រដ្ឋាភិបាលកម្ពុជាបានចេញសេចក្ដីបំភ្លឺមួយកាលពីថ្ងៃម្សិលមិញនេះ ដោយបង្ហាញការសោកស្ដាយចំពោះការផ្សព្វផ្សាយឡើងវិញនូវទិន្នន័យមួយដែលនិយាយថា “ព្រៃឈើកម្ពុជាកំពុងបាត់បង់”។
កាលពីថ្ងៃទី១០ ខែមករានេះ របាយការណ៍របស់អង្គការណាសាអាមេរិក បានបង្ហាញថា ប្រទេសកម្ពុជាឈានមុខគេខាងកាប់បំផ្លាញព្រៃឈើធម្មជាតិ និងព្រៃស្ថិតក្នុងតំបន់ការពារ ដោយសារតែការទន្ទ្រានយកដីរបស់ក្រុមហ៊ុន សម្រាប់ដាំដំណាំកៅស៊ូ និងការកាប់ឈើខុសច្បាប់។
បើតាមរបាយការណ៍នេះ ក្រុមអ្នកវិទ្យាសាស្ដ្រ និងអ្នកស្រាវជ្រាវ រកឃើញថា នៅចន្លោះឆ្នាំ២០០១ និង២០១៤ អត្រាបាត់បង់គម្របព្រៃឈើប្រចាំឆ្នាំនៅកម្ពុជាកើនឡើង ១៤,៤ភាគរយ ស្មើនឹងផ្ទៃដីសរុប១,៤៤លានហិកតា ដោយភាគច្រើនស្ថិតក្នុងខេត្តកំពង់ធំ និងកំពង់ចាម។
ប៉ុន្តែ ក្រសួងបរិស្ថានកម្ពុជា កាលពីថ្ងៃម្សិលមិញ បានលើកក្នុងសេចក្ដីបំភ្លឺមួយថា ទិន្នន័យនេះ ត្រូវបានផ្សព្វផ្សាយម្ដងរួចមកហើយកាលពីឆ្នាំ២០១៥កន្លងមក ហើយក្រសួងសោកស្ដាយចំពោះការផ្សព្វផ្សាយទិន្នន័យនេះជាថ្មីម្ដងទៀត។
ក្រសួងបរិស្ថានបានចាត់ទុកទង្វើនេះជាចេតនាញុះញង់ និងបំភាន់សាធារណៈមតិ ដើម្បីបង្កឲ្យមានការរិះគន់វាយប្រហារទៅលើការដឹកនាំរបស់រដ្ឋាភិបាលកម្ពុជា៕