មិត្តភក្តិពីរនាក់របស់អ្នកវិភាគ លោក គឹម សុខ ត្រូវបានគេសមត្ថកិច្ចខណ្ឌដូនពេញ ឃាត់ខ្លួនតាំងពីយប់មិញ បន្ទាប់ពីវិលត្រឡប់មកពីកម្មវិធីផ្សាយរបស់វិទ្យុសំឡេងសហរដ្ឋអាមេរិក VOA។
ដំណឹងស្ដីពីការឃាត់ខ្លួនអ្នកទាំងពីរនេះ ត្រូវបានលោក គឹម សុខ ប្រកាសឲ្យដឹងនៅលើទំព័រហ្វេសប៊ុករបស់លោក នៅព្រឹកថ្ងៃនេះ។
លោក គឹម សុខ បានប្រាប់ថា មិត្តភក្តិរបស់លោកឈ្មោះ សៀង ជិន និងអ្នកជិតស្និទ្ធគាត់ម្នាក់ទៀតត្រូវបានឃាត់ខ្លួនបញ្ជូនទៅអធិការដ្ឋានខណ្ឌដូនពេញតាំងពីយប់មិញ បន្ទាប់ពីអ្នកទាំងពីរបានទៅយករូបលោកពីការិយាល័យ VOA។
អ្នកវិភាគរូបនេះ អះអាងថា មិត្តភក្តិរបស់លោកមិនមានជាប់ពាក់ព័ន្ធទៅនឹងការងាររបស់លោកនោះឡើយ។
ជាងនេះទៅទៀត លោក គឹម សុខ ក៏បានបង្ហោះសារកាលពីយប់មិញថា សមត្ថកិច្ចក៏ត្រូវបានគេដាក់ឲ្យឃ្លាំមើលសកម្មភាពលោក នៅឯស្រុកកំណើតលោកផងដែរ ដែលលោកថា បានបង្កការភ័យខ្លាចដល់សាច់ញាតិរបស់លោក។
ការអះអាងបែបនេះរបស់លោក គឹម សុខ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ព្រមានចាប់ខ្លួន និងឲ្យសមត្ថកិច្ចតាមឃ្លាំមើលរូបលោក ដោយថា ក្រែងលោរូបលោកគេចខ្លួនទៅក្រៅប្រទេស៕