នៅឯប្រទេសប៉ាគីស្ថាន មានសេចក្ដីរាយការណ៍មកថា មនុស្សយ៉ាងតិច ៥២នាក់ បានស្លាប់ ហើយជាង ១០០នាក់ទៀត បានរងរបួស កាលពីថ្ងៃម្សិលមិញ នៅក្នុងហេតុការណ៍បំផ្ទុះគ្រាប់បែកមួយនៅទីសក្ការដាច់ស្រយាលមួយ ដោយក្រុមរដ្ឋអ៊ីស្លាមប្រកាសទទួលខុសត្រូវចំពោះការវាយប្រហារនោះ។ នេះដោយយោងតាមទីភ្នាក់ងារព័ត៌មាន AFP។
ក្រុមមន្ត្រីប៉ាគីស្ថាន បានប្រាប់ AFP ថា គ្រាប់បែកបានវាយប្រហារទៅលើអ្នកចូលទៅបួងសួងនៅក្នុងពិធីមួយនៅទីសក្ការៈស៊ូហ្វី ដែលស្ថិតនៅចម្ងាយប្រហែល ៧៥០គីឡូម៉ែត្រ ភាគខាងត្បូងទីក្រុងហ្គេតា នៃខេត្តបូឡូជីស្ថាន។
ក្រុមមន្ត្រីមូលដ្ឋាននិយាយថា គ្រាប់បែកនោះ បានផ្ទុះឡើងអំឡុងពេលពលរដ្ឋកំពុងចូលរួមក្នុងពិធីរាំបូជាមួយ ដែលត្រូវបានរៀបចំឡើងរៀងរាល់ថ្ងៃនៅមុនថ្ងៃរៀបលិច។
អាជ្ញាធរនិយាយថា ពួកគេបានហៅរថយន្តសង្គ្រោះ និងបុគ្គលិកពេទ្យពីទីក្រុងការ៉ាជី ដែលត្រូវចំណាយពេលដល់ទៅ ៣ម៉ោងទើបទៅដល់ទីសក្ការៈនោះ ដែលស្ថិតនៅតំបន់ដាច់ស្រយាល សម្បូរទៅដោយភ្នំ និងមិនមានទីកន្លែងសង្គ្រោះបន្ទាន់គ្រប់គ្រាន់នោះឡើយ៕
ទីតាំងសក្ការៈនោះ ទទួលបានការគោរពទាំងពីក្រុមជនជាតិភាគតិចស៊ីអ៊ីត និងក្រុមមូស្លីមស៊ុននី ប៉ុន្តែ ពួកបះបោរដូចគ្នានឹងក្រុមតាលីបង់ និងរដ្ឋអ៊ីស្លាម ចាត់ទុកការប្រតិបត្តិបែបនោះ ប្រឆាំងទៅនឹងសាសនាអ៊ីស្លាម៕
