តំណាងរាស្ត្របក្សប្រឆាំង លោក អេង ឆៃអ៊ាង បានអះអាងថា សមាជិកព្រឹទ្ធសភាបក្សប្រឆាំង អ្នកស្រី ថាក់ ឡានី ដែលកំពុងប្រឈមមុខនឹងបណ្ដឹងពីលោកនាយករដ្ឋមន្ត្រី ហ៊ុន សែន នោះ មិនបានលាក់ខ្លួននោះទេ ប៉ុន្តែថា ប្រទេសស៊ុយអែត បានផ្ដល់សិទ្ធិជ្រកកោកនយោបាយ។
តំណាងរាស្ត្របក្សប្រឆាំងរូបបានលើកឡើងបែបនេះនៅលើទំព័រហ្វេសប៊ុករបស់លោក កាលពីយប់មិញ ជាការឆ្លើយតបទៅនឹងការចុះផ្សាយរបស់សារព័ត៌មានថ្មីៗថា អ្នកស្រី ថាក់ ឡានី កំពុងលាក់ខ្លួននៅប្រទេសស៊ុយអែត។
សមាជិកព្រឹទ្ធសភាបក្សប្រឆាំងរូបនេះ ត្រូវបានលោក ហ៊ុន សែន ប្ដឹងពីបទបរិហារកេរ្តិ៍ជាសាធារណៈ និងបទញុះញង់ឲ្យប្រព្រឹត្តអំពើវឹកវរ បន្ទាប់ពីអ្នកស្រីបានថ្លែងជុំវិញករណីឃាតកម្មលើអ្នកវិភាគ លោក កែម ឡី កាលពីខែកក្កដាឆ្នាំមុន៕
