អ្នកវិភាគបញ្ហាសង្គមលោក គឹម សុខ ដែលត្រូវបានលោកនាយករដ្ឋមន្ត្រី ហ៊ុន សែន ប្តឹងនិងឲ្យសមត្ថកិច្ចតាមដាននោះបាន ស្នើរដល់រដ្ឋាភិបាល កុំដាក់កម្លាំងច្រើនពេកក្នុងការតាមដានសកម្មភាពរបស់លោក រួមទាំងបងប្អូននិងមិត្តភ័ក្ររបស់លោកផងដែរ។
លោក គឹម សុខ បានសរសេរនៅលើហ្វេសប៊ុកផ្ទាល់ខ្លួនរបស់លោកថា លោកនិងគ្រួសារ រងនូវការតាមរំខានពីសមត្ថកិច្ចជាច្រើន បន្ទាប់ពីលោក ហ៊ុន សែន បញ្ជាដល់អាជ្ញាធររបស់ខ្លួនឲ្យតាមមើលពីសកម្មភាពលោកកុំឲ្យលោកចេញក្រៅប្រទេស។ លោកសរសេរបន្ថែមថា សមត្ថកិច្ចតាមដានលោកតែពីរនាក់ គឺវាគ្រប់គ្រាន់ហើយ ហើយមិនគួរប្រើកម្លាំងទៅធ្វើសកម្មភាពដល់ស្រុកកំណើតរបស់លោកទៀតទេ។
លោក គឹម សុខ បានឲ្យដឹងថា កាលពីយប់មិញ មិត្តភ័ក្ររបស់លោកម្នាក់និងអ្នកជិតស្និទ្ធរបស់មិត្តខ្លួនម្នាក់ ក៏ត្រូវបានគេឃាត់ខ្លួនបញ្ជូនទៅអធិការដ្ឋានខណ្ឌដូនពេញ ដោយគ្រាន់តែពួកគាត់បានខ្ចីឡានគេទៅដឹកលោកចេញពីការិយាល័យ VOA មកផ្ទះវិញ។
លោកថា៖ «គណបក្សប្រជាជនកម្ពុជាបានប្តឹងខ្ញុំរួចហើយ ហើយខ្ញុំបានបញ្ជាក់ជំហរច្បាស់ថា នៅតតាំងក្នុងរឿងក្តីនេះ គឺមិនគេចខ្លួនដាច់ខាត ហេតុអ្វីបែរជាប្រើវិធីបំពានសង្កត់អ្នកដទៃទៀតដែលគ្រាន់តែស្គាល់រាប់អានខ្ញុំ?»។
វីអូឌីមិនអាចទាក់ទងអ្នកនាំពាក្យក្រសួងមហាផ្ទៃលោក ខៀវ សុភ័គ និងអ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធិ បាននៅឡើយទេ ដោយទូរសព្ទលោកទាំងពីរចុចចូលតែគ្មានអ្នកទទួល។
អ្នកវិភាគឯករាជ្យលោកបណ្ឌិត ឡៅ ម៉ុងហៃ យល់ថាសកម្មភាពដែលកើតឡើងជាបន្តបន្ទាប់ទៅលើលោក គឹម សុខ នេះជាសកម្មភាពមួយដែលជាចេតនាក្នុងការគំរាមនិងបង្ក្រាបទៅលើអ្នកដែលប្រឆាំងនឹងខ្លួន ក្នុងគោលបំណងពង្រឹងអំណាច ដែលធ្វើឲ្យលោកយល់ថាកម្ពុជាសព្វថ្ងៃនេះកំពុងដើរទៅក្នុងរបបផ្តាច់ការ។
លោកថា៖ «នេះបើតាមគំរូដែលមានស្រាប់មានមុនៗ នៅប្រទេសគេឯងហ្នឹង ហ្នឹងគេទៅតាមមួយជួរហ្នឹង ដែលភាសាអង់គ្លេសគេហៅថា…គឺបំភិតបំភ័យប្រជាពលរដ្ឋទាំងអស់នោះណាឲ្យខ្លបខ្លាច។ ដើម្បីថែរក្សាអំណាចពង្រឹងអំណាចរបស់ខ្លួន»។
នៅថ្ងៃនេះដែរ សមត្ថកិច្ចបានយកដីកាកោះហៅឲ្យចូលខ្លួនរបស់តុលាការរាជធានីទៅបិទដល់មុខផ្ទះរបស់ គឹម សុខ នៅស្រុកកំណើតនៅសង្កាត់រការក្នុង ក្រុងដូនកែវ ខេត្តតាកែវផងដែរ ហើយលើសពីនេះទៀតក៏មានដីកាមួយទៀតបង្គាប់ឲ្យអាជ្ញាធរពិនិត្យតាមច្រកព្រំដែនទាំងអស់ ឃាត់មិនឲ្យលោក គឹម សុខ ចេញទៅក្រៅប្រទេសនោះទេ។
គួររំលឹកផងដែរថាកាលពីថ្ងៃ១៣ កុម្ភៈ ម្សិលមិញលោក ហ៊ុន សែន បានប្រតិកម្មធ្ងន់ៗទៅលើអ្នកវិភាគបញ្ហាសង្គមលោក គឹម សុខ ដែលលោក ហ៊ុន សែន ថាលោក គឹម សុខ បានចោទទៅលើគណបក្សរបស់លោកថាជាអ្នកសម្លាប់លោកបណ្ឌិត កែម ឡី ក៏ប៉ុន្តែលោក គឹម សុខ បានបកស្រាយតាមប្រព័ន្ធផ្សព្វផ្សាយនានាថាលោកមិនបានចោទគណបក្សប្រជាជនដូចដែលអ្វីដែលលោក ហ៊ុន សែន បានលើកឡើងនោះទេ ហើយលោកក៏បានបញ្ជាក់ជំហរដែរថា នឹងនៅតតាំងរឿងក្តីនេះតាមច្បាប់ជាមួយបក្សប្រជាជន គឺមិនរត់ទៅក្រៅប្រទេសនោះទេ៕