គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានទុកពេល ១០ថ្ងៃទៀត សម្រាប់ពលរដ្ឋប្ដឹងជំទាស់ បន្ទាប់ពីស្ថាប័នបោះឆ្នោតមួយនេះ បានបិទបញ្ចប់ការចុះបញ្ជីឈ្មោះបោះឆ្នោតឆ្នាំនេះ។
សមាជិក គ.ជ.ប. លោក ហ៊ីង ធីឬទ្ធិ បានថ្លែងក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធនៅថ្ងៃនេះថា គ.ជ.ប. បានបញ្ចប់ការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតកាលពីថ្ងៃទី៩ ខែវិច្ឆិកាកន្លងមកនេះ។
លោកបន្ថែមថា គ.ជ.ប. បានបិទផ្សាយបញ្ជីឈ្មោះថ្មីនៅតាមឃុំ-សង្កាត់ និងនៅតាមទីតាំងណាមួយក្នុងឃុំ-សង្កាត់ នៅទូទាំងប្រទេស ចាប់ពីថ្ងៃទី១៤ ដល់ថ្ងៃទី២៤ ខែធ្នូ។
បើតាមមន្ត្រី គ.ជ.ប.រូបនេះ ពលរដ្ឋអាចពិនិត្យផ្ទៀងផ្ទាត់ឈ្មោះរបស់ពួកគេនៅក្នុងបញ្ជីបោះឆ្នោតដំបូង និងអាចប្ដឹងតវ៉ាទៅស្ថាប័នពាក់ព័ន្ធ ប្រសិនបើរកឃើញភាពមិនប្រក្រតីណាមួយនៅក្នុងបញ្ជីនោះ។
លោកថ្លែងថា៖ «ការប្តឹងតវ៉ា ការប្តឹងជំទាស់ត្រូវធ្វើនៅក្នុងឃុំសង្កាត់ក្នុងរយៈពេល ១០ថ្ងៃយ៉ាងយូរ បន្ទាប់ពីថ្ងៃបិទផ្សាយបញ្ជី បោះឆ្នោតដំបូង ចាប់ពីថ្ងៃទី១៥ ដល់ថ្ងៃទី២៤ ខែធ្នូ ឆ្នាំ២០១៧។ ក្នុងករណីអ្នកប្តឹងតវ៉ា និងប្តឹងជំទាស់មិនពេញចិត្តទៅនឹងសេចក្តីសម្រេចរបស់ក្រុមប្រឹក្សាឃុំសង្កាត់ អាចប្តឹងទៅ គ.ជ.ប. និងក្រុមប្រឹក្សាធម្មនុញ្ញតាមកំណត់ច្បាប់»។
ក្នុងវេទិកានោះ នាយកប្រតិបត្តិអង្គការនិកហ្វិក លោក សំ គន្ធាមី បានស្នើទៅស្ថាប័នរៀបចំការបោះឆ្នោតមួយនេះ ឲ្យជួយពន្យល់ពលរដ្ឋនៅអំឡុងពេលនៃការពិនិត្យបញ្ជីឈ្មោះបោះឆ្នោតនេះ ដោយលោកថា ដើម្បីបង្កលក្ខណៈងាយស្រួលដល់ប្រជាពលរដ្ឋដែលមានបំណងចង់ប្តឹងជំទាស់ ក្រោយពីឃើញឈ្មោះខុស ឬឈ្មោះស្ទួនក្នុងបញ្ជីបោះឆ្នោតនោះ។
លោកមានប្រសាសន៍ថា៖ «សូម គ.ជ.ប. ណែនាំប្រាប់គាត់ [ប្រជាពលរដ្ឋ] បើសិនជាគាត់ខុសទិន្នន័យរយៈពេលប្តឹង ១០ថ្ងៃ កុំឲ្យហួស ហើយមានជំនួយការ[មន្ត្រី គជប] ជួយដល់គាត់ផង ចំពោះបងប្អូនណា ដែលគាត់អត់ចេះអក្សរ»។
ប្រធាននាយកដ្ឋានសេវាកម្មច្បាប់ និងវិវាទកម្ម នៅ គ.ជ.ប លោក កែវ ផល្លា បានថ្លែងថា ដើម្បីដោះស្រាយបញ្ហាប្រឈមដូចដែលលោក សំ គន្ធាមី លើកឡើងនោះ លោកថា មានតែដៃគូពាក់ព័ន្ធទំាងអស់ សហការគ្នាទើបទទួលបានផលវិជ្ជមាន។
លោកថ្លែងថា៖ «ក្នុងករណីបែបនេះកើតឡើង ក៏យើងអត់មាននីតិវិធីណា ដែលថាជួយយ៉ាងម៉េច វាអត់មាន មានតែម្យ៉ាងគត់គឺថាយើងពឹងទៅលើភាគីពាក់ព័ន្ធ ជាពិសេសភ្នាក់ងារគណបក្សនយោបាយដែលនៅតាមមូលដ្ឋាន ក៏ដូចជាអង្គការសង្គមស៊ីវិល អ្នកសង្កេតការ គឺថាមានការជួយគ្នាទៅវិញទៅមក យើងសហការគ្នា»។
គ.ជ.ប. បានចាប់ផ្ដើមការចុះឈ្មោះបោះឆ្នោត និងធ្វើបច្ចុប្បន្នភាពបញ្ជីបោះឆ្នោត ចាប់ពីថ្ងៃទី០១ ខែកញ្ញា រហូតដល់ថ្ងៃទី០៦ ខែវិច្ឆិកាកន្លងមកនេះ។
របាយការណ៍ គ.ជ.ប. ឲ្យដឹងថា ពលរដ្ឋជាង ៥០ម៉ឺននាក់ បានទៅចុះឈ្មោះក្នុងបញ្ជីបោះឆ្នោតថ្មីឆ្នាំនេះ ខណៈដែលពលរដ្ឋជាង ១លាននាក់ទៀត ត្រូវបានគេដឹងថា មិនបានចុះឈ្មោះក្នុងបញ្ជីបោះឆ្នោតកន្លងមកនោះឡើយ៕