មនុស្សដល់ទៅជាង ១៣០នាក់ ត្រូវបានរាយការណ៍ថា បានស្លាប់នៅក្នុងប្រទេសអ៊ីរ៉ាក់ និងអ៊ីរ៉ង់ ហើយរាប់សិបនាក់ទៀតបានរងរបួស នៅក្នុងគ្រោះថ្នាក់រញ្ជួយដីកម្រិត ៧.៣រ៉ិចទ័រដែលបានវាយប្រហារប្រទេសទាំងពីរនេះកាលពីថ្ងៃម្សិលមិញ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters ដែលបានផ្អែកតាមប្រព័ន្ធផ្សព្វផ្សាយរដ្ឋនៃប្រទេសទាំងពីរនោះ បានរាយការណ៍បន្តថា ក្រុមអ្នកជួយសង្គ្រោះកំពុងតែបង្កើនកិច្ចខិតខំប្រឹងប្រែងរបស់ពួកគេ ដើម្បីស្វែងរកមនុស្សដែលកំពុងជាប់នៅក្រោមគំនរបាក់បែក។
អភិបាលរងខេត្តកឺម៉ាន់ហ្សាហ៍ ក្នុងប្រទេសអ៊ីរ៉ង់ ដែលស្ថិតនៅជាប់ព្រំដែនប្រទេសអ៊ីរ៉ាក់នោះ ត្រូវបានទូរទស្សន៍រដ្ឋដកស្រង់សម្ដីចុះផ្សាយថា យ៉ាងហោចណាស់មនុស្ស ១២៩នាក់ ត្រូវបានសម្លាប់នៅក្នុងខេត្តរបស់លោក។
ក្រៅពីមនុស្សស្លាប់ អាជ្ញាធរខេត្តនេះបញ្ជាក់ថា នៅមានមនុស្សជាប់នៅក្រោមគំនរបាក់បែកទៀត ដែលនាំឲ្យមានការប៉ាន់ប្រមាណថា ចំនួនអ្នកស្លាប់នឹងកើនឡើងថែមទៀត។
ចំណែកមន្ត្រីសុខាភិបាលឃឺត បាននិយាយថា យ៉ាងហោចណាស់មនុស្ស ៤នាក់ បានស្លាប់នៅក្នុងប្រទេសអ៊ីរ៉ាក់ ហើយ ៥០នាក់ទៀតបានរងរបួស។
ទីភ្នាក់ងារស្ទង់ភូមិសាស្ត្រអាមេរិក បាននិយាយថា រញ្ជួយដីនោះ មានកម្លាំង ៧.៣រ៉ិចទ័រ ខណៈដែលមន្ត្រីផ្នែកឧតុនិយមអ៊ីរ៉ាក់ បញ្ជាក់ថា រញ្ជួយដីនោះមានកម្លាំង ៦.៥រ៉ិចទ័រ នៅក្នុងខេត្តស៊ូឡៃម៉ានីយ៉ាហ៍ ស្ថិតនៅតំបន់ឃឺឌីស្ថាន ជាប់ប្រទេសអ៊ីរ៉ង់៕