រព្រឹត្តិអំពើពុករលួយលើកិច្ចការនេះ ជាជាងចេញលិខិតអន្តរាគមន៍ពេលពលរដ្ឋមានបញ្ហា។
លោកថា៖ «កំនត់ឲ្យច្បាស់ទៅថា តើដើម្បីឲ្យបានលិខិតឆ្លងដែនមួយហ្នឹង គាត់[ពលករ]ត្រូវបង់សេវាអ្វីខ្លះ ហើយតម្លៃប៉ុន្មាន? ឲ្យវាជាក់លាក់ កុំឲ្យមានយកកម្រៃខាងក្រៅអីហ្នឹងជាដើម។ ហើយត្រូវមានយន្តការឲ្យគាត់ប្តឹង បើសិនមានមន្ត្រីស្ថានទូតយើងហ្នឹង គាត់ទារលើសពីសេវាដែលរដ្ឋបានកំណត់ហ្នឹង»។
អ្នកឃ្លាំមើលពីការអភិវឌ្ឍសង្គម លោក ប៊ួ បញ្ញា លើកឡើងដែរថា ការអន្តរាគមទាន់ពេល ជួយសម្រួលដល់ពលករចំណាកស្រុកនេះ លោកថាជាការស្តាមុខមាត់របស់បក្សកាន់អំណាចឡើងវិញ បន្ទាប់ពីបក្សប្រឆាំងយកបញ្ហានេះទៅលាតត្រឡាងថាបញ្ហារបស់ពលករចំណាកស្រុកជាការអសមត្ថភាពរបស់រដ្ឋាភិបាលនោះ។
លោកថា៖ «ជាដំណោះស្រាយរដ្ឋាភិបាលត្រូវពិនិត្យមើលបញ្ហាហ្នឹងឡើងវិញ។ ទី១គឺការធ្វើលិខិតស្នាមហ្នឹង កុំឲ្យមានអំពើពុករលួយ ហើយទី២ត្រូវបញ្ចុះតម្លៃតម្លៃឲ្យសមរម្យទៅនឹងជីវភាពរបស់ប្រជាពលរដ្ឋ»។
យ៉ាងណាក៏ដោយ ក្រសួងការបរទេសអះអាងថា កន្លងទៅខ្លួនបានធ្វើការណែនាំជាប្រចាំដល់ស្ថានទូត និងស្ថានអគ្គកុងស៊ុលនៅក្រៅប្រទេស អនុវត្តឲ្យបានត្រឹមត្រូវនិងធ្វើការបិទផ្សាយជាសាធរណៈ នូវតម្លៃនិងរយៈពេលនៃការផ្តល់សេវានានា។
បើតាមលោក មឿន តុលា ពលករចំណាកស្រុកដែលកំពុងធ្វើការនៅប្រទេសម៉ាឡេស៊ីមានជាង១០ម៉ឺននាក់ ទាំងស្របច្បាប់និងខុសច្បាប់។
ទាក់ទងបញ្ហានេះមាជិកសភាអាស៊ានដើម្បីសិទ្ធិមនុស្ស ចេញសេចក្ដីថ្លែងការណ៍សម្ដែងក្ដីបារម្ភចំពោះការបង្ក្រាបពលករខុសច្បាប់ដោយអាជ្ញាធរម៉ាឡេស៊ី។
ក្នុងសេចក្ដីថ្លែងការណ៍រួម នៅថ្ងៃទី១២ កក្កដា សមាជិកសភាកម្ពុជា លោកស្រី មូរ សុខហួរ ដែលជាសមាជិកក្រុមប្រឹក្សាភិបាលនៃសមាជិកសភាអាស៊ានដើម្បីសិទ្ធិមនុស្ស ថ្លែងថា ការចង់ឲ្យចំនួនពលករគ្មានឯកសារក្នុងប្រទេសនេះថយចុះ មិនអាចជាលេសធ្វើឲ្យអ្នករងគ្រោះទទួលភាពរងគ្រោះថែមទៀតទេ។
អាជ្ញាធរម៉ាឡេស៊ី ចាប់ផ្ដើមយុទ្ធនាការបង្ក្រាបពលករអន្តោប្រវេសន៍ធ្វើការខុសច្បាប់នៅតាមរោងចក្រ សហគ្រាស និងភោជនីយដ្ឋាននានាតាំងពីថ្ងៃទី១ កក្កដា ដោយចាប់ឃុំខ្លួនពលករគ្មានលិខិតស្នាមជាង ៣.០០០នាក់៕